Tauhi Maʻu ha Ongoʻi ʻo e Fakavavevavé!
1 Naʻe ʻiloʻi ʻe Sīsū naʻe fakangatangata ʻa e taimi naʻá ne maʻu ʻi he māmaní ke fakahoko ai ʻa e ngāue ʻa ʻene Tamaí. (Sione 9:4) Ko ia ai, naʻá ne fakahoko ʻa ʻene ngāue fakafaifekaú fakataha mo ha ongoʻi ʻo e fakavavevavé, pea naʻá ne akoʻi ʻa ʻene kau ākongá ke nau fai ʻa e meʻa tatau. (Luke 4:42-44; 8:1; 10:2-4) Naʻe mahuʻinga fika ua kiate ia ʻa e ngaahi meʻa fakafiemālie fakamatelié. (Mt. 8:20) ʻI heʻene peheé, naʻá ne malava ai ke fakaʻosi ʻa e ngāue naʻe tuku ange ʻe Sihova ke ne faí.—Sione 17:4.
2 Taimi Fakangatangata: ʻOku toe fakangatangata foki ʻa e taimi ke malangaʻi ai ʻa e ongoongo leleí ʻi he “mamani katoa.” (Mt. 24:14) ʻOku fakahaaʻi ʻi he kikite Fakatohitapú ʻoku tau moʻui ʻi he uhouhonga ʻo e taimi ʻo e ngataʻangá. Kuo vavé ni ki he “kau taʻeʻilo ʻOtua, pea ki he kau taʻetalangofua ki he Kosipeli ʻo hotau ʻEiki ko Sisu; . . . [ke] nau kai hono nunuʻa ko e fakaʻauha taʻengata.” (2 Tes. 1:6-9) ʻE hoko fakafokifā mataʻāʻā ʻa e fakamaau ko iá. (Luke 21:34, 35; 1 Tes. 5:2, 3) ʻOku fiemaʻu ke lāuʻilo ʻa e kakaí ki honau tuʻunga fakatuʻutāmakí. Ko hotau fatongiá ia ke tokoniʻi kinautolu ke nau kumi ki he hōifua ʻa Sihová lolotonga ʻoku kei ʻi ai ʻa e taimí.—Sef. 2:2, 3.
3 Fai ʻa e Meʻa Kotoa ʻOku Tau Malavá: ʻI hono ʻiloʻi “kuo fakanounou ʻa e kuonga,” ʻoku fakamuʻomuʻa ai ʻe he kau sevāniti ʻa e ʻOtuá ʻa e ngāue fakamalangá. (1 Kol. 7:29-31; Mt. 6:33) Kuo tukuange ʻe he niʻihi ʻa e ngaahi faingamālie fakaʻekonōmiká pe ko e ngaahi ngāue fakafoʻituitui kehé koeʻuhi ke fakalahi ʻenau kau ʻi he ngāue fakafaifekaú. (Mk. 10:29, 30) ʻOku hokohoko atu ʻa e niʻihi ʻi he “tupulekina maʻu ai pe ʻi he ngaue ʻa e ʻEiki” neongo ʻa e ngaahi ʻahiʻahi hokohokó. (1 Kol. 15:58) Kuo talaki fakahāhā ʻe he tokolahi ʻa e ongoongo leleí ʻi he laui hongofuluʻi taʻu ʻo taʻengaue. (Hep. 10:23) ʻOku fakamahuʻingaʻi lahi ʻe Sihova ʻa e ngaahi feilaulau pehē kotoa ʻi he poupou ki he ngaahi meʻa ʻo e Puleʻangá.—Hep. 6:10.
4 Ko hono fakatefito ʻetau moʻuí ʻi he lotu kia Sihová, ʻa ia ʻoku kau ai ʻa e ngāue fakamalangá, ʻoku tokoniʻi ai kitautolu ke tauhi ke ofi ʻi he fakakaukaú ʻa e ʻaho ʻo Sihová. ʻOkú ne maluʻi kitautolu mei he hoko ʻo fakaleluʻi ʻe he māmani ʻo Sētané pea fakaivimālohiʻi ʻetau fakapapau ke tauhi maʻu ʻa e tōʻonga māʻoniʻoní. (2 Pita 3:11-14) Ko e moʻoni, ko hono fakahoko ʻetau ngāue fakafaifekaú fakataha mo ha ongoʻi ʻo e fakavavevavé, ʻe lava ke hoko ia ʻo fakatou fakahaofi moʻui kia kitautolu pea ki he faʻahinga ʻoku fanongo mai kia kitautolú.—1 Tim. 4:16.