Maluʻi Ho ʻAtamaí
1. Ko e hā ʻa e kaveinga ʻo e ʻasemipilī fakasēketi ki he taʻu fakangāue 2013, pea ko e hā ʻa e taumuʻa ʻo e polokalamá?
1 Naʻe fakahinohino ʻa Sīsū ki heʻene kau ākongá ke nau ʻofa kia Sihova ʻaki honau lotó, moʻuí, mo e ʻatamaí kotoa. (Māt. 22:37, 38) Ko e ngaahi fakataha-lahi ʻi he taʻu ní mo e ngaahi ʻasemipilī fakasēketí kuo faʻufaʻu ia ke tokoniʻi kitautolu ke tau fakaivimālohiʻi ʻa hotau tangata ʻi lotó. Hangē ko ia te ke manatuʻí, ko e kaveinga ʻo ʻetau fakataha-lahi fakavahé ko e “Maluʻi Ho Lotó!” Ko e polokalama ʻaho ʻasemipilī makehe ki he taʻu fakangāue 2013 ko hono kaveinga ko e “Maluʻi Ho Konisēnisí.” Pea ko e ngaahi ʻasemipilī fakasēketi hokohoko ʻe kamata he māhina kahaʻú ʻe fakaeʻa ai ʻa e kaveinga ko e “Maluʻi Ho ʻAtamaí,” makatuʻunga ʻi he Mātiu 22:37. Ko e polokalamá ni ʻoku faʻufaʻu iá ke tokoniʻi kitautolu taki taha ke tau ʻanalaiso ʻetau ngaahi fakakaukaú tonu fakataha mo ha fakakaukau ke ʻai ia ke toe fakahōifua ange kia Sihova.
2. ʻOku totonu ke tau kumi ki he ngaahi tali ki he ngaahi fehuʻi ko e hā lolotonga ʻa e polokalamá?
2 Ko e Meʻa ʻE Fakahoko Maí: ʻI heʻetau fanongo ki he ʻasemipilī fakasēketí, ʻoku totonu ke tau kumi ki he ngaahi tali ki he ngaahi fehuʻi ko ení, ʻa ia ʻoku fakafofongaʻi ai ʻa e ngaahi poini tefitó:
• ʻE lava fēfē ke tau fakaʻehiʻehi mei he fakakaukau ʻaki ʻa e ‘ngaahi fakakaukau ʻa e tangatá’?
• ʻE lava fēfē ke tau tokoni ki hono toʻo ʻa e pulonga ʻokú ne fakakuihi ʻa e ʻatamai ʻo e kau taʻetuí?
• Ko e hā ʻa e tōʻonga fakaefakakaukau ʻoku tau loto ke maʻú?
• Ko e hā ʻa e ngaahi ʻaonga ʻo e fakalaulauloto totonú?
• ʻE lava fēfē ke tau fakaʻatā ʻa Sihova ke ne fakafuo ʻetau fakakaukaú?
• ʻE lava fēfē ke tokoni ʻa e ngaahi husepānití, ngaahi uaifí, ngaahi mātuʻá, mo e fānaú ki he fiefia ʻa e fāmilí?
• ʻE lava fēfē ke tau mateuteu ki he ʻaho ʻo Sihová?
• ʻOku ʻuhinga ki he hā ʻa e ʻai ke tuʻu mateuteu ʻa hotau ʻatamaí ki he ngāué?
• Ko e hā ʻa e ʻaonga ʻoku hoko ki he faʻahinga ko ia ʻoku nau ngāueʻaki ʻa e meʻa ʻoku nau akó?
3. Ko e hā ʻoku mahuʻinga ai ke tau maʻu fakatouʻosi ʻa e ongo ʻahó, fanongo lelei, pea ngāueʻaki ʻa e meʻa ʻoku tau akó?
3 ʻOku faitau ʻa Sētane mo hotau ʻatamaí pea ʻokú ne feinga ke fakameleʻi ia. (2 Kol. 11:3) Ko ia ai, kuo pau ke tau maluʻi hotau ʻatamaí pea mapuleʻi ʻetau ngaahi fakakaukaú. ʻOku fiemaʻu ke tau hokohoko atu ʻa hono tapua atu ʻa e ʻatamai ʻo Kalaisí pea tauʻi ʻa e ngaahi tākiekina ʻa e māmani maumau-lao ko ení. (1 Kol. 2:16) Ko ia ai, fai ha ngaahi fokotuʻutuʻu ke maʻu fakatouʻosi ʻa e ongo ʻaho ʻo e ʻasemipilī fakasēketí. Tokanga lelei. Ko hono ngāueʻaki ʻa e fakahinohino mātuʻaki mahuʻinga ʻoku fakahoko maí ʻe tokoniʻi ai kitautolu ke tau ʻai ke tuʻu mateuteu ʻa hotau ʻatamaí ki he ngāue faivelenga ʻo e Puleʻangá.—1 Pita 1:13.