Hanganaki Talanoa Fekauʻaki mo e Ngaahi Ngāue Fakaofo ʻa Sihová

1. Ko e hā ʻa e niʻihi ʻo e ngaahi ngāue fakaofo ʻa Sihova ʻokú ke fakamahuʻingaʻi tefitó?

¹ ʻOku ʻikai lava ke fakahoa ha taha ki hotau ʻOtua lahi ko Sihová! Naʻe tohi ʻe Tēvita: “E Jihova ko hoku Otua, oku lahi hoo gaahi gaue fakaofo aia kuo ke fai, mo ho finagalo lelei kiate kimautolu: e ikai faa lau fakaholo [pe fakahoa] ia kiate koe.” (Sāme 40:​5, PM) Ko e ngaahi ngāue fakaofo ʻa Sihová ʻoku kau ai ʻa e fakatupu ʻo e ʻunivēsí, ko e Puleʻanga Faka-Mīsaiá, ngaahi ngāue ʻo e ʻaloʻofa ki hono kakaí pea mo e feingangāue fakamalanga ʻi māmani lahí. (Sāme 17:​7, 8; 139:14; Tan. 2:​44; Mt. 24:14) Ko e ʻofa kia Sihova mo e houngaʻia ki he meʻa kotoa kuó ne faí ʻokú ne ueʻi kitautolu ke tau talanoa ai ki he niʻihi kehé fekauʻaki mo ia. (Sāme 145:​5-7) Lolotonga ʻa Maʻasi, ʻEpeleli mo Meé, te tau maʻu ai ʻa e faingamālie ke fai ke kakato ange ai eni.

2. ʻOku anga-fēfē ʻetau maʻu ʻaonga fakafoʻituitui ʻi he tāimuʻa tokoní?

² ʻI he Tuʻunga ko ha Tāimuʻa Tokoni: ʻE lava ke ke fokotuʻutuʻu hoʻo taimi-tēpilé ke fakamoleki ha houa ʻe 50 ʻi he ngāue fakafaifekaú lolotonga ʻa e taha pe lahi ange ʻo e ngaahi māhina ʻo e ngāue makehe ko ení? ʻE tuha moʻoni ia mo ha ngaahi feʻunuʻaki pē ʻokú ke fai ʻi hoʻo founga-tuʻumaʻú. (Ef. 5:​16) Kuo ʻiloʻi ʻe he tokolahi ʻoku tokoniʻi kinautolu ʻe he tāimuʻa tokoní ke fakaleleiʻi ʻa e tuʻunga ʻo ʻenau ngāue fakafaifekaú. ʻOku nau hoko ai ʻo fiemālie ange ʻi he matapaá pea ngāueʻaki lahi ange ai ʻa e Tohi Tapú. Ko hono fakamoleki ʻa e taimi lahi ange ʻi he ngāue fakafaifekaú ʻoku ʻai ai ke faingofua ʻa e toe ʻaʻahi ki ha mahuʻingaʻia pē ʻoku nau maʻu, pea ko e niʻihi naʻe ʻikai te nau fai ha ako Tohi Tapu ki muʻá kuo nau kamata ha ako ʻi he lolotonga ʻa e tāimuʻa tokoní. Koeʻuhi ko e tāimuʻa tokoní ʻoku kau ki ai ʻa e feinga ke tau ngāue maʻá e niʻihi kehé, ko ha ngāue fakafiefia ia.​—Ng. 20:35.

