Polokalama ʻAsemipilī Fakafeituʻu Foʻou

“Nofoʻaki Tali ki he Hoko Mai ʻa e ʻAho ʻo e ʻOtuá” ko e kaveinga ia ʻo e ʻaho ʻe ua ʻo e polokalama ʻasemipilī fakafeituʻú ʻa ia ʻe kamata ʻi Sepitema. (2 Pita 3:12) ʻOku faʻufaʻu iá ke ne langaʻi ʻetau ongoʻi ʻa e fakavavevavé. Ko e kau nofo ʻi he māmaní ʻe vavé ni ke nau hokosia ʻa e fakamaau ʻa Sihová. Ko hai ʻe hao moʻui atu ʻi he “ʻaho lahi ʻo e ʻOtua Aoniu”? Ko e faʻahinga pē te nau nofo maʻu ʻo ʻāʻā fakalaumālié pea ʻoku nau fokotuʻu maʻu ʻa e sīpinga moʻui ʻo e “toʻonga maʻoniʻoni mo e lotu moʻoni.”​—Fkh. 16:14; 2 Pita 3:11.

Ko e papitaisó ʻoku mātuʻaki fiemaʻu ia ki ha taha ke hao moʻui atu ʻi he ʻaho ʻo Sihová. (1 Pita 3:21) Ko e kau malanga ʻoku nau loto ke papitaiso ʻi he ʻasemipilií ʻoku totonu ke nau tala ki he ʻovasia tauhí, ʻa ia te ne fai ha ngaahi fokotuʻutuʻu ʻoku fiemaʻu.

Ko ha malanga fakakongokonga konga fā, “Ko e Faʻahinga Tokotaha ʻOku Totonu ke Tau Hoko ki Aí,” ʻe fakahaaʻi mahino ai ʻa e faʻahinga ngāue ʻoku kau ki ai ʻa e tauhi maʻu ʻi he fakakaukaú ʻa e hoko mai ʻa e ʻaho ʻo Sihová. Ko e malanga maʻá e kakaí, “Ngāue Fakapotopoto Koeʻuhi ʻOku Ofi ʻa e ʻAho ʻo Sihová,” ʻe fakamatalaʻi ai ʻa e meʻa ʻoku ʻuhinga ki ai ʻa e ‘vivili kia Sihová, ki he faitotonú, pea mo e anga vaivaí,’ koeʻuhi ke tau hoko ko ha kau hao moʻui atu.​—Sef. 2:3.

ʻE fakaʻosiʻaki ʻa e ʻasemipilī fakafeituʻú ʻa e ongo malanga fakaueʻiloto ʻe ua ʻa ia ʻe fai ʻe he ongo ʻovasia fefonongaʻakí, ʻoku fakakaveinga: “ʻOku Fakatefito Takatakai ʻa Hoʻo Moʻuí ʻi he Moʻoní?” mo e “Palani Ki Muʻa Fakataha mo e Fakakaukau ki he ʻAho ʻo Sihová.” Ko e ongo malanga ko ʻení te na ueʻi kitautolu ke tau sivisiviʻi ʻetau moʻuí pea fai ha feʻunuʻaki pē ʻoku fiemaʻú. ʻOku fakahaaʻi mahino ʻe he kikite ʻa e Tohitapú mo e ngaahi meʻa ʻoku hoko ʻi he māmaní ʻoku ofi ʻa e ʻaho ʻo Sihová. ʻE fakalototoʻaʻi kitautolu ʻe he polokalama ʻasemipilī ko ʻení ke tau ‘laka fakaʻehiʻehi, pea tau ʻā.’ (1 Pita 5:8) Fai ha ngaahi palani pau ke ke maʻu ʻa e ongo ʻahó fakatouʻosi.