Konga 10​—Fai ʻa e Ngaahi Ako Tohi Tapu Fakalakalaká

Akoʻi ʻa e Kau Akó ʻi he Ngāue Fakafaifekau Fale-ki-he-Falé

¹ ʻI hono fakapapauʻi ʻe he kau mātuʻá ʻoku taau ha tokotaha ako Tohi Tapu ke ne hoko ko ha tokotaha malanga teʻeki papitaisó, te ne kamata nai ke kau fakataha mo e fakatahaʻangá ʻi he ngāue fakamalanga ki he kakaí. (Sio ki he Organized to Do Jehovah’s Will, p. 79-81.) ʻE lava fēfē ke tau tokoniʻi ʻa e tokotaha akó ke ne aʻusia ʻa e taumuʻa ʻo e malanga mei he fale ki he falé?

² Teuteu Fakataha: ʻOku ʻikai ha meʻa te ne toe fetongi ʻa e teuteu leleí. Fakahaaʻi ange ki he tokotaha akó ʻa e feituʻu te ne maʻu ai ʻa e ngaahi tuʻuaki ʻoku fokotuʻu maí ʻi he ʻEtau Ngāue Fakafaifekau ʻo e Puleʻanga mo e tohi Reasoning, pea tokoniʻi ia ke ne fili ha tuʻuaki faingofua ʻa ia ʻoku ʻaonga ki he feituʻu fakalotofonuá. Mei he kamatá, fakalototoʻaʻi ia ke ne fakahaaʻi ʻa e Tohi Tapú ʻi heʻene ngāue fakafaifekaú.—2 Tim. 4:2.

³ Ko e ngaahi taimi ʻahiʻahí ʻoku mātuʻaki ʻaonga ia ki ha tokotaha malanga foʻou. ʻI he ʻahiʻahiʻi ʻe he tokotaha akó ʻa e tuʻuakí, fakahaaʻi kiate ia ʻa e founga ke fekuki pōtoʻi ai mo e ngaahi tali ʻoku anga-maheniʻaki ʻi he feituʻú. (Kol. 4:6) Fakapapauʻi kiate ia ko e kau faifekau Kalisitiané ʻoku ʻikai fiemaʻu ke nau ʻiloʻi ʻa e tali ki he fehuʻi kotoa pē ʻe ʻeke nai ʻe ha tokotaha-ʻapi. ʻOku faʻa lelei tahá ke tali ʻa e ngaahi fehuʻi peheé ʻaki hono tuʻuaki ange ke ke fai ha fekumi pea ke toe foki ke fai ha lāulea lahi ange ki he meʻá.—Pal. 15:28.

⁴ Malanga Fakataha: Ko e fuofua taimi ko ia ke kau ai ʻa e tokotaha akó ʻi he ngāue fakafaifekau fale-ki-he-falé, tuku ke ne sio ʻi hoʻo fai ʻa e tuʻuaki naʻá mo teuteu fakatahá. Pea fakakau ia ki ai. ʻI he ngaahi tuʻunga ʻe niʻihi, ʻe lelei tahá nai ke ʻai ʻa e tokotaha malanga foʻoú ke ne fai ha konga pē ʻo e tuʻuakí, hangē ko e lautohi mo e poupou ʻi ha konga Tohi Tapu. Fai ha fakakaukau ki he angaʻitangata mo e ngaahi malava ʻo e tokotaha akó. (Fili. 4:5) Hoko ʻo anga-ʻofa ʻi hoʻo ʻoatu ʻa e fakaongoongoleleí ʻi hoʻo akoʻi fakalakalaka ia ʻi he ngaahi tafaʻaki kehekehe ʻo e ngāue fakamalangá.

⁵ ʻOku mahuʻinga ke tokoniʻi ha tokotaha malanga foʻou ke ne fokotuʻu ha taimi-tēpile tuʻumaʻu ʻi he kau ki he ngāue fakafaifekaú, ʻo fai fakauike ia ʻo ka malava. (Fili. 3:16) Fai ha ngaahi fokotuʻutuʻu papau ke ngāue fakataha ai ʻi he malangá, pea fakalototoʻaʻi ia ke ne ngāue fakataha foki mo e faʻahinga faivelenga kehé. Ko ʻenau faʻifaʻitakiʻangá mo e feohí te ne tokoniʻi ia ke ne fakatupulekina ai ha pōtoʻi pea maʻu ai ʻa e fiefia ʻi he malanga mei he fale ki he falé.