3. Kuo anga-fēfē ʻa e malava ʻa e niʻihi ke tāimuʻa tokoni naʻa mo e ʻi he ngaahi tuʻunga faingataʻá?

³ ʻOua ʻe vave ke fakaʻosiʻaki ʻoku ʻikai fakaʻatā koe ʻe ho ngaahi tuʻungá ke ke kau. Ko ha toko taha mātuʻa ʻe taha ʻa ia naʻe tāimuʻa tokoni ʻi he taʻu kuo ʻosí ʻoku ʻi ai ʻene fānau ʻe toko ua mo ha ngāue taimi-kakato. Naʻe anga-fēfē hono fai ia ʻe he tokoua femoʻuekina ko ení? Koeʻuhi ʻokú ne ngāue he lolotonga ʻo e uiké, naʻá ne palani ʻa e ngaahi ʻaho lōloa ʻi he ngāué ʻi he ngaahi fakaʻosinga uiké, ʻo kamataʻaki ʻa e fakamoʻoni ʻi he halá ʻi he 7:00 pongipongi ʻi he ngaahi ʻaho Tokonakí. Ko e niʻihi ʻi he fakatahaʻangá ʻa ia naʻa nau maʻu ʻa e ngaahi tuʻunga meimei tataú naʻa nau toe tāimuʻa, pea naʻa nau fepoupouaki mo fefakalototoʻaʻaki. ʻI ha fakatahaʻanga ʻe taha, naʻe fili ai ha tuofefine taʻu 99 ke tāimuʻa ʻi Mē hili hono fakaafeʻi ia ʻe heʻene taʻahiné ke ne kau fakataha mo ia. Naʻe tokoniʻi ʻe he niʻihi kehe ʻi he fakatahaʻangá ʻa e tuofefine taʻumotuʻa ko ení ke ʻalu ʻi he matapā ki he matapā pea ʻi he ngaahi ako Tohi Tapú ʻaki hono teke ʻa hono salioté. Naʻá ne toe kau ʻi he faifakamoʻoni ʻi he telefoní, faifakamoʻoni he halá pea mo e faitohí. ʻOkú ne tuipau naʻe fai eni, ʻo ʻikai ʻi hono mālohi ʻoʻoná, ka ʻi he tokoni pē ʻa Sihová.​—Ai. 40:​29-​31.

4. Ko e hā ʻa e ngaahi meʻa tefito te tau fakakaukau nai ki ai ʻi hono ʻai ha taimi-tēpile ki he tāimuʻa tokoní?

⁴ ʻAhiʻahi hiki ha taimi-tēpile ʻa ia ʻoku feʻungamālie taha mo ho ngaahi tuʻungá. Ko e sīpinga ʻo e ngaahi taimi-tēpile ʻi he ʻīsiu ko ení ʻe ʻaonga nai. ʻOkú ke ngāue taimi-kakato pe ako? Ko ha taimi-tēpile ʻa ia ʻoku ngāueʻaki tefito ai ʻa e ngaahi fakaʻosinga uiké ʻe ʻaonga taha nai kiate koé. Kapau ʻokú ke mahamahaki pea ʻoku ʻikai fakaʻatā ʻe ho iví ha ngaahi ʻaho lōloa ʻi he ngāue fakafaifekaú, ko ha taimi-tēpile nai ʻe lelei tahá ʻa ē ʻoku fiemaʻu ai hono fakamoleki ha kiʻi taimi siʻisiʻi ʻi he ʻaho taki taha. Talanoa mo e niʻihi kehé fekauʻaki mo hoʻo holi ke tāimuʻa tokoní. Mahalo pē te nau toe ʻai ia ko ʻenau taumuʻa.

5. Ko e hā ʻa e ngaahi taumuʻa ʻe lava ke fokotuʻu ʻe he toʻutupú ki Maʻasi, ʻEpeleli mo Mē?

⁵ Ngaahi Founga ʻe Lava ke Kau Ai ʻa e Toʻutupú: ʻOku hōifua ʻa Sihova ʻi he taimi ʻoku talanoa ai ʻa e fānaú fekauʻaki mo ʻene ngaahi ngāue fakaofó. (Sāme 71:17; Mt. 21:16) Kapau ʻokú ke kei siʻi pea ʻosi papitaiso, mahalo pē ʻe lava ke ke tāimuʻa tokoni lolotonga ha māhina ʻa ia ʻoku kau ai ha tutuku ʻa e akó. Kapau ʻoku ʻikai lava ke ke ngāue ko ha tāimuʻa tokoni, ʻe lava ke ke fokotuʻu ha ngaahi taumuʻa pau ke fakalahi atu ai hoʻo kaú mo fakaleleiʻi ʻa e tuʻunga ʻo hoʻo ngāue fakafaifekaú lolotonga ʻa e ngaahi māhina ko ení? Kapau kuó ke kau ʻi he ngāue fakafaifekaú mo hoʻo ongo mātuʻá ka ʻoku teʻeki ai ke ke hoko ko ha toko taha malanga teʻeki papitaiso, ko ha taimi lelei eni ke feinga ai ke taau. ʻOku ʻikai fiemaʻu ia ke ke ongoʻi kuo pau ke ke hoko ko ha mataotao ʻi hono tali ʻa e ngaahi fehuʻi faka-Tohitapú pe ʻoku pau ke ke ʻilo lahi tatau mo e kakai lalahi ʻosi papitaisó. ʻOkú ke mahinoʻi ʻa e ngaahi akonaki tefito faka-Tohitapú? ʻOkú ke pipiki ki he ngaahi tuʻunga fakaeʻulungāanga ʻi he Tohi Tapú? ʻOkú ke loto ke ʻiloa koe ko e taha ʻo e Kau Fakamoʻoni ʻa Sihová? Talanoa leva mo hoʻo ongo mātuʻá fekauʻaki mo e meʻá ni. ʻE lava ke na fokotuʻutuʻu ke fakaofiofi fakataha mo koe ki he kau mātuʻá ke sio pe ʻokú ke aʻusia ʻa e ngaahi fiemaʻú.​—Sio ki he tohi Our Ministry, peesi 98-9.

