Kuo Pau Ke Ke Sio ʻi he Foʻi Vitiō No Blood—Medicine Meets the Challenge
Ko e hā hono lahi ʻo hoʻo ʻilo fekauʻaki mo e ngaahi meʻa ke fili ki ai ʻoku ala maʻu ʻi he malaʻe ʻo e faitoʻo taʻekau ai ha totó? ʻOkú ke mahinoʻi ʻa e niʻihi ʻo e ngaahi meʻa kehe ke fili ki ai ʻi he huhu totó mo e founga ʻo ʻenau ngāué? Sio ʻi he foʻi vitiō ko ení, pea ʻahiʻahiʻi hoʻo ʻiló ʻaki ʻa e ngaahi fehuʻi ko ení.—Fakatokangaʻi: Koeʻuhi ʻoku kau ʻi he foʻi vitioó ʻa e ngaahi konga nounou fakaetafa, ʻoku totonu ke ngāueʻaki ʻe he ngaahi mātuʻá ʻa e fakapotopotó ʻi he mamata he foʻi vitioó mo e fānau īkí.
(1) Ko e hā ʻa e ʻuhinga tefito ʻoku fakafisi ai ʻa e Kau Fakamoʻoni ʻa Sihová mei he huhu totó, pea ʻoku maʻu ʻi fē ʻi he Tohitapú ʻa e tefitoʻi moʻoni ko iá? (2) ʻI heʻene hoko mai ki he tokanga fakafaitoʻó, ko e hā ʻoku tau fakaʻamu ki aí? (3) Ko e hā ʻa e totonu tefito ʻoku maʻu ʻe he kau mahakí? (4) Ko e hā ʻoku ʻuhinga lelei ai mo totonu ke siʻaki ʻa e huhu totó? (5) ʻI heʻene hoko ha fānoa lahi ʻa e totó, ko e hā ʻa e ongo meʻa fakavavevave tefito ʻe ua ʻoku maʻu ʻe he kau toketaá? (6) Ko e hā ʻa e ngaahi fakatuʻutāmaki ki he moʻuí ʻoku fekauʻaki mo e huhu totó? (7) Ko e hā ʻa e niʻihi ʻo e ngaahi meʻangāue ʻoku ala maʻu ʻe he kau toketā tafá ke fakasiʻisiʻi ai ʻa e mole ʻa e totó lolotonga ʻa e tafá? (8) Ko e hā ʻoku totonu ke ke loto ke ʻiloʻi fekauʻaki mo ha meʻa kehe ko e fetongi ʻo e huhu totó? (9) ʻE lava ke fakahoko ha ngaahi tafa lalahi mo faingataʻa ʻo taʻekau ai ʻa hono ngāueʻaki ʻo e huhu totó? (10) Ko e hā ʻoku loto-lelei ki ai ha kau toketā tokolahi ange ke fai maʻá e Kau Fakamoʻoni ʻa Sihová, pea ko e hā nai ʻe faifai pē ʻo hoko ko e tuʻunga ia ʻo hono tokangaʻi ʻo e kau mahaki kotoa pē?
ʻOku ʻikai ha veiveiua ʻe ʻaonga ke sio ʻi he foʻi vitiō No Blood fakataha mo ha kau ako Tohitapu pē, ngaahi hoa pe kāinga ʻikai ko e Fakamoʻoní, ngaahi kaungāngāué, kau faiakó, mo e kaungāako ʻa ia te nau ʻohake nai ha ngaahi fehuʻi fekauʻaki mo e anga ʻetau tuʻu fekauʻaki mo e totó. Ko hono tali ha faitoʻo pē ʻoku ʻomai ʻi he foʻi vitioó ko ha fili tāutaha fakakonisēnisi ia.—Sio ki he “Ngaahi Fehuʻi mei he Kau Lautohí” ʻi he ʻīsiu ʻo e Taua Leʻo ʻo Sune 15 mo ʻOkatopa 15, 2000.