Ko ha Tokonaki ki he Kau Faifekau Kalisitiané
1 ʻI he 1938, naʻe kamata ai ʻe he kautaha ʻa Sihová ha fokotuʻutuʻu foʻou. Naʻe fakaafeʻi ʻa e ngaahi kulupu ʻo e ngaahi fakatahaʻangá ke nau kau ki he ngaahi ʻasemipilī fakasone, ʻoku ui he taimí ni ko e ngaahi ʻasemipilī fakasēketi. Ko e ʻīsiu ʻo Sanuali 1939 ʻo e Informant (Ko ʻEtau Ngāue Fakafaifekau ia he taimi ní) naʻe tali ai: “Ko e ngaahi ʻasemipilī ko ení ko ha konga ia ʻo e Fokotuʻutuʻu Maau Fakateokalati ʻa Sihova ki hono tataki ʻa e ngāue ʻa hono Puleʻangá. Ko e fakahinohino naʻe ʻomai aí ʻoku fiemaʻu pau ia ki he tokotaha taki taha koeʻuhí ke ne fai lelei ʻa e ngāue kuo vaheʻi maí.” ʻI heʻetau fakakaukau atu ki he tupu ʻi he kau fanongonongo ʻo e Puleʻangá mei he toko 58,000 pē ʻi he 1938 ʻo laka hake ʻi he toko 7,000,000 ʻi he 2009, ʻoku hā mahino ko e ngaahi ʻasemipilī fakasēketí, ʻoku nau fakahoko ʻenau taumuʻa ke tokoniʻi ʻa e kau faifekaú ke nau ‘fai ʻa e ngāue kuo vaheʻi maí’!
2 Kaveinga ki he Taʻu Hoko Maí: ʻOku tau fakatuʻotuʻa atu ki he polokalama ʻe kamata ʻi Sepitemá mo e fakalototoʻa ʻe ʻomai aí. Ko e kaveingá “ʻIkai ʻo Māmani ʻa Kimoutolu” ʻoku toʻo ia mei he Sione 15:19. Ko e hā e niʻihi ʻo e ngaahi malanga ʻe maʻu ʻaonga moʻoni mei ai ʻa e kau faifekau Kalisitiané? Te tau fanongo ʻi he Tokonakí ki he malanga “Maluʻi Kitautolu ʻe he Ngāue Taimi-Kakató—Anga-Fēfē?” Te tau toe maʻu ha malanga fakakongokonga konga ʻe tolu “Ke ʻOua Naʻa ʻUliʻi Kitautolu ʻe he . . .” “Manu Fekai,” “Fuʻu Feʻauaki,” mo e “Kau Mesianiti.” ʻI he Sāpaté te tau fanongo ai ki ha malanga fakakongokonga ko hono kaveingá ko e “ʻOfa kia Sihova, ʻIkai ko e Māmaní.” Ko e ngaahi malanga kehé ʻoku kau ai ʻa e “Hokohoko Atu ʻi he Tuʻunga ko e ‘ʻĀunofo mo e Muli,’” mo e “Loto-Toʻa! ʻE Lava Ke Ke Ikunaʻi ʻa e Māmaní.”
3 Hili hono maʻu ha ʻasemipilī fakasēketi ki muí ni, ko ha tuofefine ʻe taha ʻa ia naʻe fakamāmālie ʻi heʻene ngāue fakafaifekaú naʻá ne tohi ʻo pehē naʻe fakatupunga ʻe he polokalamá ke ne toe fakafuofuaʻi ʻa hono ngaahi tuʻungá pea ke ne fakapapauʻi ke “ʻalu ʻi he ngāué pea tuku hono fai ʻa e ngaahi kalofangá!” ʻOku ʻikai ha veiveiua ko e polokalama ʻasemipilī fakasēketi ki he taʻu fakangāue foʻoú te ne tokoniʻi kitautolu kotoa ke tau ʻofa kia Sihova kae ʻikai ki he māmaní. (1 Sione 2:15-17) Fakapapauʻi te ke ʻi ai pea tokanga lelei koeʻuhí ke ke maʻu ʻaonga kakato ai mei he tokonaki ʻofa ko eni ki he kau faifekau Kalisitiané!
[Fehuʻi ki he Ako]
1. Ko e hā e fokotuʻutuʻu foʻou naʻe kamata ʻi he 1938, pea ki he taumuʻa ko e hā?
2. Ko e hā e fakamatala ʻe ʻomai ʻi heʻetau ʻasemipilī fakasēketi ki he taʻu fakangāue foʻoú?
3. Ko e hā e ngaahi ʻaonga ʻe lava ke tau maʻu ʻi hono maʻu ʻa e ʻasemipilī fakasēketí?