6. ʻE lava fēfē ke tau tokoniʻi ʻa e kau ako Tohi Tapú ke hoko ko e kau malanga ʻo e ongoongo leleí?

⁶ Tokoniʻi ʻa e Niʻihi Kehé Ke Nau Malanga: Ko e kau ako Tohi Tapu fakalakalaká ʻoku nau taau nai ke kau fakataha mo kitautolu ʻi he tuʻunga ko e kau malanga lolotonga ʻa e ngaahi māhina ka hoko mai ʻo e ngāue makehé. Kapau ʻokú ke maʻu ha toko taha ako Tohi Tapu ʻa ia ʻokú ne fai ha fakalakalaka lelei, kumi ki he tokoni ʻa hoʻo ʻovasia ako tohí pe ʻovasia ngāué. ʻE lava ke kau fakataha mo koe ha taha ʻo kinaua ʻi he akó ke fakafuofuaʻi ʻa e fakalakalaka ʻa e toko taha akó. Kapau ʻoku taau ʻa e toko taha akó pea ʻokú ne maʻu ʻa e holi ke hoko ko ha toko taha malanga, ʻe lava ke fokotuʻutuʻu ʻa e ʻovasia tauhí ki ha mātuʻa ʻe toko ua ke na fakataha mo koe pea mo e toko taha akó. (Sio ki he Watchtower ʻo Nōvema 15, 1988, peesi 17.) ʻI hono tali pē ʻa e toko taha akó, kamata leva hono akoʻi ia ʻi he ngāue fakafaifekaú.

7. ʻE fēfē nai hano tokoniʻi ʻa e kau malanga tōmokosi mo ʻikai longomoʻuí?

⁷ ʻE loto ʻa e kau ʻovasia ako tohí ke fai ha tokanga makehe ki ha taha pē ʻa ia ʻoku ʻikai longomoʻui pe tōmokosi ʻi heʻenau kulupú. Fai ha fakaafe fakafoʻituitui kia kinautolu ke ngāue mo koe ʻi he ngāue fakafaifekaú. Kapau kuo ʻikai te nau longomoʻui ʻi ha taimi lōloa, ʻoku fakapotopoto ke ʻuluaki talanoa ha mātuʻa ʻe toko ua mo kinautolu ke sio pe ʻoku nau taau. (Sio ki he Puha Fehuʻi ʻi he ʻEtau Ngāue Fakafaifekau ʻo e Puleʻanga ʻo Nōvema 2000.) Ko e faivelenga ʻa e fakatahaʻangá he lolotonga ʻa e ngaahi māhina ko eni ʻo e ngāue makehé ʻe ueʻi nai ai kinautolu ke nau toe ʻai ʻa e ngāue fakafaifekaú ko ha tafaʻaki tuʻumaʻu ia ʻo ʻenau moʻuí.

8, 9. Ko e hā ʻe lava ke fai ʻe he kau mātuʻá ke langa hake ai ʻa e loto-māfana ki he ngāue makehé?

⁸ Teuteu he Taimí Ni ki he Ngāue Fakalahi: Kau mātuʻa, kamata he taimí ni ke langa hake ʻa e loto-māfana ʻi he fakatahaʻangá ki he tāimuʻa tokoní. ʻE lava ke mou fai ʻa e meʻa lahi ʻaki hoʻomou ngaahi fakamatala fakalototoʻá mo e faʻifaʻitakiʻanga leleí. (1 Pita 5:3) Ko e hā ʻa e tumutumu ki muʻa ʻa e fakatahaʻangá ʻi he kau tāimuʻa tokoní? ʻE lava ke fakalaka ai he taʻú ni? Ko e kau ʻovasia ako tohí mo honau kau tokoní ʻoku totonu ke nau kumi ha ngaahi founga ke fakalototoʻaʻi ai ʻa e faʻahinga kotoa ʻi he kulupú ke fakalahi ʻenau ngāué. ʻE fakataimitēpileʻi nai ʻe he kau ʻovasia ngāué ha ngaahi fakataha lahi ange ki he malaʻe ngāué. Fakahaaʻi ki muʻa ki he fakatahaʻangá ʻa e meʻa ʻoku fokotuʻutuʻú. Fakapapauʻi ʻoku vaheʻi ʻa e kau malanga lavameʻa ke nau takimuʻa pea ko e ngaahi fakataha ki he ngāué ʻoku kamata pea fakaʻosi taimi totonu. (Sio ki he Puha Fehuʻi ʻi he ʻEtau Ngāue Fakafaifekau ʻo e Puleʻanga ʻo Sepitema 2001.) ʻOku totonu ke toe fokotuʻutuʻu ʻe he ʻovasia ngāué ke ʻi ai ha feituʻu ngāue, ngaahi makasini pea mo e ʻū tohi feʻunga.

