Ko e Polokalama Fakataha Fakafeituʻu Foʻou
1 Ko e kaveinga ʻe fakatupulekina ʻi he polokalama ʻo e fakataha fakafeituʻu foʻou ʻe kamata ʻi Sēpitemá ko e “ʻĀ ʻo Leʻo, Tuʻu Maʻu, Tupu ʻo Mālohi.” ʻOku fakatuʻunga ia ʻi he ngaahi lea fakalototoʻa ʻa e ʻaposetolo ko Paulá ki he kau Kalisitiane ʻi he ʻuluaki senitulí kuo hiki ʻi he 1 Kolinitō 16:13.
2 ʻE kamata ʻa e polokalamá ʻaki hono fakaeʻa ʻa hono fie maʻu ai pē kiate kitautolu ke tau sivisiviʻi fakalaumālie ʻe kitautolu ʻa kitautolu pē. Ko hono tauhi maʻu ʻa e pipiki mālohi ki he meʻa ʻoku totonú ʻi he “kuonga fakamui” ni ʻoku fie maʻu ki ai ha fakamahuʻingaʻi moʻoni ʻa hotau vahaʻangatae mo Sihová pea mo e anga ʻo ʻetau tuʻu mo ʻene kautaha ʻi māmaní. (2 Tīm. 3:1) ʻE fakamanatu ai kiate kitautolu ʻa e houngaʻia ʻa e ʻOtuá ki heʻetau ngāue lahi kotoa pē. ʻOku fie maʻu kiate kitautolu ha fakahinohino ʻi ha ngaahi founga ke fakaleleiʻi ange ai ʻa hotau ngaahi ʻulungāanga faka-Kalisitiané mo tauhi maʻu ʻa e ʻulungāanga alafaʻifaʻitakiʻangá.
3 ʻE toe fakamamafaʻi foki mo e fie maʻu kiate kitautolu ke tau faivelenga ʻi he ngāue ngaohi ākongá mo kakapa atu ki he fakalakalaka fakalaumālie mo e fatongia. ʻE fakaeʻa foki ʻi he ngaahi malanga kehekehe, ngaahi fakahāhā, mo e ngaahi fetalanoaʻaki, ʻa e ngaahi fokotuʻu ʻaonga ki he anga ʻo hono tauhi maʻu ʻo e polokalama fafanga fakalaumālie fakafoʻituitui pea pehē ki he ngaahi fāmilí.
4 ʻI he Tokonakí ʻe malava ke fakahāhā ai ʻe he faʻahinga kuo taau ke papitaisó ʻa ʻenau fakatapuí ʻaki ʻa e papitaiso ʻi he vai. Pea ʻi he Sāpaté, te tau loto hono kotoa ke tau ʻi he malanga fakahāhā, kuo fakakaveinga “ʻOku Anga-Fēfē Ho Tuʻunga Ki He ʻOtuá?”
5 ʻE fakaʻosi ʻaki ʻa e polokalamá ʻa e fakalototoʻa ke tau tuʻu maʻu ʻi he tui, feangainga maʻu ai pē ʻi he loto ʻofa mo e melino. Ko e fakataha fakafeituʻú ko e taha ia ʻo e ngaahi faingamālie makehe kuo tokonaki mai ʻe Sihova kiate kitautolu hono kotoa ke ‘fefakaʻaiʻai ʻaki ai ʻa e ʻofa mo e ngaahi ngāue lelei.’ (Hep. 10:24, 25) Fai ha ngaahi palani pau ke ke ʻi ai ʻi he polokalamá kakato ʻi he ongo ʻahó fakatouʻosi.