Polokalama ʻAsemipilī Fakafeituʻu Foʻou

“Tauhi ʻa e Ngaahi Fekau ʻa e ʻOtuá pea Moʻui” ko e kaveinga ia ʻo e polokalama ʻasemipilī fakafeituʻu ʻaho-ua ʻe kamata ʻi Sepitema. (Pal. 4:4) ʻE fakamamafaʻi ai ʻa e ʻuhinga ʻoku ʻikai ke fakakavenga ai ʻa e talangofua ki he ngaahi fekau ʻa e ʻOtuá. ʻIkai ko ia pē, ʻe fakahaaʻi ai ʻa e founga ʻoku ʻomai ai ʻa e fakaivifoʻou mo e fiefia moʻoni ʻi hono fai ʻa e finangalo ʻo e ʻOtuá, pea pehē ki he ʻamanaki ki he kahaʻú.​—Mt. 11:​28-30; Sione 13:17.

Ko e faʻahinga ʻoku nau talangofua ki he fekau ʻa Sīsuú ʻoku nau fakaʻamu ke papitaiso ʻi he ʻasemipilií ʻoku totonu ke nau lea ki he ʻovasia tauhí, pea te ne fai ʻa e ngaahi fokotuʻutuʻu ʻoku fiemaʻú.​—Mt. 28:​19, 20.

ʻE fakamatalaʻi ʻe ha malanga fakakongokonga ʻa e ngaahi founga ʻaonga ʻoku lava ke tau fai ke fakahā ai ʻa e ʻofa ki he ʻOtuá pea mo hotau ngaahi tokouá. (Sione 13:​34, 35; 1 Sione 5:3) ʻE fakakau atu ʻi he polokalamá ʻa e akonaki fakaueʻiloto mei he Sāme 19 mo e 119. Neongo ko e akonaki fakamānavaʻi ʻi he ongo sāme ko ʻení naʻe hiki ia ʻi he ngaahi taʻu ʻe laui afe kuohilí, te tau sio ai ki he founga ʻoku ʻaonga ai ia kiate kitautolu fakafoʻituitui ʻi he ʻaho ní.

Ko e malanga maʻá e kakaí ʻe fai ia ʻe he ʻovasia fakavahé ʻa ia ʻoku fakakaveinga ko e “Manavahē ki he ʻOtuá pea Tauhi ʻEne Ngaahi Fekaú.” (Koh. 12:​13, NW) Ko e malanga fakaʻosi ʻa e ʻovasia fakafeituʻú te ne fakahaaʻi ai ʻa e founga ʻe lava ai ʻa e kau talavoú ke maʻu ʻa e ʻaonga lelei taha ʻo e moʻuí he taimí ni pea mo e ʻuhinga ʻoku lava ai ke nau maʻu ʻa e tuipau ki ha kahaʻu taʻengata. ʻE fakaʻosiʻaki ʻe he ʻovasia fakavahé ʻa e polokalamá ʻaki ʻa hono fakahaaʻi ʻa e ngaahi ʻaonga lahi ʻoku hoko mai mei he moʻuiʻaki “ʻa e lao fakatuʻi” ʻo e ʻofá. (Sem. 2:8) Ko hono moʻoní, ko ha polokalama ʻasemipilī ʻeni ʻe ʻikai ha taha ʻe loto ke tō mei ai!