⁹ ʻI he taʻu kuo ʻosí naʻe kamata māfana ai pea tokamuʻa ʻaupito ʻa e kau mātuʻa ʻo e fakatahaʻanga ʻe taha ʻi hono fakalototoʻaʻi ʻa e tāimuʻa tokoní, fakataha mo hono ʻoatu ʻe he niʻihi ʻo kinautolu ʻenau ngaahi tohi kole. Naʻa nau fokotuʻutuʻu ʻa e ngaahi fakataha fakalahi ki he malaʻe ngāué—ko e taha ʻi he 5:30 pongipongi ki he faifakamoʻoni ʻi he halá, ko e taha ʻi he 3:00 efiafi ki he faʻahinga ʻoku nau tuku mei he akó, mo ha fakataha hono tolu ʻi he 6:​00 efiafi ki he faʻahinga ʻoku tuku mei he ngāué. Tānaki atu ki ai, naʻe fokotuʻutuʻu ha fakataha ʻe tolu ki he malaʻe ngāué ʻi he ngaahi ʻaho Tokonakí. Naʻe tali ia ʻe he fakatahaʻangá ʻaki ʻa e hū ʻa e toko 66 ki he tāimuʻa tokoní ʻi ʻEpeleli!

10. ʻE lava fēfē ke teuteu ʻa e ngaahi fāmilí ke fakalahi ʻenau ngāué?

¹⁰ Ko e hā ʻoku ʻikai ke vaheʻi ai ha taimi he lolotonga hoʻomou ako fakafāmili hoko maí ke fokotuʻu ai ha ngaahi kolo totonu ki he ngaahi māhina ka hoko maí? ʻI he fāitaha mo e palani leleí, ko e niʻihi pe ko e kotoa ʻi he fāmilí ʻe malava nai ke nau tāimuʻa tokoni. Kapau ʻoku ʻikai malava ia, fokotuʻu ha ngaahi taumuʻa ke fakalahi ʻa hoʻomou ngāué ʻaki hono fakalōloa ʻa hoʻomou ngaahi vahaʻa taimi ngāue anga-mahení pe ko e ʻalu ʻi ha ngaahi taimi lahi ange. ʻAi ko ha meʻa ia ke fai ki ai ha lotu fakafāmili. ʻE lava ke mou tuipau ʻe tāpuakiʻi ʻe Sihova ʻa hoʻomou ngaahi feingá.​—1 Sione 3:​22.

11. (a) Ko e hā ʻa e ngaahi meʻa fakaofo naʻe lavaʻi ʻi he feilaulau ʻa Kalaisí? (e) Ko e hā ʻa e taimi mo e feituʻu ʻo e kātoanga Fakamanatu fakalotofonuá?

¹¹ Ngāue Fakaofo Taha ʻa e ʻOtuá: Ko e fakahāhā lahi taha ʻo e ʻofa ʻa Sihová ko e meʻaʻofa ʻa hono ʻAló ʻi he tuʻunga ko ha huhuʻi maʻatautolú. (1 Sione 4:​9, 10) Ko e feilaulau huhuʻí ʻoku ʻomai ai ʻa e makatuʻunga fakalao tefito ki hono huhuʻi ʻa e faʻahinga ʻo e tangatá mei he angahalá mo e maté. (Loma 3:​23, 24) Ko e taʻataʻa ʻo Sīsū naʻe lilingí naʻe fakalaoʻi ai ʻa e fuakava foʻoú, ʻo ʻai ai ke malava ke ohi ʻa e faʻahinga ʻo e tangatá ko e ngaahi foha ʻo e ʻOtuá fakataha mo e ʻamanaki ke pule ʻi he Puleʻanga fakahēvaní. (Sel. 31:​31-​34; Mk. 14:24) Ko e meʻa ʻoku mahuʻinga tahá, ko e ʻalunga ʻo e talangofua haohaoa ʻa Sīsuú naʻe fakamāʻoniʻoniʻi ai ʻa e huafa ʻo Sihová. (Teu. 32:4; Pal. 27:11) ʻI he ʻaho Sāpate 4 ʻo ʻEpelelí, hili e tō ʻa e laʻaá, ʻe kātoangaʻi ai ʻa e Fakamanatu ʻo e pekia ʻa Kalaisí takatakai ʻi he māmaní.

