Ko e Polokalama Foʻou ki he Fakataha Fakafeituʻú
1 ʻI he talangofua ki he ngaahi lea ʻa Sīsū ʻia Mātiu 6:33 (PM), kuo ʻai maʻu pē ʻe he kau Kalisitiane moʻoní ke fakamuʻomuʻa ʻa e Puleʻangá ʻi heʻenau moʻui. Ko ia, “Fuofua Kumi ae Buleaga” ko e kaveinga feʻungamālie ia ki he polokalama ʻo e fakataha fakafeituʻu ʻa ia ʻe kamata ʻi Sepitema 1993.
2 Mei he kamata ʻo e polokalamá ʻe fakaeʻa mahino ai ko e Puleʻangá ko e meʻa moʻoni, ʻo fakamamafaʻi ko ha founga-pule ʻoku lolotonga ngāue pea ʻoku ʻi ai ha feituʻu ʻokú ne pule ki ai, ʻoku ʻi ai hono kau pule, mo e kakai ʻoku pule ki ai mo hono ngaahi lao. Ko hono moʻoní, ko e lahi ʻo e ngaahi lao ʻo e ngaahi founga-pule ʻo e faʻahinga ʻo e tangatá ʻa ia ʻoku ʻaonga ki he kakaí ʻi he ʻahó ni ʻoku fakatuʻunga ʻi he ngaahi lao ʻa e Tohitapú.
3 ʻE fai ʻa e fakamatala ki he ngaahi tāpuaki mo e maluʻi ʻoku tau maʻu mei hono ʻai ʻa e Puleʻangá ke fakamuʻomuʻa ʻi he tafaʻaki kotoa pē ʻo ʻetau moʻuí. ʻE ʻomai heni ʻa e akonaki fakatupu tokoni ke fakahā pe ʻe lava fēfē ke tau fakaʻehiʻehi mei he loto-hohaʻa ʻoku taʻeʻuhingá. ʻE fakahā ʻe he ngaahi malanga, ngaahi fakahāhā, mo e ngaahi fetalanoaʻaki pe ko e hā ʻoku fuʻu mahuʻinga ai ke tauhi maʻu ke tau fiemālie pē ʻi he meʻa ʻoku tau maʻú.
4 ʻI he ʻaho Tokonaki ʻo e fakatahá, ʻe lava ai ʻe he kau teu papitaiso kuo taaú ke nau fakahāhā ʻenau fakatapui kia Sihová. Pea ʻi he ʻaho Sāpaté, ko e kotoa ʻo kitautolu ʻoku totonu ke tau ʻi ai ʻo fanongo ki he malanga fakahāhā, ko hono kaveingá “Ko e Meʻa ʻE Fai ʻe he Puleʻanga ʻo e ʻOtuá Maʻá e Faʻahinga ʻo e Tangatá.”
5 ʻAi ke fakapapauʻi hoʻo fokotuʻutuʻu ke ke maʻu ʻa e fakataha fakafeituʻú fakatouʻosi ʻi he ʻaho ʻe ua ʻe fai aí. Tānaki atu ki he polokalama ʻo e fakatahá, ko e feohi mo e ngaahi tokouá te ne tokonaki mai ʻa e fakalototoʻa fakatupu langa hake mo e fakafoʻou ʻa ia ʻoku ʻikai ke ʻi ai ha taha ʻiate kitautolu te ne loto ke liʻaki ia.