ʻOkú Ke ʻIlo Hoʻo Fili ke Faí?

Ko e tafa taʻekau ai ha totó ʻoku fakahoko ia ʻi he ngaahi senitā fakafaitoʻo takatakai ʻi he māmaní. ʻOkú ke lāuʻilo kakato ki he ngaahi fili ke fai ʻa ia ʻoku ala maʻu ʻi he malaʻe fakafaitoʻo taʻekau ai ha totó? ʻOku fiemaʻu ke ke ʻilo ia koeʻuhi ke ke lava ʻo fai ha ngaahi fili makatuʻunga ʻi he ʻilo ʻo fekauʻaki mo ha faitoʻo ke fai pea mo ha tafa. Sio ʻi he vitiō No Blood—Medicine Meets the Challenge. Hili iá, lotu fekauʻaki mo hoʻo filí pea fakakaukau ki he meʻa kuó ke akó fakataha mo e tokoni ʻa e ngaahi fehuʻi ʻoku fokotuʻu mai ʻi laló.—Fakatokangaʻi: Koeʻuhi ʻoku kau ʻi he vitioó ʻa e ngaahi konga nounou fakaetafa, ʻoku totonu ke fakapotopoto ʻa e ngaahi mātuʻá ʻi he sio mo e fānau īkí he foʻi vitioó.

(1) Ko e hā ʻa e ʻuhinga tefito ʻoku fakafisi ai ʻa e Kau Fakamoʻoni ʻa Sihová mei he huhu totó? (2) ʻI he fekauʻaki mo e tokangaʻi fakafaitoʻó, ko e hā ʻoku fiemaʻu ʻe he Kau Fakamoʻoni ʻa Sihová? (3) Ko e hā ʻa e totonu tefito ʻoku maʻu ʻe he kau mahakí? (4) Ko e hā ʻoku ʻuhinga lelei ai pea ko ha fatongia ia ke fili ʻa e ngaahi faitoʻo fetongi ʻo e huhu totó? (5) ʻI he taimi ʻoku mole lahi ai ha toto, ko e hā ʻa e ongo ngāue fakavavevave ke fai ʻe he kau toketaá? (6) Ko e hā ʻa e founga faitoʻo tefito ʻe fā ʻoku fetongi ʻaki ʻa e huhu totó? (7) ʻE anga-fēfē nai ʻa hono hanga ʻe he kau toketaá ʻo (a) fakasiʻisiʻi e mole ʻa e totó, (e) fakatolonga ʻa e ngaahi sela toto kulokulá, (f) fakakake ʻa e faʻunga ʻo e totó pea (h) fakafoki ʻa e toto ne molé? (8) Fakamatalaʻi ʻa e ongo founga ʻoku ʻiloa ko e (a) fakamanifi ʻa e totó (haemodilution) mo e (e) fakahaofi sela totó (cell salvage). (9) Ko e hā ʻoku totonu ke ke ʻilo fekauʻaki mo ha faʻahinga faitoʻo fetongi pē ʻo e huhu totó? (10) ʻE lava ke fai ha tafa lahi mo faingataʻa ʻo taʻekau ai ʻa e huhu totó? (11) Ko e hā ʻa e fakalakalaka ʻaonga kuo hoko ʻi he tafaʻaki fakafaitoʻó?

Ko hono tali ha niʻihi ʻo e ngaahi faitoʻo ʻoku fakaeʻa ʻi he foʻi vitioó ko ha fili fakafoʻituitui ia ʻo fakatatau ki he konisēnisi ʻo e toko taha taki taha kuo akoʻi ʻe he Tohi Tapú. Kuó ke fakahaaʻi mahino ʻa e ngaahi faitoʻo ʻokú ke loto-lelei ke tali maʻau mo hoʻo fānaú pea fakafonu leva ha kaati HCD? Ki ha fetalanoaʻaki kakato ki he ngaahi meʻá ni, vakaiʻi fakalelei ʻa e “Ngaahi Fehuʻi mei he Kau Lautohí” ʻi he ʻīsiu ʻo e Taua Leʻo ʻo Sune 15, 2004 mo ʻOkatopa 15, 2000. Pea ngāueʻaki leva ʻa e foomu ngāue ʻi he fakalahi ʻo ʻEtau Ngāue Fakafaifekau ʻo e Puleʻanga ʻo Nōvema 2006, “Ko e Hā ʻEku Fili ʻo Kau ki he Fanga Kiʻi Konga Iiki ʻo e Totó mo e Founga Fakafaitoʻo ʻOku Fekauʻaki mo Hoku Totó Tonu?,” ke fai ai hoʻo fili fakafoʻituitui fekauʻaki mo e ngaahi faitoʻo te ke talí pe ʻikai talí. Fakaʻosí, fakapapauʻi ʻokú ke hiki totonu hoʻo ngaahi filí ki hoʻo kaati HCD. ʻOku totonu ke fakahā mahino hoʻo ngaahi filí ki he faʻahinga ʻoku hā ʻi hoʻo kātí pea ki ha mēmipa pē ʻi he fāmilí ʻoku ʻikai ko ha Fakamoʻoní.

[Puha ʻi he peesi 3]

• Kuó ke fakapapauʻi ʻa e ngaahi founga faitoʻo te ke loto-lelei ke tali maʻau pea mo hoʻo fānaú?

• ʻOkú ke faʻo holo ha kaati HCD kakato naʻa hoko ha fakatamaki fakafokifā?