12. ʻE lava fēfē ke maʻu ʻaonga ʻa e faʻahinga mahuʻingaʻiá mei hono maʻu ʻa e kātoanga ʻo e Kai Efiafi ʻa e ʻEikí?

¹² Ko e kātoangaʻi ʻo e Kai Efiafi ʻa e ʻEikí ʻoku fakavīkivikiʻi ai ʻa e ngaahi ngāue fakaofo ʻa Sihová. ʻOku langa hake ʻe he malangá ʻa e houngaʻia ki he meʻa naʻe fai ʻe Sihova ʻi hono tokonaki mai ʻa e huhuʻí. Ko e faʻahinga mahuʻingaʻia te nau maʻu iá te nau malava ai ke sio ki he ngaahi ngāue fakaofo kehe ʻa e ʻOtuá. Te nau malava ai ke sio ki he fāʻūtaha mo e ʻofa māfana kuo akoʻi ʻe Sihova ki hono kakaí ke nau fakahāhaá. (Ef. 4:​16, 22-​24; Sem. 3:​17, 18) Ko e maʻu ʻo e kātoanga mahuʻinga ko ení ʻe lava ke ʻi ai ʻene maongo moʻoni ki he fakakaukau ʻa ha taha, ko ia ai, ʻoku mau fiemaʻu ʻa e tokolahi taha ʻe malavá ke nau ʻi ai.​—2 Kol. 5:​14, 15.

13, 14. Ko hai ʻoku totonu ke tau fakaafeʻi ki he Fakamanatú, pea ʻoku anga-fēfē?

¹³ Fakaafeʻi ʻa e Niʻihi Kehé Ke Nau Maʻu Ia: Kamata teuteu leva ʻaki hono ʻai ha lisi ʻo e faʻahinga ke fakaafeʻí. Ko hoʻo lisí ʻoku totonu ke fakakau ai ʻa e ngaahi mēmipa taʻetui he fāmilí, ngaahi kaungāʻapí, ngaahi maheni mei he ngāué pe ko e akó, kau ako Tohi Tapu he kuohilí mo e lolotonga ní pea mo e kotoa hoʻo ngaahi toe ʻaʻahí. ʻOku totonu ke fakakau ʻe he kau ʻovasia Ako Tohí ʻi heʻenau lisí ha kau malanga pē ʻoku ʻikai longomoʻui.

¹⁴ Ngāueʻaki ʻa e ngaahi fakaafe Fakamanatu kuo pulusí pea taipeʻi pe tohiʻi maau ai ʻa e taimi mo e feituʻu ʻo e Fakamanatú. Pe te ke loto nai ke ngāueʻaki ʻa e fakaafe ʻoku hā ʻi he takafi mui ʻo e Taua Leʻo ʻo Maʻasi 15, 2004, pe ko e Awake! ʻo Maʻasi 22, 2004. ʻI he ofi ange ʻa e ʻaho 4 ʻo ʻEpelelí, fai ha fakamanatu ki he faʻahinga ʻi hoʻo lisí, ʻaki hoʻo ʻaʻahi pe telefoni ki ai.

15. ʻE lava fēfē ke tau fakahāhā ʻa e anga-talitali kakaí ʻi he pō ʻo e Fakamanatú?

