Puha Fehuʻi
◼ Ko e hā ʻa e founga lelei taha ke fai ai ʻa e ngaahi tokoni fakapaʻanga ke maʻu ʻaonga mei ai ʻa e fanga tokoua fusimoʻomo ʻi he ngaahi fonua kehé?
ʻOku ʻi ai ʻa e taimi ʻoku tau fanongo ai ʻo kau ki he fanga tokoua ʻi ha fonua kehe ʻoku nau aʻusia ai ʻa e fiemaʻu fakamatelie koeʻuhi ko e fakatangá, fakatamakí pe ngaahi tuʻunga faingataʻa kehé. Kuo ueʻi ʻa e fanga tokoua ʻe niʻihi ke nau ʻave fakahangatonu ha paʻanga ki he ngaahi ʻōfisi vaʻa ʻi he ngaahi fonua peheé, ʻo kole ke ngāueʻaki ʻa e paʻangá ke tokoniʻiʻaki ha faʻahinga pau, ha fakatahaʻanga pau pe ko ha ngāue langa kuo palani ke fakahoko.—2 Kol. 8:1-4.
Lolotonga ʻoku ala fakaongoongoleleiʻi ʻa e tokanga anga-ʻofa pehē ki he ngaahi kaungātuí, ʻoku faʻa ʻi ai ʻa e ngaahi fiemaʻu ʻoku toe fakavavevave ange ʻi he meʻa ʻoku fakakaukau ki ai ʻa e tokotaha-foakí. ʻI he ngaahi tuʻunga ʻe niʻihi, kuo ʻosi tokangaʻi ʻa e fiemaʻu ia naʻe fakataumuʻa ke fai ki ai e tokoní. ʻOku moʻoni, ʻe lava ke tau falala-pau ko e taimi ko ia ʻoku ʻave ai ha ngaahi tokoni ki he ʻōfisi vaʻa fakafeituʻú maʻá e ngāue ʻi māmani lahí, ko e Paʻanga Fale Fakatahaʻangá, pe ko e tokoni ki ha fakatamakí, ko e ngaahi paʻanga foaki peheé ʻe ngāueʻaki ia ʻo fakatatau ki he fakahinohino ʻa e tokotaha-foakí.
Kuo akoʻi fakaʻāuliliki ʻa e fanga tokoua ʻi he kotoa ʻo e ngaahi vaʻá ke nau fai ha tali vave ki he ngaahi fiemaʻu taʻeʻamanekiná. ʻI he ngaahi tuʻungá kotoa, ʻoku toutou fakamatala ʻa e vaʻá ki he Kulupu Pulé ʻo felāveʻi mo e meʻá. Kapau ʻe fiemaʻu ha toe tokoni, ʻe fakaafeʻi nai ʻe he Kulupu Pulé ʻa e ngaahi vaʻa ofi maí ke nau tokoni pe ko hono ʻave fakahangatonu nai ʻa e paʻangá mei he ʻuluʻi-ʻapitangá.—2 Kol. 8:14, 15.
Ko ia ai, ko e kotoa ʻo e ngaahi tokoni ʻoku fakataumuʻa ki he ngāue ʻi māmani lahí, ngaahi ngāue langa ʻi he ngaahi fonua kehé, pe tokoni ki ha fakatamakí ʻoku totonu ke ʻave ia ki he ʻōfisi vaʻa ʻi he fonua ʻa ia ʻokú ke nofo aí, ʻo fakafou ʻi he fakatahaʻangá pe fakahangatonu. ʻI he founga ko ení, ko e “tamaioeiki agatonu mo boto,” fakafou ʻi he ngaahi fokotuʻutuʻu fakaekautaha kuo fokotuʻu ʻe he Kulupu Pulé, ʻoku nau tokangaʻi ʻa e ngaahi fiemaʻu ʻa e fetokouaʻaki ʻi māmani lahí ʻi ha founga maau.—Mt. 24:45-47, PM; 1 Kol. 14:33, 40.