Meʻakai Fakalaumālie ʻi he Taimi Totonu
1. ʻOku anga-fēfē hono fakahoko he ʻahó ni ʻa e Isikeli 36:29?
1 “Te u ui mai ʻa e uite, pea te u ʻai ke fuʻu lahi ia, pea ʻe ʻikai te u toe tuku atu ʻa e honge,” ko e folofola ia ʻa e ʻEiki Hau ko Sihová. (Isi. 36:29) ʻOku ngāueʻaki ʻa e ngaahi lea fakaekikite ko iá ki he kakai ʻa e ʻOtuá he ʻahó ni. ʻI he lea fakaefakatātaá, ʻoku fakatupunga ʻe Sihova ʻa e uite fakatolonga-moʻuí ke tupu lahi maʻa hono kakaí. Ko e meʻakai fakalaumālie taimi totonu kuo tokonaki fakafou ʻi heʻetau ngaahi fakataha-lahi fakavahé ʻoku fakatātaaʻi mahino ai ʻa e moʻoniʻi meʻá ni.
2. Kuo anga-fēfē hono ngāueʻaki ʻe Sihova ʻa e ngaahi fakataha-lahi fakavahé ke tokonaki mai ai ʻa e meʻakai fakalaumālié ʻi he taimi totonú?
2 ʻI he fakataha-lahi naʻe fai ʻi Columbus, Ohio, ʻi he 1931, naʻe fakahinohinoʻi ai ʻe Sihova ʻa hono kau lotú ke nau ohi ha hingoa foʻou—Kau Fakamoʻoni ʻa Sihová. (Ai. 43:10-12) ʻI he 1935, naʻe ʻiloʻi totonu ai ʻa e fuʻu kakai lahi ʻo e Fakahā 7:9-17. ʻI he 1942, naʻe fakahoko ai ʻe Tokoua Knorr ʻa e malanga maʻá e kakaí ko e “Melinó—ʻE Lava ke Tuʻuloa Ia?” Naʻe ʻoatu ʻe he malanga ko iá ha fakaivimālohi ki he ngāue fakamalanga ʻi māmani lahí pea taki atu ki hono fokotuʻu ʻo e Akoʻanga Tohi Tapu Taua Leʻo ko Kiliatí. Neongo naʻe manatua tefito ʻa e ngaahi fakataha-lahi ʻe niʻihi, ko e fakataha-lahi taki taha naʻe fakamoʻoniʻi ʻa ʻene hoko ko ha tēpile mahu ʻi he meʻakai fakalaumālie fakatupu moʻuilelei naʻe tokonaki mai ʻi he taimi totonu.—Sāme 23:5; Mt. 24:45.
3. Ko e hā kuo pau ke tau fai ke maʻu ʻaonga ai mei he kātoanga fakalaumālie ʻi heʻetau fakataha-lahi fakavahé?
3 ʻOku Lelei Fēfē ʻa Hoʻo Tōʻonga Kaí? ʻOku malava ke hoko ʻo takatakaiʻi kitautolu ʻe ha meʻakai kae ʻosi angé ʻoku tau fiekaia kapau ʻoku ʻikai ke tau fai ha feinga ke kai. (Pal. 26:15) ʻOku moʻoni tatau ia mo e tuʻunga fakalaumālié. ʻI ha ngaahi fakataha-lahi ʻe niʻihi, kuo fakatokangaʻi ai ʻa e tokolahi ʻoku nau feʻaluʻaki noaʻia holo pe talanoa ki he niʻihi kehé he lolotonga ʻa e polokalamá. Neongo ko e tafaʻaki mahuʻinga ia ʻa e feohi fakatupu langa hake ʻi he fakataha-lahí, ko e taimi ki aí ko e ki muʻa mo e hili ʻa e konga taki taha. (Koh. 3:1, 7) Kapau ʻoku ʻikai ke tau ʻi hotau nofoʻangá ʻo tokanga lelei, te tau liʻaki nai ha poini mātuʻaki mahuʻinga. Ko e kau ʻovasia ʻi he ngaahi potungāue fakataha-lahí mo e fanga tokoua ʻoku ʻi ai ʻenau ngaahi kongá te nau fiemaʻu nai ʻi ha taimi ke fetalanoaʻaki ki he ngaahi meʻa fakaefakatahalahí he lolotonga ʻa e lele ʻo e ngaahi kongá. Kapau ʻoku ʻikai, ʻoku totonu ke nau fokotuʻu ha faʻifaʻitakiʻanga ʻaki ʻenau tokanga ki he polokalamá. ʻOku ʻikai ha taha ʻo kitautolu ʻe totonu ke ne tō mei ha faʻahinga meʻakai fakalaumālie kuo tokonakí.—1 Kol. 10:12; Fili. 2:12.
4. ʻE lava fēfē ke tau hoko ko e kau fakafetaʻi ki he meʻakai fakalaumālie hulu fau ʻoku tokonaki ʻe Sihová?
4 He fiefia ē ka ko kitautolu ʻi he ngaahi moʻoni fakalaumālie lahi ʻoku tokonaki mai ʻe Sihová, ʻo kehe mei he ngaahi tokāteline loi fakatupu mate ʻa e Puleʻanga-Haʻa-Kalisitiané! (Ai. 65:13, 14) Ko e founga ʻe taha ʻe lava ke tau ‘hoko [ai] ko e kau fakafetaʻí’ ko e vakai ki he fakataha-lahí ko ha faingamālie ia ke akoʻi ai kitautolu ʻe Sihova. (Kol. 3:15) Sio fakalaka atu ʻi he tokoua ʻokú ne fai ʻa e malangá, pea vakai ki he pōpoakí ko e ʻomai mei heʻetau “Faiako Maʻongoʻongá.” (Ai. 30:20, 21, NW; 54:13) Mātuʻaki tokanga. Hiki ha ngaahi nouti nounou ʻo e ngaahi poini tefitó. Fakamanatu ʻa e ngaahi meʻa mahuʻinga ʻo e polokalamá ʻi he efiafi taki taha. Ngāueʻaki ʻa e meʻa ʻokú ke akó.
5. Ko e hā ʻa e ngaahi ʻuhinga ki he fiefiá ʻoku ʻomai kia kitautolu ʻe he ngaahi fakataha-lahi fakavahé?
5 Ko e fakataha-lahi kotoa pē ʻi he taimi ko ʻeni ki muʻa ʻi ʻĀmaketoné, pe ʻoku fai ia ʻi ha kemi hūfanga, ʻi ha fonua faiʻanga tau, pe ʻi ha tuʻunga melino lahi ange, ko hano ikunaʻi ia ʻo Sētane! ʻI he tuʻunga ko e fetokouaʻaki fāʻūtahá, ʻoku tau koloaʻaki hotau ngaahi faingamālie ke fakatahataha fakataha ʻi he ngaahi fakataha-lahi fakavahé. (Isi. 36:38) ʻOku tau loto-maʻu ʻe toe tokonaki anga-ʻofa mai ʻe Sihova ʻa e “meʻakai kuo tuʻutuʻuni ʻi hono taimi totonu.”—Luke 12:42.
[Puha ʻi he peesi 4]
Fakahā ʻa e Houngaʻia ki he Tēpile ʻa Sihová
◼ Tokanga lelei
◼ Hikiʻi ʻa e ngaahi poini tefitó
◼ Fakamanatu ʻa e ngaahi meʻa mahuʻinga ʻo e polokalamá ʻi he efiafi taki taha
◼ Ngāueʻaki ʻa e meʻa ʻokú ke akó