Fakahāhā ʻa e Mahuʻingaʻia Anga-ʻOfa ki he “Tamai Mate”

¹ Ko Sihová ko e “tamai ki he tamai mate.” (Sāme 68:5) Ko ʻene tokanga ki heʻenau leleí ʻoku tapua mai ia ʻi he fekau ko eni naʻá ne ʻoange ki he puleʻanga ʻo ʻIsileli ʻi he kuonga muʻá: “ʻIlonga ha uitou, pe fanau tamai-mate, ʻe ʻikai te mou fakamamahiʻi kinautolu. Kapau te mou momoʻi fai fakamamahi ki ai, ʻio ka momoʻi tangi ʻe ia kiate au, te u matuʻaki ongoʻi ʻenau tangi.” (Eki. 22:​22, 23) Naʻe toe fakakau ʻi he Lao ʻa e ʻOtuá ʻa e fokotuʻutuʻu ke tokoniʻi ʻa e faʻahinga peheé ʻi heʻenau ngaahi fiemaʻu fakamatelié. (Teu. 24:​19-​21) ʻI he malumalu ʻo e fokotuʻutuʻu faka-Kalisitiané, ʻoku naʻinaʻi ai ki he kau lotu moʻoní ke “aʻahi ki he faʻahinga matuʻamate mo e kau uitou ʻi heʻenau mamahi.” (Sem. 1:27) ʻE lava fēfē ke tau faʻifaʻitaki ki he mahuʻingaʻia anga-ʻofa ʻa Sihova ʻi he faʻahinga ʻoku tupu hake ʻi ha mātuʻa-taʻehoá pe ʻi he ngaahi fāmili māvahevahe fakalotú?

² Akoʻi Fakalaumālie: Kapau ko ha mātuʻa taʻehoa koe pe ʻokú ke maʻu ha hoa taʻetui, ko hono fai ha ako Tohitapu tuʻumaʻu ʻi ʻapi mo hoʻo fānaú ʻe faingataʻa nai. Ka ko ha ako Tohitapu tuʻumaʻu mohu ʻuhinga ʻoku ʻikai ala tuku ia kapau ʻoku fiemaʻu ke nau tupu hake ʻo hoko ko e kakai lalahi mafamafatatau mo matuʻotuʻa. (Pal. 22:6) Ko hono fai ha fetalanoaʻaki fakaʻaho mo kinautolu fekauʻaki mo e ngaahi meʻa fakalaumālié ʻoku toe mātuʻaki mahuʻinga ia. (Teu. 6:​6-9) ʻI he taimi ʻe niʻihi, te ke ongoʻi loto-siʻi nai ai, kae ʻoua ʻe foʻí. Hanga kia Sihova ki ha mālohi mo ha tataki ʻi hoʻo “tauhi hake [hoʻo fānaú] ʻi he akonaki mo e fakatonutonu-fakaʻatamai ʻa Sihová.”—Ef. 6:​4, NW.

³ Kapau ʻokú ke fiemaʻu ha tokoni ki hono tokangaʻi ho ngaahi fatongia Fakatohitapú, ʻai hoʻo ngaahi fiemaʻú ke ʻiloʻi ʻe he kau mātuʻá. Te nau malava nai ke fai ha ngaahi fokotuʻu ʻaonga pe tokoniʻi koe ʻi hono fokotuʻu ha founga-tuʻumaʻu lelei fakalaumālie ki ho fāmilí.

⁴ Founga ʻe Lava ke Tokoni Ai ʻa e Niʻihi Kehé: ʻI he ʻuluaki senitulí, naʻe hoko ai ʻa Tīmote ko ha sevāniti faivelenga ʻa Sihova neongo ʻa ʻene tupu hake ʻi ha fāmili māvahevahe fakalotú. Ko e ngaahi feinga tōtōivi ʻa ʻene faʻeé mo ʻene kui-fefiné ke akoʻi kiate ia ʻa e ngaahi tohi māʻoniʻoní ʻi heʻene kei siʻí ʻoku ʻikai ha veiveiua ʻa ʻene fakahoko ha ngafa mahuʻingá. (Ng. 16:​1, 2; 2 Tim. 1:5; 3:​15) Kae kehe, naʻá ne toe maʻu ʻaonga foki mei he feohi mo e kau Kalisitiane kehé, ʻo kau ai ʻa e ʻapositolo ko Paulá, ʻa ia naʻá ne lave kia Tīmote ‘ko hono foha ʻoku ʻofa ai, pea ko e tōnunga ʻi he ngaue ʻa e ʻEikí.’—1 Kol. 4:17.

⁵ ʻOku pehē pē ʻi he ʻahó ni, he meʻa ʻaonga ē ko e mahuʻingaʻia anga-ʻofa ʻa e fanga tokoua mo e fanga tuofāfine matuʻotuʻa fakalaumālié ʻi he tamaiki tangata mo e tamaiki fefine tamai-mate ʻi he fakatahaʻangá! ʻOkú ke ʻiloʻi ʻa e hingoa ʻo e tokotaha taki taha? ʻOkú ke talanoa mo kinautolu ʻi he ngaahi fakataha faka-Kalisitiané pea ʻi he ngaahi taimi kehé? Fakaafeʻi kinautolu ke kau fakataha mo koe ʻi he malaʻe fakafaifekaú. Mahalo pē ʻe lava ke ke fakakau kinautolu ʻi he taimi ki he taimi, fakataha mo ʻenau mātuʻa-taʻehoá pe mātuʻa tuí, ʻi hoʻo ako fakafāmilí pe ʻi he ngaahi fokotuʻutuʻu ki he fakafiefia leleí. ʻI he vakai kiate koe ʻa e faʻahinga kei siʻi ko ení ko honau kaumeʻá, ʻoku ngalingali lahi ange ai ke nau faʻifaʻitaki ki hoʻo faʻifaʻitakiʻangá mo e fakalototoʻá.​—Fili. 2:4.

⁶ ʻOku mahuʻingaʻia lahi ʻa Sihova ʻi he tamaiki tangata mo e tamaiki fefine tamai-maté, pea ʻokú ne tāpuakiʻi ʻetau ngaahi feinga anga-ʻofa ke tokoniʻi kinautolu ke nau ʻai ʻa e moʻoní ko ʻenau meʻá. Ko e tokolahi naʻa nau tupu hake ʻi ha mātuʻa-taʻehoá pe ngaahi fāmili māvahevahé naʻa nau maʻu ʻa e fakalototoʻa ko iá pea ʻoku nau ngāue loto-tōnunga he taimí ni ko e kau tāimuʻa, kau sevāniti fakafaifekau, kau mātuʻa, kau ʻovasia fefonongaʻaki, kau misinale, pe kau mēmipa ʻo e fāmili Pētelí. ʻOfa ke tau kumi kotoa ki ha ngaahi founga ke “fano [atu]” ʻi heʻetau ʻofa ki he faʻahinga tamai-maté, ʻi he faʻifaʻitaki ki heʻetau Tamai fakahēvaní.​—2 Kol. 6:​11-​13.