Polokalama ʻAsemipilī Fakasēketi Foʻou
ʻI he “ngaahi taimi faingataʻa” ko ení, ʻoku tau fiemaʻu ai ke maʻu ʻa e poto fakaʻotuá pea tauhi maʻu ʻa e hōifua ʻa Sihová. (2 Tim. 3:1) Ko e polokalama ʻasemipilī fakasēketi ki he taʻu fakangāue 2005 ʻe tokonaki mai ai kia kitautolu ʻa e akonaki ʻaonga mo e fakalototoʻa ʻi hono fakatupulekina ʻa e kaveinga ko e “Tataki ʻe he ‘Poto ʻOku mei ʻOlunga.’”—Sem. 3:17.
Ko e ʻuluaki malanga fakakongokongá, “Ko Hono Fakahāhā ʻa e ‘Poto ʻOku mei ʻOlungá’ ʻi Heʻetau Moʻuí,” ʻe tokoniʻi ai kitautolu ke ʻiloʻi ʻa e meʻa ʻoku kau ki he hoko ʻo anga-maʻá, fakamelinó, fakaʻatuʻí pea mo e mateuteu ke talangofuá. ʻE fai leva ʻe he ʻovasia sēketí ʻa e tokanga ki he tafaʻaki kehe ʻe tolu ʻo e poto fakahēvaní. ʻE fakaʻosi ʻe he ʻovasia fakavahé ʻa e ʻuluaki ʻahó ʻaki hono fakahāhā ʻa e founga ʻo e mateuteu ʻa e kau faifekau Kalisitiané, neongo naʻe vakai kia kinautolu ʻa e niʻihi ʻoku nau ‘taʻe kolisi, pea taʻe maʻu tuʻunga’ ke leaʻaki ʻa e poto ʻo e ʻOtuá.—Ng. 4:13.
ʻI he ʻaho hono uá, ʻe tokoniʻi ai kitautolu ʻe ha malanga fakakongokonga kuo fakakaveinga ko e “Tuli ki he Ngaahi Meʻa ʻOku Fakatupu Langa Haké” ke ʻiloʻi pea fakaʻehiʻehi mei he ngaahi meʻa ʻe lava ke ne holoki hifo fakalaumālie kitautolú. ʻE toe fakahaaʻi mai ai kia kitautolu ʻa e founga ʻe lava ke tau langa hake ai ʻa e niʻihi kehé ʻi he ngaahi fakataha fakaefakatahaʻangá, ʻi he malaʻe fakafaifekaú pea ʻi he siakale fakafāmilí. Ko e malanga maʻá e kakaí, ko e “Founga ʻo ʻEtau Maʻu ʻAonga mei he Poto Fakaʻotuá,” te ne fakalolotoʻi ʻetau houngaʻia ki he ngaahi ʻaonga ʻoku tau maʻu ʻi heʻetau ngāueʻaki ʻa e ngaahi tefitoʻi moʻoni fakaʻotuá ʻi heʻetau moʻuí. Ko e malanga fakaʻosí, “Ko e Ngāue ki he Poto Fakaʻotuá ʻOkú Ne Maluʻi Kitautolu,” te ne fakaivimālohiʻi ʻetau fakapapau ke hanga kia Sihova ki ha poto lolotonga ʻa e ngaahi ʻaho fakaʻosi ko ení.
Ko ha meʻa mahuʻinga ʻo e ʻasemipilī kotoa pē ko e papitaiso ʻa e kau ākonga foʻoú. Ko e Ako Fakafaifekau Fakateokalatí mo e Ako Taua Leʻo ki he uiké ʻe toe fakahoko ia ʻi he polokalamá. ʻOku holi ʻa Sihova ke tau maʻu ʻaonga kotoa mei he poto ʻokú ne tokonaki maí. ʻE fakakoloaʻiaʻi fakalaumālie kitautolu ʻe he akonaki mo e fakalototoʻa ʻoku tatali mai kia kitautolu ʻi heʻetau ʻasemipilī fakasēketí.—Pal. 3:13-18.