Polokalama ʻAsemipilī Fakafeituʻu Foʻou
Ko e hā ʻa e ngaahi ʻaonga ʻokú ke maʻu he taimí ni mei he ʻaʻeva mo Sihová? ʻE lava fēfē ke ke talitekeʻi ʻa e fakatauele ke fakaʻatā ʻa e tulimui ki he ngaahi meʻa taʻefakateokalatí ke ne kāsia ʻa e ngaahi meʻa mahuʻinga ʻo e Puleʻangá mei heʻene tuʻunga ʻuluaki ʻi hoʻo moʻuí? (Mt. 6:33) ʻOkú ke ʻiloʻi ʻoku faingataʻa ke fakafaikehekeheʻi ʻa e tonú mei he halá ʻi ha māmani ʻoku ʻai ai ʻa e halá ke hā tonú? (Hep. 5:14) Ko e ngaahi meʻá ni ʻe lāulea ki ai ʻi he ʻasemipilī fakafeituʻu “Maʻu ʻa e ʻAonga he Taimí Ni ʻAki ʻa e ʻAʻeva ʻi he Ngaahi Founga ʻa e ʻOtuá,” ʻo kamata ʻi Sepitema 1999.—Sāme 128:1.
Ko ha tafaʻaki foʻou ʻi he Tokonaki ʻo e ʻasemipilī fakafeituʻu ko ʻení ʻe fakahoko ai ha sīpinga Fakataha Ngāue. ʻE fakahā atu ʻe hoʻo ʻovasia fakafeituʻú ki he ngaahi fakatahaʻangá ʻa e meʻa ʻoku palani ki aí koeʻuhi ke lava ʻa e tokotaha kotoa pē ʻo haʻu kuo ʻosi teuteu ke fiefia kakato ʻi he polokalamá.
Ko e konga ʻoku fakakaveinga ko e “Kau Tāimuʻa—Tokanga Fakamātoato ki he Anga Hoʻomou Laká” ʻe fakahā mai ai kiate kitautolu ʻa e founga ke tau ngāueʻi ai ʻa e poto mo e fakapotopoto koeʻuhí ke tau lamalama ai ʻa e taimi faingamālie ki he ngāue fakafaifekau tāimuʻá. (Ef. 5:15-17) Ko e kaveinga “Tokanga ki he Ngaahi Founga Ko Ia ʻOku Hā Ngali Mātuʻaki Tonú” te ne akoʻi kitautolu ki he founga ke fakapapauʻi ai ʻa e meʻa ʻoku fakahōifua ki he ʻOtuá ʻi he tafaʻaki kotoa pē ʻo e moʻuí. Ko e malanga “Founga ʻOku Uesia Ai Kitautolu ʻe he Kikite Kuo ʻOsi Fakahokó” ʻe tokoni ia ke fakafonu hotau ʻatamaí mo e lotó ʻaki ha ʻofa ki he Folofola ʻa e ʻOtuá. Ko e malanga maʻá e kakaí “Ngaahi Founga ʻa e ʻOtuá—He Mātuʻaki ʻAonga Ē!” ʻe fakamamafaʻi ai ʻa e ngaahi ʻaonga ʻoku tau maʻu he taimí ni mei he hanganaki tauhi ʻo fehoanaki mo e ngaahi fiemaʻu māʻoniʻoni ʻa Sihová.
Ko hoʻo holí ia ke fakahāhaaʻi ki he kakaí ʻaki ʻa e papitaiso ʻi he vaí ʻokú ke loto ke ʻaʻeva ʻi he ngaahi founga ʻa e ʻOtuá ʻi he tuʻunga ko ha tokotaha ʻo ʻene kau sevāniti fakatapuí? Peʻi lea leva ki he ʻovasia tauhí koeʻuhi ke malava ke fai ʻa e ngaahi fokotuʻutuʻu ʻoku fiemaʻú.
ʻAi ko hoʻo fakapapaú ia ke ʻoua naʻá ke tō ʻi he ʻasemipilī fakafeituʻu taimi tonu ko ʻení. ʻAi ke ke ʻi ai ʻi he kotoa ʻo e polokalama ʻaho ʻe uá, he ʻoku “monuʻiaa ka ko ia fulipe ʻoku ʻapasia kia Sihova, ʻo foua hono ngaahi ʻalunga.”—Sāme 128:1.