Taimi-Tēpile Fakafāmilí—Malaʻe Ngāue ʻa e Fāmilí
1 ʻOku fiefia ʻa Sihova ke sio ki he faʻahinga kei īkí ʻoku nau fakahīkihikiʻi ʻa hono huafá. (Sāme 148:12, 13) ʻI he ʻaho ʻo Sīsuú naʻa mo e ‘tamaikí mo e valevalé naʻa nau fakamalo’ ki he ʻOtuá. (Mt. 21:15, 16) ʻOku hoko ʻa e meʻa tatau ʻi he ʻahó ni. Ngaahi mātuʻa, ʻe lava fēfē ke mou tokoniʻi hoʻomou fānaú ke nau tupu ʻo hoko ko e kau fakahīkihiki faivelenga ʻo Sihova ʻi he ngāue fakafaifekau faka-Kalisitiané? Ke toe ʻai, hangē ko ia naʻe fakamamafaʻi ʻi ʻolunga ʻi he kupu ʻo e ngaahi fakataha ʻa e fakatahaʻangá, ko ha tefitoʻi meʻa mahuʻinga ʻa hoʻo faʻifaʻitakiʻangá. Naʻe lea ha tamai ʻe taha ʻo fakahaaʻi ʻa e ongoʻi ʻoku hokosia ʻe he ngaahi mātuʻa lahi ʻi heʻene pehē: “ʻOku ʻikai ke fai ʻe he fānaú ia ʻa e meʻa ʻokú ke leaʻakí; ʻoku nau fai ʻa e meʻa ʻokú ke faí!”
2 Naʻe manatu ha tuofefine naʻe tauhi hake ʻe ha ongo mātuʻa manavahē-ʻOtua: “Naʻe ʻikai te mau teitei ʻā hake ʻi ha pongipongi Tokonaki ʻo ʻeke pe te mau ʻalu ʻi he ngāue fakamalangá. Naʻa mau ʻilo te mau ʻalu.” ʻI he tuʻunga meimei tatau, ʻe lava ke ke fakahūhū ki hoʻo fānaú ʻa e mahuʻinga ʻo e ngāue fakamalangá ʻaki hono fokotuʻu ha founga-tuʻumaʻu fakauike hokohoko ke kau fakafāmili ʻi he ngāue fakamalangá. ʻOku ʻikai ngata pē ʻi hono fakaʻatā heni hoʻo fānaú ke nau ako mei he mamata kia koé ka ʻoku toe ʻai ai ke ke malava ʻo fakatokangaʻi ʻenau fakakaukaú, ngaahi tōʻongá mo e ngaahi pōtoʻi kuo nau fakatupulekiná.
3 Akoʻi Hokohoko: Ke fiefia ʻa e fānaú ʻi he ngāue fakafaifekaú, ʻoku fiemaʻu ke teuteuʻi kinautolu ko e taumuʻá ke nau kau ola lelei ki ai. Naʻe toe pehē ʻe he tuofefine naʻe lave ki ai ʻanenaí: “Naʻe ʻikai ʻaupito ko ha kau muimui noaʻia kimautolu ʻo fakafeʻao pē ki heʻemau ongo mātuʻá ʻi heʻena ngāué. Naʻa mau ʻilo ʻoku ʻi ai homau kaunga, neongo ko hano tā pē ha fafangu ʻi he matapaá mo tuku ai ha lauʻipepa-tuʻuaki. ʻI he teuteu lelei ki muʻa ʻi he ngaahi ngāue taki taha ʻi he fakaʻosinga ʻo e uiké, naʻa mau ʻilo ʻa e meʻa te mau leaʻakí.” ʻE lava ke ke tokonaki ha akoʻi pehē ki hoʻo fānaú ʻaki ʻa e vaheʻi ha ngaahi miniti siʻi ʻi he uike taki taha ke teuteuʻi ai kinautolu ki he ngāue fakafaifekaú, ʻi he lolotonga ʻa e ako fakafāmilí pe ko ha taimi kehe pē.
4 Ko e malanga fakataha ko ha fāmilí ʻoku ʻoatu ai kiate koe ʻa e faingamālie lahi ange ke uhuʻi ʻa e moʻoní ki hoʻo fānaú. Naʻe ʻave ʻe ha tamai Kalisitiane ʻe taha ʻa hono ʻofefiné ʻi heʻene luelue he kilomita ʻe hongofulu pea toe pehē ki heʻene fokí ke tufaki ai ʻa e ngaahi tuleki ki he kau nofo ʻi he ngaahi kolo ʻi he teleʻa hoko maí. “ʻI he lolotonga ʻo e luelue ko iá,” naʻá ne manatu lelei, “naʻe fakahūhū ai ʻe heʻeku tamaí ʻa e moʻoní ʻi hoku lotó.” (Teu. 6:7) ʻOfa ke tāpuakiʻi tatau pē mo kimoutolu ʻi hoʻomou ʻai ʻa e ngāue fakamalangá ko e konga ʻo hoʻomou taimi-tēpile fakafāmili fakauiké.