Ko e Faifakamoʻoni Fakakulupú ʻOku ʻOmai Ai ʻa e Fiefia
1 ʻI hono fekauʻi atu ʻa e kau ākonga ʻe toko 70 ke malangá, naʻe fakahinohinoʻi kinautolu ʻe Sīsū ki he meʻa ke nau leaʻakí, fokotuʻutuʻu maau kinautolu ʻi he ngaahi timi tautau toko ua, pea fakahinohino kinautolu ki he feituʻu ke nau ngāueʻí. Naʻe tokoni eni ki he fiefia naʻa nau hokosiá. (Luke 10:1-17) ʻI he founga tatau he ʻahó ni, ko e faifakamoʻoni fakakulupú ʻoku tokoni ia ke teuʻi, fokotuʻutuʻu maau, pea fakalototoʻaʻi ai ʻa e kakai ʻa e ʻOtuá ki he ngāue fakamalangá.
2 Takimuʻa ʻa e Kau Mātuʻá: ʻOku fakahoko ʻe he kau mātuʻá ha ngafa mātuʻaki mahuʻinga ʻi hono tokoniʻi ʻa e tokotaha kotoa ke nau kau tuʻumaʻu ʻi he ngāue fakamalangá. ʻOku takimuʻa ʻa e ʻovasia ngāué ʻi hono fai ʻa e ngaahi fokotuʻutuʻu ki he ngāue ʻi he lolotonga ʻa e uiké. Ko e ʻovasia ako tohi taki taha ʻoku fakafatongiaʻaki ki hono fokotuʻutuʻu ʻa e ngāue ki heʻene kulupú, tautefito ʻi he fakaʻosinga ʻo e uiké. ʻI he ngaahi taimi ʻoku fakataha ai ʻa e fakatahaʻangá fakakātoa ki he malaʻe ngāué, hangē ko ia ʻi he hili ʻa e Ako Taua Leʻo, ko e ʻovasia ako tohi taki taha ʻoku totonu ke ne tokangaʻi ʻa e ngaahi fiemaʻu ʻa ʻene kulupú tonu.
3 “Tāu mo Māu”: Ko e tokotaha kuo vaheʻi ke ne fai ʻa e fakataha ki he malaʻe ngāué ʻoku totonu ke ne kamata taimi totonu pea fakangatangata ʻa e fakatahá ki he miniti ʻe 10 pe 15. ʻOku lelei taha ke ne fokotuʻutuʻu ʻa e ngaahi kulupu faifakamoʻoní pea vaheʻi ʻa e feituʻú (tuku kehe kapau ʻe tokangaʻi eni ʻe he kau ʻovasia ako tohí, hangē ko ia naʻe fakahaaʻi ki muʻá) ki muʻa ke fakaʻosiʻaki ʻa e lotú. ʻOku fakasiʻisiʻi heni ʻa e fiemaʻu ki he kau malangá ke nau fakatahataha ʻi he feituʻú, ʻa ia ʻe lava ke toʻo ai ʻa e ngeia ʻo ʻetau ngāué. ʻOku toe fehoanaki ia mo e akonaki ʻa Paulá: “Ko e meʻa kotoa pe ke fai ke tāu mo māu.” (1 Kol. 14:40) Ko e faʻahinga kotoa ʻoku nau kau ki he ngaahi fakataha ko ení ʻoku totonu ke nau pouaki ʻa e lavameʻa ʻo e fokotuʻutuʻú ʻaki ʻa e aʻu ki ai ʻi he taimí, ngāue kakato fāitaha mo e tokotaha ʻokú ne tatakí, pea mavahe leva ki he feituʻú ʻi hono fakaʻatā pē ʻa e kulupú.
4 Tohoakiʻi Fakatahataha ʻi he Fāʻūtaha: Ko e ngaahi fokotuʻutuʻu faifakamoʻoni fakakulupú ʻoku ʻomai ai ha faingamālie lelei ʻaupito kia kitautolu ke tau hoko ʻo ʻiloʻi ai ʻa e niʻihi kehe ʻi he fakatahaʻangá. Lolotonga ʻoku ʻikai ha fakafepaki ki he fokotuʻutuʻu ki muʻa ke ngāue mo ha tahá, ʻe toe lava ke lelei kia kitautolu ke kau ki he ngaahi fakataha ki he malaʻe ngāué ʻo ʻikai fai ha ngaahi fokotuʻutuʻu ki muʻa. ʻE vaheʻi nai ai kitautolu ke ngāue mo ha taha ʻoku ʻikai te tau ʻiloʻi lelei, ʻo ʻai ai ke tau malava ʻo “fano” atu ʻi heʻetau ʻofá.—2 Kol. 6:11-13.
5 Ko e faifakamoʻoni fakakulupú ʻoku fakalototoʻaʻi ai kitautolu pea tohoakiʻi fakatahataha ai kitautolu ko e ‘kaungāngaue ki he moʻoní.’ (3 Sione 8) ʻOfa ke tau kau kakato ki ai!