Polokalama ʻAsemipilī Fakasēketi Foʻou
1 Ke tuʻu maʻu ʻi he tuí ʻi ha māmani ʻikai tuʻumaʻu, kuo pau ke tau falala kia Sihova. ʻE lava fēfē ke tau fakahāhā ʻa e falala ko iá ʻi heʻetau moʻui fakaʻahó? ʻOku anga-fēfē hono laveʻi ʻe he falala kia Sihová ʻetau moʻui fakafoʻituituí mo e fakafāmilí? ʻOku anga-fēfē ʻene tokoniʻi kitautolu ke talitekeʻi ʻa e tākiekina ʻa e māmani ʻo Sētané? Ko e polokalama ʻasemipilī fakasēketi ki he taʻu fakangāue 2003 ʻokú ne tali ʻa e ngaahi fehuʻi ko ení. Ko hono kaveingá “Falala Koe kia Sihova, ʻo Fai Lelei.”—Sāme 37:3.
2 Ko ʻetau falala kia Sihová ʻoku ʻikai fakatatali pē ia ki he ngaahi taimi makehé pe ko e ngaahi taimi ʻo e fiemaʻu fakavavevavé. ʻOkú ne laveʻi ʻa e tafaʻaki kotoa ʻo ʻetau moʻui fakaʻahó. ʻOku fakamamafaʻi eni ʻi he malanga kamatá, “Falala kia Sihova ʻi he Taimi Kotoa Pē.” (Sāme 62:8) Ko e malanga fakakongokonga konga ʻe fā ko e “Fakahāhā ʻa e Falala kia Sihová” ʻe fakahā mai ai kia kitautolu ʻa e founga ke maʻu ai mo ngāueʻaki ʻa e fakamatala makatuʻunga faka-Tohitapu ʻa ia ʻe lava ke ne tokoniʻi kitautolu ke langa hake ai ha nofo mali lavameʻa, ke fakaleleiʻi ʻa e ngaahi palopalema ʻoku malanga hake ʻi he siakale fakafāmilí, pea ke aʻusia ʻetau ngaahi fiemaʻu fakamatelié.
3 ʻOku feinga ʻa e māmani ʻo Sētané ke hilifaki mai kia kitautolu ha vakai mioʻi ki he meʻa ʻoku tonú mo halá pea fakatupunga ʻa e puputuʻu ki he meʻa ʻoku mahuʻingá mo taʻemahuʻingá. (Ai. 5:20) Ko e ongo malanga “Maluʻi mei he Ngaahi Meʻa Taʻeʻaonga ʻo e Moʻuí” mo e “Hola mei he Koví—Hoko ko e Kau Failelei” te na ʻai ke mālohi ʻetau fakapapau ke poupouʻi ʻa e ngaahi tuʻunga māʻolunga ʻa Sihová.—Emosi 5:14.
4 ʻI he taimi ʻe ʻomai ai ʻe Sihova ʻa e ngataʻanga ki he fokotuʻutuʻu fulikivanu lolotonga ʻo e ngaahi meʻá, ʻe fiemaʻu ai ʻa e kau sevāniti ʻa e ʻOtuá ke nau falala kakato kiate ia. ʻOku fakamamafaʻi eni ʻi he malanga maʻá e kakaí, “Ko e Fakahaofi mei he Faingataʻa ʻi he Māmaní ʻOku Ofi.” Hili iá, ʻe fakaafeʻi mai ke tau sivisiviʻi kitautolu tonu ʻi he konga “ʻE Lau Koe ʻOkú Ke Taau mo e Puleʻanga ʻo e ʻOtuá?” ʻOku fakaʻosiʻaki ʻa e polokalamá ha enginaki ke “Falala ki he Ngaahi Talaʻofa ʻa Sihová.”
5 Ko ha meʻa mahuʻinga ʻo e ʻasemipilī kotoa pē ko e malanga papitaisó. Ko ha taha pē ʻoku fakaʻamu ke papitaiso ʻoku totonu ke ne tala ia ki he ʻovasia tauhí ʻi he vave taha ʻe ala lavá koeʻuhi ke lava ai ʻo fai ʻa e ngaahi fokotuʻutuʻu ʻoku fiemaʻú.
6 ʻI he ngaahi taimi taʻepau ko ení, ko Sihova pē ʻa e matavai moʻoni ʻo e falalaʻangá mo e tuʻumaʻú. (Sāme 118:8, 9) ʻOfa ke tau ʻai kotoa ke mālohi ʻetau falala kiate iá ʻaki ʻetau ʻi ai ʻi he polokalama ʻasemipilī fakasēketí kotoa.