Ko ha Fakamoʻoni ʻo ʻIkai Ngāueʻaki ʻa e Leá
1 ʻI he ʻikai leaʻaki ha ngaahi foʻi leá, ʻoku fakaeʻa hā mahino ʻe he fakatupu fakamatelie ʻa Sihová ʻa hono ngaahi ʻulungāanga taʻehāmaí. (Sāme 19:1-3; Loma 1:20) ʻI he tuʻunga meimei tatau, ko ʻetau ʻulungāanga leleí, ngaahi ʻulungāanga faka-Kalisitiané pea mo hotau fōtunga fakanānaá ʻokú ne ʻoatu ha fakamoʻoni ʻo ʻikai ngāueʻaki ʻa e leá. (1 Pita 2:12; 3:1-4) ʻOku totonu ko e holi ia ʻa e tokotaha tāutaha ʻo kitautolú ke tau “fakaogolelei ae akonaki oe Otua, ko ho tau Fakamoui, i he mea kotoabe” ʻi he founga ʻoku tau tōʻongaʻaki ʻiate kitautolú.—Tai. 2:10, PM.
2 ʻOku anga-fēfē ʻa e malava ki he faʻahinga ʻo e tangata angahalaʻiá ke nau ʻai ke ngingila e ngaahi akonaki ʻa e Tohi Tapú? ʻOku malava ení ʻo fakafou pē ʻi he tataki ʻa e Folofola ʻa e ʻOtuá pea mo e mālohi ʻo e laumālie māʻoniʻoní. (Sāme 119:105; 143:10) Ko e folofola ʻa e ʻOtuá “ko e koto moʻui mo e koto malohi, pea masila ange ʻi he heleta fakatoumata fuape.” (Hep. 4:12) ʻOkú ne hū loloto ʻiate kitautolu mo fakaivia kitautolu ke ʻai ʻa e tangata foʻoú. (Kol. 3:9, 10) ʻOku faʻu ʻe he laumālie māʻoniʻoní ʻiate kitautolu ʻa e ngaahi ʻulungāanga fakamānako ʻo hangē ko e anga-leleí, leleí, anga-maluú pea mo e mapuleʻi-kitá. (Kal. 5:22, 23) ʻOku tau fakaʻatā fakafoʻituitui ʻa e folofolá mo e laumālie ʻo e ʻOtuá ke ngāue ʻi heʻetau moʻuí?—Ef. 4:30; 1 Tes. 2:13.
3 ʻOku Fakatokangaʻi ʻe he Niʻihi Kehé: ʻI he taimi ʻoku tau moʻui ai ʻo fakatatau ki he ngaahi tuʻunga ʻa Sihová pea feinga ke tapua atu ʻa hono ngaahi ʻulungāangá, ʻoku fakatokangaʻi ia ʻe he niʻihi kehé. Ko e fakatātaá, fakakaukau angé ki he tangata naʻe manumanukiʻi ʻe hono ngaahi kaungāngāué koeʻuhí ko ʻene lekapaí. Ko ha tuofefine naʻe ngāue ʻi he ʻōfisi tatau naʻá ne fakangeingeiaʻi mo fakaʻapaʻapaʻi maʻu pē ia. Naʻe ueʻi ai ia ʻe he meʻá ni ke ne ʻeke ange pe ko e hā naʻá ne mātuʻaki kehe aí. Naʻe fakamatala ʻa e tuofefiné ʻo pehē ko ʻene ʻulungāanga fakaʻapaʻapá naʻe hoko iá ko e ola ʻo hono ngāueʻaki ʻa e ngaahi tefitoʻi moʻoni Fakatohitapú ʻi heʻene moʻuí. Naʻá ne toe tala ange foki kiate ia ʻa e ʻamanaki fakaofo ʻo e Puleʻangá. Naʻe kamata ke ako ʻa e Tohi Tapú ʻe he tangatá pea faifai atu pē ʻo ne fakalakalaka ʻo papitaiso. ʻI he taimi naʻá ne foki ai ki hono fonua tupuʻangá, naʻe maongo ki hono kāingá ʻa ʻene ʻulungāanga leleí pea ko e tokolahi ʻo kinautolu naʻa nau tali foki ʻa e moʻoní.
4 ʻI he ngāué, akó, pe ʻi he feangainga mo e ngaahi kāingá mo e kaungāʻapí, ʻe lava ke hanga ʻe heʻetau ʻulungāanga leleí, fakataha mo ʻetau fakamoʻoní ʻo ʻai ʻa e niʻihi kehé ke nau ʻoatu ʻa e lāngilangí ki he ʻOtuá.—Mt. 5:16.