Fakaleleiʻi ʻEtau Pōtoʻi ʻi he Ngāue Fakafaifekaú—Akoʻi ʻa e Faʻahinga Foʻoú

ʻUhinga ʻOku Mahuʻinga Aí: Ko e kau ākonga foʻou ʻa Sīsuú kuo pau ke nau ako ke tauhi ʻa e “ngaahi meʻa kotoa pē” naʻá ne fekauʻí, ʻa ia ʻoku kau ai hono akoʻi ʻa e moʻoní ki he niʻihi kehé. (Māt. 28:19, 20) Ko e faʻahinga foʻou tokolahi kuo nau taau ke kau ki he Ako Fakafaifekau Fakateokalatí pea nau faifakamoʻoni nai ʻi he founga ʻikai anga-maheni ki he ngaahi mēmipa ʻo e fāmilí pe kaungāmeʻá. Kae kehe, ʻi he tupulaki ʻenau houngaʻia ʻi he meʻa ʻoku nau akó pea hoko ʻo ʻiloʻi ʻa e finangalo ʻa Sihova ke fanongo ʻa e kakai kotoa pē ki he ongoongo leleí, te nau fakahaaʻi nai ha holi ke kau ki he ngāue fakafaifekaú. (Loma 10:13, 14) Hili ʻa e taau e faʻahinga foʻoú ke malanga teʻeki papitaisó, ko e akoʻi lelei kinautolú ʻe tokoniʻi ai ke nau toe loto-maʻu ange ʻi heʻenau fou ʻi he sitepu mahuʻinga ko eni ʻo ʻenau fakalakalaka fakalaumālié.—Luke 6:40.

Founga Hono Fai Iá:

Tokoniʻi ʻa e tokotaha malanga foʻoú ke maʻu ʻa e ʻū tohi te ne fiemaʻu ʻi he ngāue fakamalangá mo e faiakó. Fakahaaʻi kiate ia ʻa e anga hoʻo faʻo hoʻo kato malangá pea fakamatalaʻi kiate ia ʻa e taumuʻa ʻo e tohi taki taha ʻokú ke faʻó.
Mo fili fakataha ha sīpinga tuʻuaki mei he Ko ʻEtau Ngāue Fakafaifekau pea ʻahiʻahiʻi ia. Fakalototoʻaʻi ʻa e tokotaha foʻoú ke fakalea pē ʻa e tuʻuakí ʻi he lea pē ʻaʻana. ʻAhiʻahiʻi ʻa e ngaahi fokotuʻutuʻu mei he tohi Ako Fakafaifekau, peesi 82, ʻa ia ʻoku hoko tonu ʻi ho feituʻu ngāué. Fakamamafaʻi ʻa e mahuʻinga ʻo e vala mo e teuteu fakanānaá.—2 Kol. 6:3, 4.
Akoʻi hokohoko. Fakahaaʻi ki he tokotaha malanga foʻoú ʻa e mape ʻo e feituʻu ngāué, pea akoʻi ia ki he founga ke tauhi ai ha ngaahi lēkooti tonu. Fakahāhaaʻi ʻa e founga ke hiki ai ʻa e faʻahinga mahuʻingaʻiá. Akoʻi kiate ia ʻa e founga ke ngāueʻaki ai ʻa e jw.org ʻi he ngāue fakafaifekaú pehē ki he kiʻi tohi Good News for People of All Nations. Tokoniʻi ia ke fakatupulekina ʻa e mahuʻingaʻia ʻa e faʻahinga naʻá ne maʻú.—1 Kol. 3:6.
Anga-kātaki mo fai ha fakaongoongolelei. (Pal. 25:11) Fokotuʻu ha faʻifaʻitakiʻanga lelei. Ko hoʻo faivelenga mo hoʻo fakahāhā ʻa e mahuʻingaʻia fakafoʻituitui ʻiate iá ʻe ʻi ai ʻene ola lelei ʻi he ngaahi taʻu ka hoko maí.

ʻAhiʻahiʻi Eni ʻi he Lolotonga ʻa e Māhiná:

Ngāue fakataha mo hoʻo tokotaha akó ʻi he ngāue fakafaifekau fale-ki-he-falé, pea ʻalu mo ia ki haʻo toe ʻaʻahi pe ako Tohi Tapu. Kapau ʻoku ʻikai ʻi ai haʻo tokotaha ako, fakaafeʻi ha tokotaha malanga ʻikai loko taukei ke mo ngāue fakataha.