Tuʻunga Māʻolunga Taha ʻo e Tokangaʻi Fakafaitoʻó​—Ko e Hā Ia?

“Ko hono moʻoní, ko ha tokotaha mahaki pē ʻoku fai ki ai ha faitoʻo taʻekau ai ha toto, ko e tokotaha ia ʻokú ne maʻu ʻa e tafa ʻi he tuʻunga māʻolunga taha ʻoku ala fakahokó.” Ko e lau ia ʻa toketā Michael Rose, ko e talēkita fakafaitoʻo pea ko e toketā fakamohe. Ko e hā ʻa e ngaahi founga mo e ngaahi faitoʻo fetongi ʻo e totó ʻe fakakau nai ʻi he “faitoʻo ʻikai ha totó”? ʻOku fiemaʻu ke ke ʻiloʻi koeʻuhi kae lava ke ke fai ha ngaahi fili lelei fekauʻaki mo ha faitoʻo pea mo ha tafa. Sio ʻi he foʻi vitiō No Blood—Medicine Meets the Challenge. Hili iá, siviʻi hoʻo mahinó ʻaki ʻa e ngaahi fehuʻi ko ʻení.—Fakatokangaʻi: Koeʻuhi ʻoku kau ʻi he vitioó ʻa e ngaahi konga nounou fakaetafa, ʻoku totonu ke fakapotopoto ʻa e ngaahi mātuʻá ʻi he sio mo e fānau īkí he foʻi vitioó.

(1) Ko e hā ʻa e ʻuhinga tefito ʻoku fakafisi ai ʻa e Kau Fakamoʻoni ʻa Sihová mei he huhu totó? (2) ʻI he fekauʻaki mo e tokangaʻi fakafaitoʻó, ko e hā ʻoku fiemaʻu ʻe he Kau Fakamoʻoni ʻa Sihová? (3) Ko e hā ʻa e totonu tefito ʻoku maʻu ʻe he kau mahakí? (4) Ko e hā ʻoku ʻuhinga lelei ai pea ko ha fatongia ia ke fili ʻa e ngaahi faitoʻo fetongi ʻo e huhu totó? (5) ʻI he taimi ʻoku mole lahi ai ha toto, ko e hā ʻa e ongo ngāue fakavavevave ke fai ʻe he kau toketaá? (6) Ko e hā ʻa e founga faitoʻo tefito ʻe fā ʻoku fetongi ʻaki ʻa e huhu totó? (7) ʻE anga-fēfē nai ʻa hono hanga ʻe he kau toketaá ʻo (a) fakasiʻisiʻi e mole ʻa e totó, (e) fakatolonga ʻa e ngaahi sela toto kulokulá, (f) fakakake ʻa e faʻunga ʻo e totó pea (h) fakafoki ʻa e toto ne molé? (8) Fakamatalaʻi ʻa e ongo founga ʻoku ʻiloa ko e (a) fakamanifi ʻa e totó (hemodilution) mo e (e) fakahaofi sela totó (cell salvage). (9) Ko e hā ʻoku totonu ke ke ʻilo fekauʻaki mo ha faʻahinga faitoʻo fetongi pē ʻo e huhu totó? (10) ʻE lava ke fai ha tafa lahi mo faingataʻa ʻo taʻekau ai ʻa e huhu totó? (11) Ko e hā ʻa e fakalakalaka ʻaonga kuo hoko ʻi he tafaʻaki fakafaitoʻó?

Ko hono tali ha niʻihi ʻo e ngaahi faitoʻo ʻoku fakaeʻa ʻi he foʻi vitioó ko ha fili fakafoʻituitui ia ʻo fakatatau ki he konisēnisi ʻo e toko taha taki taha kuo akoʻi ʻe he Tohi Tapú. Kuó ke fakapapauʻi ʻa e ngaahi faitoʻo fetongi ʻo e huhu totó ʻa ia ʻokú ke loto-lelei ke tali maʻau mo hoʻo fānaú? Ko e ngaahi mēmipa ʻo e fāmilí ʻa ia ʻoku ʻikai ko ha Fakamoʻoní ʻoku toe totonu foki ke nau lāuʻilo kakato ki hoʻo ngaahi filí pea mo e ngaahi ʻuhinga ki aí.—Sio ki he “Ngaahi Fehuʻi mei he Kau Lautohí” ʻi he ʻīsiu ʻo e Taua Leʻo ʻo Sune 15, 2004 mo ʻOkatopa 15, 2000.