ʻE Lava Ke Ke Fakaaʻu Atu ha Nima Fietokoni?
1 ʻOku kumi maʻu pē ʻa Sihova ki ha ngaahi founga ke fakaaʻu atu ai ha nima fietokoni ki heʻene kau sevāniti mateakí. (2 Kal. 16:9; Ai. 41:10, 13) ʻI hono fakatatau Ia ki ha tauhi-sipi tokangá, naʻe tohi ʻe ʻAisea: “Te ne faluku ʻene fanga lami ʻi hono kona, ʻo fua ʻi hono fatafata, ko e toutama te ne takitakimalie.” (Ai. 40:11) Vakai angé ki ha ngaahi founga ʻa ia ʻe lava ke tau faʻifaʻitaki ai ki he tokanga ʻofa ʻa Sihová.
2 Kakapa Atu ki he Faʻahinga Foʻoú: ʻE lava ke tau fakaaʻu atu ha nima fietokoni ʻaki hono fakaafeʻi ʻa e faʻahinga foʻoú ke nau maʻu ha feohi fakatupu langa hake mo kitautolu. (Pal. 13:20) ʻI he manatu ki he founga ʻo e kakapa atu kiate ia ʻi he taimi naʻá ne kamata feohi ai mo e fakatahaʻangá, naʻe pehē ʻe ha tokoua ʻe taha: “ʻI he ngaahi taimi lahi, naʻe fakakau ai au ʻe ha fāmili ʻi heʻenau ako fakafāmilí. ʻI heʻeku fakalakalaká, naʻe faʻa fakaafeʻi au ʻe ha ongo meʻa mali tāimuʻa kei talavou ke u kau fakataha mo kinaua ʻi ha ngaahi ʻaho kakato ʻi he ngāue fakafaifekaú. Naʻa mau maʻu maʻu pē ha ngaahi fetalanoaʻaki fakalaumālie lelei ʻaupito.” Naʻá ne tānaki mai: “Ki muʻa ke hoko ko ha Kalisitiané, naʻá ku faʻa ʻalu ʻo kumi fakafiefia ʻi he ngaahi pō Falaité mo e Tokonakí. Ka ko e taimi naʻá ku fakamoleki fakataha mo e fanga tokouá naʻá ne fakalato ʻa ʻeku fiemaʻu ʻo e feohí.” Ko e mahuʻingaʻia anga-ʻofa ʻa e fakatahaʻangá naʻá ne tokoniʻi ʻa e tokouá ni ke ne hoko ai ʻo faiaka lelei pea tuʻumaʻu ʻi he tuí, pea ʻokú ne ngāue he taimí ni ko ha mēmipa ʻo e fāmili Pētelí.—Kol. 2:6, 7.
3 Felangahakeʻaki: ʻE lava ke tau ʻiloʻi ha faingamālie ke fakaaʻu atu ai ha nima fietokoni ʻi he taimi ʻoku fehangahangai ai hotau fanga tokouá mo e ngaahi tuʻunga faingataʻá. ʻE lava ke ke fokotuʻutuʻu ke faifakamoʻoni he telefoní fakataha mo ha tokotaha malanga ʻoku vaivai, pe fakaafeʻi ia ke ne ʻalu fakataha mo koe ʻi ha ako Tohi Tapu, naʻa mo hano ʻave nai ʻa e tokotaha akó ki hono ʻapí? ʻE houngaʻia nai ha mātuʻa tauhi fānau ʻoku ʻi ai ʻene fānau īkí ʻi ha nima fietokoni ʻi he taimi ʻo e kau ki he ngāue fakafaifekaú? ʻOku ʻi ai ha faʻahinga ilifia ʻa ia te nau talitali lelei ʻa hoʻo tokoní ʻi hono fai ʻa e ngaahi toe ʻaʻahí pe ʻi he kau ʻi ha tafaʻaki kehe ʻo e ngāue fakafaifekaú? Ko e mahuʻingaʻia anga-ʻofa ʻi hotau fanga tokouá te ne ueʻi kitautolu ke tau kumi ki ha ngaahi founga ke langa hake ai kinautolu.—Loma 14:19.
4 ʻI heʻetau faʻifaʻitaki ki he tokanga fakaalaala ʻa Sihova ki heʻene kau sevānití, ʻoku tau fefakaivimālohiʻaki ai, tokoni ki hono fakatahaʻi ʻa e fakatahaʻangá ʻi he ʻofá, pea fakalāngilangiʻi ai ʻa ʻetau Tamai fakahēvaní.—Ef. 4:16.