Polokalama ʻAsemipilī Fakafeituʻu Foʻou
ʻOku tau ʻilo ʻoku taau mo Sihova ko e ʻOtuá ʻa ʻetau ʻofá mo ʻetau anga-līʻoa maʻataʻataá. Kae kehe, ʻoku feinga ʻa e māmaní ke tohoakiʻi mamaʻo kitautolu mei hono tauhi maʻu hotau vahaʻangatae vāofi mo iá. (Sione 17:14) Ke ʻai ke mālohi ʻetau ʻofa kia Sihová pea mo fakaivimālohiʻi kitautolu ke talitekeʻi ʻa e ngaahi meʻa ʻo e māmaní ʻa ē ʻoku fakatupu fakatuʻutāmaki ki hotau tuʻunga fakalaumālié, ko e polokalama ʻasemipilī fakafeituʻu foʻou ki he taʻu fakangāue 2001 ʻe ʻai ʻa hono kaveingá ko e “ʻOfa ki he ʻOtuá—ʻIkai ko e Ngaahi Meʻa ʻo e Māmaní.”—1 Sione 2:15-17.
Ko e ʻofa loloto kia Sihová ʻokú ne ueʻi kitautolu ke tau fai ai ha fakamoʻoni fekauʻaki mo ia. Neongo ia, ʻoku ʻikai ke faingofua ʻa e ngāue fakamalangá ki he tokolahi ʻo e kakai ʻa e ʻOtuá. ʻI he konga “Ko e ʻOfa ki he ʻOtuá ʻOkú Ne Ueʻi Kitautolu ʻi Heʻetau Ngāue Fakafaifekaú,” te tau ako ai ki he founga kuo ikuʻi ai ʻe he tokolahi ʻa e maá pea mo e ngaahi fakafaingataʻaʻiaʻanga kehe koeʻuhi ke nau kau kakato ai ki he ngāue ko ʻení.
ʻOku anga-fēfē hono tākiekina kitautolu ʻe he ngaahi tuʻunga ololalo ʻo e māmaní? Ko e ngaahi tōʻonga ko ia naʻe vakai ki ai ʻi ha taimi naʻe fulikivanú ʻoku taku ia he taimí ni ko ha ʻulungaanga totonu pē ia. Ko e malanga “Ko e Kau ʻOfa kia Sihová ʻOku Nau Fehiʻa ki he Meʻa ʻOku Koví” pea mo e malanga fakakongokonga ko e “Ngaahi Meʻa ʻi he Mámaní—ʻOku Anga-Fēfē ʻEtau Vakai Ki Aí?” te ne poupouʻi ʻetau fakapapau ke tali ʻikai ki he ngaahi holi ʻoku halá.
ʻE fakakau ʻi he polokalamá ha sīpinga ʻo e Ako Fakafaifekau Fakateokalatí mo e Fakataha Ngāué, pea pehē ki ha fakamatala fakanounou ʻo e kupu ako Taua Leʻo ki he uiké. Ko e malanga maʻá e kakaí, “Founga ʻOku Ikunaʻi Ai ʻa e Māmaní ʻe he ʻOfá mo e Tuí,” te ne fakaʻaiʻai kitautolu ke tau faʻifaʻitaki kia Sīsū ʻi hono talitekeʻi ʻa e ngaahi tenge fakamāmaní. (Sione 16:33) Fakapapauʻi ke fakaafeʻi ʻa hoʻo kau ako Tohitapú ke nau kau ki ai. Ko ha faʻahinga pē ʻoku loto ke papitaiso ʻoku totonu ke nau tala ki he ʻovasia tauhí ʻi he vave taha ʻe malavá koeʻuhí ke malava ʻo fai ʻa e ngaahi fokotuʻutuʻu ʻoku fiemaʻú.
ʻE fakahanga ʻe he ʻasemipilī fakafeituʻu ko ʻení ʻetau tokangá ki he feituʻu tonu pē ko ia ʻoku totonu ke fakatefito ai ʻetau ʻofá koeʻuhí ke tau fiefia ai ʻi he ngaahi tāpuaki lahi ʻa Sihová. ʻOua naʻá ke tō mei ha taha ʻo ia!