Fasi ʻOku Fakaivifoʻou
1 Ko e hivá mo e fasí ko ha konga mahuʻinga ia ʻo e lotu moʻoní. ʻI ʻIsileli ʻo e kuonga muʻá, naʻe hiva ai ʻa ʻĒsafe mo hono fanga tokouá: “Fakafetaʻi kia Sihova, . . . Hiva ki Heʻene ʻAfio, ta haape ki Heʻene ʻAfio; talanoa ki heʻene ngaahi ngaue fakaofo.” (1 Kal. 16:8, 9) ʻI he ʻahó ni ʻoku tau hiki hake ai hotau leʻó ʻi he hiva kia Sihova ʻi heʻetau ngaahi fakataha fakauike ʻa e fakatahaʻangá. (Ef. 5:19) Ko ha faingamālie fakaofo ē ko ia ke ʻave ʻa e fakahīkihiki ki hono huafá!—Sāme 69:30.
2 Ko e fanongo ki he Kingdom Melodies, ʻa e ngaahi tepi tā meʻalea ʻo e ngaahi hiva ʻo e Puleʻangá, ʻe lava ke ne fakafonu hotau ʻatamaí ʻaki ʻa e ngaahi fakakaukau fakalaumālié. “ʻI hono tā ʻa e ngaahi fasí, ʻoku ou manatu loto ki hono ngaahi leá,” ko e fakamatala ia ʻa ha tuofefine ʻe taha. “Ko ha founga lelei ē ke tauhi ai ʻa Sihova ʻi heʻeku fakakaukaú lolotonga ia ʻeku mālieʻia he fasí!”—Fili. 4:8.
3 Ngaahi Taimi ke Fiefia Ai ʻia Kinautolú: Ko hono tā ʻa e Kingdom Melodies ʻi ʻapí ʻokú ne fakatupu ha ʻatimosifia māfana mo fakalaumālie ʻa ia ʻoku tokoni ia ki he melino ʻa e fāmilí. “ʻOku mau toutou tā ʻa e [fasi] ko ení ʻi homau ʻapí pea ʻi he kaá pea ʻikai ʻaupito fakapipikoʻia ʻi heʻene fokotuʻutuʻu fakamūsika mālié,” ko e tohi ia ʻa ha fāmili ʻe taha. “ʻOku faʻa tokonaki mai ʻe he Kingdom Melodies ʻa e fakakaukau nonga totonú ʻi he teuteu ki he ngaahi fakataha faka-Kalisitiané pe ʻi he fononga ki ha ʻasemipilī.” Naʻe pehē ʻe ha tuofefine: “Ko ha meʻa fakafiefia moʻoni ia ke fanongo ki ai ʻi he taimi ʻoku ou fai ai ʻeku ngāue fakaʻapí—ko hai ia ʻe fakakaukau te u fiefia lolotonga hono pelu ʻa e foó? ʻOku ou palani ke tā ʻa e fasi ko ení ʻi he taimi ʻoku ou loto-siʻi aí. Ko e fasí ʻoku ʻi ai hono ola fakafiefia ʻaupito! . . . Ko e foʻi hiva kotoa pē ʻokú ne langaʻi ʻa e fiefiá.” ʻOku ʻi ai ha ngaahi taimi ʻe ʻaonga ai kia koe ʻa e ngaahi fasi fakaivifoʻou peheé?
4 Ko e lahi ʻo e fasi he ʻaho ní ʻoku tapua atu ai ʻa e laumālie ʻo e māmaní. ʻOku lava ke tokoniʻi ʻe he ngaahi mātuʻá ʻenau fānaú ke nau fakatupulekina ha manako ki he ʻū fasi leleí ʻaki hono ngāueleleiʻaki ʻa e ngaahi tepi Kingdom Melodies. Ko e kau ako Tohi Tapu tokolahi mo e kakai mahuʻingaʻiá te nau toe fiefia ke ʻilo fekauʻaki mo e ngaahi hiva fakalaumālie fakaʻofoʻofa ko ení, ʻa ia ʻoku fakalāngilangiʻi ai ʻa Sihova pea hiki hake ai ʻa e laumālié.—Sāme 47:1, 2, 6, 7.