Tokonaki Foʻou ke Tokoniʻiʻaki Kitautolu Ke Tau Fakaʻehiʻehi mei he Totó
Kuo tali ʻe he Kulupu Pulé ʻa hono fakatahaʻi ʻa e ngaahi konga mahuʻinga ʻo e tohi fakamatala Fakahinohino ki he Tokangaʻi ʻo e Moʻuí (HCD) pea mo e kaati Fakahinohino/Fakaʻatā Fakafaitoʻo Tokamuʻa ki ha tohi fakamatala fakalao pē ʻe taha, ʻa ia te tau ui ia ʻi he tuʻunga fakalūkufuá ko e kaati HCD.
Ko e kaati HCD ʻoku ʻaonga taʻefakangatangata ia pea ʻe hoko ia ko ha fakamatala ʻo hoʻo ngaahi fiemaʻú ʻi he taimi te ke folau fakavahaʻapuleʻanga aí. ʻI he kahaʻú, ʻoku totonu ke ke fakafonu ha kaati foʻou ko e HCD kapau (1) te ke fiemaʻu ke fai ha ngaahi liliu ki hoʻo kaati HCD, hangē ko hano liliu hoʻo ngaahi fiemaʻú, kakai ke fetuʻutaki ki aí, ngaahi tuʻasilá mo e ʻū fika telefoní pe (2) ko hoʻo kaati HCD kuo mole pe fakaʻauha.
Ko e kaati HCD ʻoku totonu ke ke fakakaukau faʻa lotu ki ai pea fakafonu fakalelei ia ʻi ʻapi. Kae kehe, ki muʻa ke ke fakamoʻoni ʻi he kātí, ʻoku mahuʻinga ke fai ha muimui ofi ʻaupito ki he ngaahi founga kuo fokotuʻu fakalaó. Ko e fakatātaá, ʻoku fakahaaʻi ai kuo pau ki ha ongo fakamoʻoni ʻe toko ua ke na sio ki hoʻo fakamoʻoni ʻi he kaati HCD, kuo pau ke na ʻi ai ʻi hoʻo fakamoʻoni aí. Ko e kau ʻovasia ako tohí te nau vakaiʻi nai mei he taimi ki he taimi ʻa e faʻahinga ʻoku teʻeki ke nau fakafonu ha kaati foʻoú ke sio kapau ʻe fiemaʻu ha tokoni.
Ki muʻa ke peluki ʻa e kaati HCD, fotokopi ha ngaahi tatau lelei maʻá e faʻahinga pau ke fetuʻutaki ki aí mo e faʻahinga kehe, kau toketaá pea pehē foki ki haʻo lēkooti ʻaʻau. Te ke fiemaʻu nai ke tokonaki ha ngaahi tatau maʻá e ngaahi mēmipa kehe ʻo e fāmilí pea mo e sekelitali ʻa e fakatahaʻangá. Ko e ngaahi tataú ʻoku totonu ko ha lauʻi pepa A-4 totonu tafaʻaki taha ia, fakataha mo e kātí ʻi he loto-mālie ʻo e pēsí. Ko e ʻuluaki tatau ʻo e kaati HCD, ʻikai ko ha hiki-tatau, ʻoku totonu ke ke tauhí.
Ko e Kaati Fakaʻilonga fakataha mo e ʻaho hono pulusí 3/99 maʻá e fānau teʻeki papitaiso ʻa e ngaahi mātuʻa Fakamoʻoní ʻoku ʻikai ke liliu. ʻOku totonu ke fakapapauʻi ʻe he ngaahi mātuʻá ʻoku fakafonu fakalelei mo fakamoʻoni ʻi ha kaati maʻá e kiʻi tama kei siʻi taki taha pea ke ʻave holo ia ʻe he kiʻi tamá ʻi he ngaahi taimi feʻungamālié.
Ko e kau malanga teʻeki papitaisó te nau liliu nai ʻa e fakalea ʻo e kaati HCD mo e Kaati Fakaʻilonga koeʻuhi ke lava ʻo hikiʻi ʻa e ngaahi fakahinohino tokangaʻi fakaemoʻuí maʻa kinautolu mo ʻenau fānaú. Ko e sekelitalí ʻoku totonu ke ne tokonaki ha kaati HCD ki he kau malanga toki papitaiso foʻou kotoa pē ʻi he lolotonga ʻo e taʻú.