¹⁵ ʻI he Fakamanatú: Feinga ke aʻu tōmuʻa ʻi he pō ʻo e Fakamanatú. Fakahāhā ʻa e anga-talitali kakaí ʻaki ʻa e fakafeʻiloaki ki he faʻahinga foʻoú. (Loma 12:13) ʻOkú ke maʻu ha fatongia makehe ki he kau fakaafe ʻokú ke fakaafeʻí. ʻAi ke nau ongoʻi ʻoku talitali lelei kinautolu, pea fakafeʻiloaki kinautolu ki he niʻihi kehe ʻi he fakatahaʻangá. Mahalo pē ʻe lava ke ke tokoniʻi kinautolu ke kumi ha sea ofi atu kiate koe. Pea kapau ʻoku ʻikai ha Tohi Tapu pe ko ha tohi hiva ʻa ha niʻihi, fokotuʻutuʻu ke nau sio fakataha mo koe pe ko ha taha kehe. Hili ʻa e kātoangá, fakafaingamālieʻi koe ke tali ha ngaahi fehuʻi pē nai te nau fai. Kapau ko e ʻuluaki taimi ia ʻoku ʻi ai ai ha niʻihi, ʻeke pe te nau saiʻia ke ako lahi ange fekauʻaki mo e Folofola pea mo e taumuʻa ʻa e ʻOtuá. Tuʻuaki ange ke fai ha ako Tohi Tapu ʻi ʻapi mo kinautolu.

16. Ko e hā ʻe lava ke fai ke tokoniʻi ʻaki ʻa e faʻahinga naʻa nau maʻú ke nau fai ha fakalakalaka fakalaumālié?

¹⁶ Hokohoko Atu Hono Tokoniʻi ʻa e Faʻahinga Naʻa Nau Maʻú: ʻI he ngaahi uike hoko mai ʻi he Fakamanatú, ko e faʻahinga naʻa nau maʻú te nau fiemaʻu nai ha tokoni lahi ange. ʻOku kau ki heni ʻa e faʻahinga ʻa ia naʻa nau maʻu tuʻumaʻu ʻi ha taimi ʻa e ngaahi fakatahá ka ʻoku nau feohi fakangatangata pē he taimí ni mo e fakatahaʻangá. ʻE tokanga ʻa e kau mātuʻá ke sio ʻoku ʻikai ke liʻaki ʻa e faʻahinga peheé, ʻi he feinga ke fakapapauʻi ʻa e ʻuhinga naʻe tuku ai ʻenau fai ʻa e fakalakalaka fakalaumālié. ʻAi ke maongo kia kinautolu ʻa e fakavavevave ʻo e taimí. (1 Pita 4:7) Tokoniʻi ʻa e toko taha kotoa ke sio ki he ʻaonga ʻo e talangofua ki he ekinaki Fakatohitapu ke fakatahataha tuʻumaʻu fakataha mo e kakai ʻa e ʻOtuá.​—Hep. 10:​24, 25.

17. Ko e hā ʻoku totonu ai ke tau hanganaki talanoa fekauʻaki mo e ngaahi ngāue fakaofo ʻa Sihová?

¹⁷ Ko e ngaahi ngāue ʻa Sihová ʻoku fuʻu fakaofo ia kia kitautolu ke mahinoʻi kakato ʻo aʻu ai pē ʻo kapau te tau moʻui taʻengata. (Siope 42:​2, 3; Koh. 3:​11) Ko ia ai, ʻe ʻikai ʻaupito te tau masiva ʻi he ngaahi meʻa ke fakahīkihikiʻi ʻaki iá. Ko e faʻahitaʻu Fakamanatu ko ení ʻe lava ke tau fakahāhā ai ʻetau houngaʻia ki he ngaahi ngāue fakaofo ʻa Sihová ʻaki hono fai ha feinga makehe ke fakalahi ʻetau ngāue fakafaifekaú.

[Saati ʻi he peesi 5]

ʻE Lava Ke Ke Tāimuʻa Tokoni ʻo Ngāueʻaki ʻa e Taha ʻo e Ngaahi Taimi-Tēpile ko Ení?

Maʻasi Sā M* Tū* P* Tuʻa F To Māhina Kātoa

ʻAho Taki Taha 2 1 1 1 1 1 5 51

ʻAho ʻe Ua 0 5 0 5 0 0 0 50

Fakaʻosinga Uiké Pē 5 0 0 0 0 0 8 52

ʻEpeleli Sā M Tū P Tuʻa* F* To Māhina Kātoa

ʻAho Taki Taha 2 1 1 1 1 1 5 50

ʻAho ʻe Ua 0 0 0 0 5 5 0 50

Fakaʻosinga Uiké Pē 5 0 0 0 0 0 8 52

Mē Sā* M* Tū P Tuʻa F To* Māhina Kātoa

ʻAho Taki Taha 2 1 1 1 1 1 4 51

ʻAho ʻe Ua 0 5 0 0 0 0 5 50

Fakaʻosinga Uiké Pē 3 0 0 0 0 0 7 50

* Nima ʻi he māhiná