Meʻa ʻOku Lavaʻi ʻe Heʻetau Ngāue Fakafaifekaú
1. ʻOku anga-fēfē ʻa e vakai ʻa Sihova ki heʻetau ngāue fakafaifekaú, pea ko e hā e tali ki ai ʻa e faʻahinga ʻo e tangatá?
1 ʻOku fakamatalaʻi ʻe he Folofola ʻa e ʻOtuá ʻa e kau Kalisitiané ʻoku nau laka fiefia ʻi he ngāue ʻa Sihová, ʻo hangē ʻoku nau ʻi ha lotolotonga ʻo ha fuʻu laka ikuná. (2 Kol. 2:14-16) ʻI heʻetau ʻai ko ia ke ʻiloa ʻa hono ʻiloʻi ʻo e ʻOtuá, ʻoku hangē ai ʻa ʻetau ngaahi feilaulau ʻo e ngāué ha ʻinisēnisi fakahōifua kia Sihová. Ko e kakai ʻe niʻihi ʻoku tohoakiʻi kinautolu ki he huhuʻa ifo ʻo e ongoongo leleí; ko e niʻihi kehé ʻoku nau talitekeʻi ia ʻe kinautolu. Ka ko e tali ʻikai lelei ʻa e tokolahi ʻoku ʻikai ʻuhinga ia ai ʻoku taʻelavameʻa ʻa ʻetau ngāué. Fakakaukau atu ki he meʻa kuo lavaʻi ʻe heʻetau ngāue fakafaifekaú.
2. Ko e hā ʻoku fakaivia kitautolu ʻe heʻetau ngāue fakafaifekaú ke tau fakahāhaá?
2 Fakahīkihikiʻi ʻo Sihová: ʻOku taukaveʻi ʻe Sētane ʻoku tauhi ʻa e faʻahinga ʻo e tangatá kia Sihova ʻi he ngaahi ʻuhinga siokita. (Siope 1:9-11) ʻOku ʻomai ʻe he ngāue fakafaifekau faka-Kalisitiané kiate kitautolu ha faingamālie ke fakahāhā ai ko ʻetau līʻoa ki he ʻOtuá ʻoku moʻoni. ʻOku hokohoko atu ʻa e kau malanga tokolahi ke talangofua ki he fekau ke malanga mo ngaohi ākongá neongo ʻa e ngaahi tuʻunga faingataʻa fakafoʻituituí pe ko e taʻemahuʻingaʻia fakalūkufua ʻa e kakaí. Ko e faʻahinga kītaki mateaki peheé ʻokú ne ʻai ai ʻa e loto ʻo Sihová ke fiefia!—Pal. 27:11.
3. Ko e hā ʻoku mātuʻaki mahuʻinga ai kiate kitautolu ke tau hokohoko atu hono ʻai ke ʻiloa ʻa e huafa mo e taumuʻa ʻa e ʻOtuá?
3 Tānaki atu ki aí, ʻoku kaunga foki ʻa ʻetau ngāue fakafaifekaú ki hono fakahoko e taumuʻa ʻa e ʻOtuá. ʻI he fekauʻaki mo e fakaʻauha ʻoku ene ke hoko ki he māmani ʻo Sētané, ʻoku pehē ʻe Sihova: “ʻE ʻilo ʻa e ngaahi puleʻanga ko Sihova au.” (Isi. 39:7) Ke ʻiloʻi eni ʻe he ngaahi puleʻangá, ʻoku mātuʻaki mahuʻinga ki he kau sevāniti ʻa e ʻOtuá ke nau hokohoko atu ʻa hono talaki ʻa hono huafá mo ʻene taumuʻá “ki he puleʻanga kotoa pē, mo e matakali, mo e lea, mo e faʻahinga.”—Fkh. 14:6, 7.
4. ʻOku anga-fēfē ʻa e hoko ʻa e ngāue fakamalangá ko ha makatuʻunga ia ki he fakamāú?
4 Makatuʻunga ki he Fakamāú: Ko hono malangaʻi ʻo e ongoongo leleí ʻoku toe hoko ia ko ha makatuʻunga ki he fakamāú. Naʻe fakahaaʻi ʻe he ʻapositolo ko Paulá ʻo pehē ʻe fakahoko ʻe Sīsū Kalaisi ʻa e sāuni “kiate kinautolu oku ikai te nau ilo ae Otua, bea oku ikai talangofua ki he ogoogolelei o ho tau Eiki ko Jisu Kalaisi.” (2 Tes. 1:8, 9, PM) ʻE fakamāuʻi ʻa e kakaí ʻaki ʻa ʻenau tali ki he ongoongo leleí. He fatongia mafatukituki ē ʻoku tuku ʻe he meʻá ni ki he kau sevāniti ʻa e ʻOtuá! Koeʻuhi ke fakaʻehiʻehi mei he halaia ʻi he totó, kuo pau ai ke ʻoua te tau tauholomui mei hono ʻai ke ʻiloa ʻa e pōpoaki fakahaofi moʻui ʻo e Puleʻangá.—Ng. 20:26, 27.
5. ʻOku anga-fēfē ʻa hono tapua atu ʻa e meesi ʻa e ʻOtuá ʻi heʻetau ngāue fakafaifekaú?
5 Ko ʻetau ngaahi feinga hokohoko ke tokoniʻi ʻa hotau ngaahi kaungāʻapí ke nau maʻu e hōifua ʻa e ʻOtuá ko ha fakahāhā ia ʻo e meesi ʻa Sihová. (1 Tim. 2:3, 4) ʻI hono ʻiloʻi ko ia ʻoku feliliuaki maʻu pē ʻa e moʻui ʻa e kakaí, ʻoku tau toe toutou ʻalu ai kiate kinautolu ʻo fakaʻaiʻai ke nau kumi kia Sihova lolotonga ʻoku kei ʻi ai ʻa e taimí. ʻI he fai peheé, ʻoku tau tapua atu ai ʻa e “manavaʻofa ongongofua ʻa hotau ʻOtuá,” ʻa ia ʻoku “ʻikai te ne finangalo ke ʻauha ha taha, ka ke aʻusia ʻa e fakatomala ʻe he kakai kotoa pe.”—Luke 1:78, NW; 2 Pita 3:9.
6. ʻOku anga-fēfē ʻa e ʻaonga kiate kitautolu ʻa e hanganaki moʻua ʻi he ngāue ʻa Sihová?
6 ʻAonga Kiate Kitautolú: Ko e hanganaki moʻua ʻi he ngāue ʻa Sihová ko ha maluʻanga ia kiate kitautolu. ʻOkú ne tokoniʻi ai kitautolu ke tau hanganaki “fakakaukau ki he ʻi ai ʻa e ʻaho ʻo Sihová” pea ke fakaʻehiʻehi mei he hoko ʻo ʻuliʻi ʻe he fokotuʻutuʻu fulikivanu lolotonga ʻo e ngaahi meʻá. (2 Pita 3:11-14, NW; Tai. 2:11, 12) Ko ia ai, ʻofa ke tau hoko ʻo “tuʻu maʻu, taʻe ngaūe, ʻo [tau] tupulekina maʻu ai pe ʻi he ngaue ʻa e ʻEiki,” ʻi he ʻiloʻi ko ʻetau ngaahi feinga ʻi he ngāue fakafaifekau faka-Kalisitiané ʻoku ʻikai ko e koto kulanoa.—1 Kol. 15:58.