ʻOkú Ke “Loto” ke Tokoniʻi ʻa e Niʻihi Kehé?

¹ Naʻe tokanga moʻoni ʻa Sīsū ki he kakaí. ʻI he taimi naʻe kōlenga ai ha tokotaha kilia kiate ia ki ha tokoní, naʻe mafao atu ʻa e nima ʻo Sīsuú, ʻo ala ki he tangatá, mo ne pehē: “ʻOku ou loto pe; ke ke maʻa koe.” (Mk. 1:​40-42, fakaʻītali ʻamautolu.) ʻI he ngaahi founga fē ʻe lava ke tau faʻifaʻitaki ai ki he fakakaukau ʻa Sīsū ki hono tokoniʻi ʻa e niʻihi kehé?

² Kakai Mahuʻingaʻiá: Ko e mēmipa taki taha ʻo e fakatahaʻangá ʻokú ne kau ʻi hono tokoniʻi ʻa e faʻahinga mahuʻingaʻiá ke nau hoko ko e kau lotu ʻa Sihova. ʻI he taimi ʻoku haʻu ai ʻa e faʻahinga foʻoú ki he ngaahi fakatahá, fakafeʻiloaki kia kinautolu pea fakamaheni ki ai. Kumi ki ha ngaahi founga ke fakalotolahiʻi ai kinautolu. Fakaongoongoleleiʻi kinautolu ʻi he ngaahi tali ʻoku nau faí. Fakahāhā ʻa e houngaʻia ki heʻenau ngaahi feinga ke ngāueʻaki ʻa e ngaahi tefitoʻi moʻoni faka-Tohitapú ʻi heʻenau moʻuí. Tokoniʻi kinautolu ke nau sio ki heʻenau malava ke ʻai ha ngaahi kaumeʻa moʻoni ʻi loto ʻi he fakatahaʻangá.

³ Ngaahi Kaungātuí: Ko e “faʻahinga ko ia ʻoku felāveʻi mo kitautolu ʻi he tuí” ʻoku tautefito ʻa e taau ke tau tokoniʻí ʻi ha ngaahi founga kehekehe. (Kal. 6:​10, NW) ʻOku fāinga ʻa e tokolahi mo e ngaahi palopalema fakaemoʻuilelei. ʻI hono fai ha ʻaʻahi fakalototoʻá, ʻe lava ke ke ʻoatu ai ʻa e feohi mātuʻaki mahuʻinga pea toe tokoni nai ʻi he ngaahi founga ʻaonga. ʻOku fehangahangai nai ʻa e niʻihi mo e ngaahi faingataʻa kehe ʻi heʻenau moʻuí. Fakahaaʻi ʻa hoʻo tokangá ʻaki hono vaheʻi ʻa e taimi ke fanongo ai kia kinautolu pea langa hake kinautolu. (1 Tes. 5:​14) ʻOku fiemaʻu foki ʻe he kau mātuʻá ʻa ʻetau tokoni fāitahá ʻi heʻenau fakahoko honau ngaahi fatongiá. (Hep. 13:17) ʻI hono fakahāhaaʻi ha laumālie loto-lelei mo fietokoní, ʻe lava ke tau “hoko ko ha tokoni fakaivimālohi” ki hotau ngaahi kaungātuí.​—Kol. 4:​11, NW.

⁴ Ngaahi Mēmipa ʻo e Fāmilí: ʻOku toe totonu ke tau feinga mālohi ke faʻifaʻitaki ki he tokanga ʻa Sīsū ki he kakaí, ʻi hotau siakale fakafāmilí tonu. Ko e tokanga lahí ʻoku ueʻi ai ʻa e ngaahi mātuʻá ke ‘hanganaki tauhi hake ʻenau fānaú ʻi he akonaki mo e fakatonutonu-fakaʻatamai ʻa Sihová.’ (Ef. 6:​4, NW) ʻE lava ke fai ʻe he fānaú ʻenau tafaʻakí ʻaki ʻa e hoko ʻo mateuteu vave ʻi he hoko ʻa e taimi ki he ako fakafāmilí, ngaahi fakataha ʻa e fakatahaʻangá, pe ko e malaʻe ngāué. ʻE lava ke tapua atu ʻe he fānau kuo lalahí ʻa e manavaʻofa ʻa Sīsuú ʻaki ʻa e tokoni anga-ʻofa ki heʻenau ngaahi mātuʻá ke nau fekuki mo e ngaahi faingataʻa ʻoku fakatupunga ʻe he hoholo ke motuʻá. ʻI he ngaahi meʻá ni mo e ngaahi founga kehe, ko kitautolu kotoa ʻe lava ai ke tau “fai ʻa e toʻonga totonu ki [hotau] famili.”—1 Tim. 5:4.

⁵ ʻI heʻetau faʻifaʻitaki kia Sīsū ʻi hono tokoniʻi ʻa e niʻihi kehé, te tau malava nai ke fakasiʻisiʻi ʻa e ngaahi palopalemá pea ke tohoaki mai hotau fāmilí pea mo e fakatahaʻangá ke toe vāofi ange. Ko e meʻa ʻoku mahuʻinga tahá, te tau ʻoatu ai ʻa e lāngilangi kia Sihova, “ko e Tamai ʻa e fai manavaʻofa.”—2 Kol. 1:3.