Ko ha ʻAsemipilī Fakasēketi ke Tokoniʻi Kitautolu ke Maluʻi Hotau Tuʻunga Fakalaumālié
1. Ko e hā ʻa e tokonaki ʻe taha meia Sihova ke tokoniʻi ai kitautolu ke fakahoko ʻa e fekau ke malangaʻi ʻa e ongoongo leleí?
1 ʻOku tokonaki loto-foaki mai ʻe Sihova ʻa e fakamatala, ako pea mo e fakalototoʻa ʻoku tau fiemaʻú ke kau ai ʻi hono fai ʻo e fekau fakaʻotua ke fakamafola ʻa e ongoongo leleí. (Mt. 24:14; 2 Tim. 4:17) Ko ʻetau ʻasemipilī fakasēketi fakataʻú ko ha tokonaki pehē ia ʻe taha. Ko ha polokalama foʻou ki he taʻu fakangāue 2010 ʻe fakahoko ai ʻa e kaveinga ko e “Maluʻi Ho Tuʻunga Fakalaumālié,” makatuʻunga ʻi he Loma 8:5 mo e Siutasi 17-19. ʻOku fakataimitēpileʻi ia ke kamata ʻi he uike ʻo ʻAokosi 31, 2009.
2. (a) ʻI he ngaahi founga fē ʻe ʻaonga ai kiate kitautolu ʻa e ʻasemipilī fakasēketi? (e) Kuo anga-fēfē hono tokoniʻi koe ʻi he ngāue fakafaifekaú ʻe he ʻasemipilī fakasēketi he kuohilí?
2 Founga ʻOku ʻAonga Aí: ʻE ʻai kitautolu ʻe he polokalamá ke tau tokanga ki he ngaahi fakatuʻutāmaki, hangē ko e ngaahi fakahohaʻa ʻa ia ʻoku fakamanamana ke keina hotau taimí mo afeʻi ʻetau tokangá mei he meʻa ko ia ʻoku mahuʻinga moʻoní. Te tau ako ai ki he founga ki hono fakafepakiʻi ʻa e laumālie ʻo e fakangofua tavalé, pea te tau lāulea ai ki he tuʻunga ʻo ha tokotaha fakalaumālie. Ko e malanga fakakongokonga ʻi he Sāpaté ʻe fakahaaʻi ai ʻa e founga ʻe lava ke fou ai ʻa e faʻahinga tāutaha pea pehē ki he kulupu fakafāmilí ke fakaivimālohi ʻaki honau tuʻunga fakalaumālié ʻi he fehangahangai mo e fakautuutu ʻa e tengé mo e ʻahiʻahiʻi kakaha ʻo e tuí. ʻE tokoniʻi kitautolu ʻe he polokalama ko ení ke maluʻi hotau lotó, tauhi maʻu ʻetau moʻui lelei fakalaumālié, pea ʻai ke manatuʻi lelei ʻa e ngaahi tāpuaki maʻongoʻonga ʻoku fakatatali mai ki he faʻahinga ko ia ʻoku nau maluʻi honau tuʻunga fakalaumālié.
3. Ko fē taimi ʻe fai ai hoʻomou ʻasemipilī fakasēketi hono hokó, pea ko e hā ʻoku totonu ke ke fakapapauʻí?
3 ʻI hoʻo ʻiloʻi pē ʻa e taimi mo e feituʻu ʻe fai ai hoʻomou ʻasemipilī fakasēketi hono hokó, fai leva ha palani ke ʻi ai pea kau ki he polokalama kotoa ʻi he ongo ʻahó fakatouʻosi. Fakapapauʻi ange, ʻe tāpuakiʻi ʻe Sihova ʻa e faʻahinga ʻoku faʻa ngāué.—Pal. 21:5.
4. Ko e hā ʻoku tau fakapapauʻi ʻe maʻu ʻi heʻetau ʻasemipilī fakasēketi ka hokó?
4 Ko e moʻoni ko Sihova ʻa e Tokotaha-Tokonaki ʻo e meʻaʻofa lelei ko ení. Ko e polokalama kuo teuteu ʻe he kalasi tamaioʻeiki anga-tonú ʻa e meʻa tofu pē ʻoku tau fiemaʻu ke hokohoko atu ai ʻi he tuʻunga ko e kau faifekau Kalisitiane. ʻOku tau houngaʻia ʻia Sihova koeʻuhi ko ʻene ngaahi tokonaki anga-ʻofa ʻi hono tokoniʻi kitautolu ke “tau puke maʻu ʻa e talaki fakahāhā ʻo ʻetau ʻamanakí ʻo ʻikai ha veiveiua.”—Hep. 10:23-25, NW; Sem. 1:17.