Ako ʻOku Taki Atu ki he Moʻuí
1 He meʻa fakafiemālie moʻoni ia ke sio ki he ulo ʻa e mata ʻo e kakaí ʻi heʻenau hoko ʻo mahinoʻi ʻa e moʻoni mei he Folofola ʻa e ʻOtuá! ʻOku moʻoni ko e meʻa fakafiemālie ʻa hono vahevahe atu ki he niʻihi kehé ʻa e ʻilo ki he ʻOtuá mo ʻene taumuʻa ki he faʻahinga ʻo e tangatá. Ko e faʻahinga ako peheé ʻe lava ke taki atu ai ha tokotaha ki he moʻui taʻengatá.—Sione 17:3.
2 ʻUhinga ʻOku Māʻolunga Ange Aí: ʻOku ʻomai ʻa e akó he ʻahó ni ʻi he meimei founga kotoa pē ʻoku ala malavá pea ʻi he meimei kaveinga kotoa pē ʻe ala fakaʻuta atu ki aí. (Koh. 12:12) Ka ko e ʻilo peheé ʻoku ʻikai lava ke fakahoa ia ʻi hono mahuʻingá ki he “ngaahi meʻa lalahi ʻa e ʻOtua.” (Ng. 2:11) Kuo malava nai ʻe he ako kuo ʻomai ʻi he māmaní ke ne tohoaki ke ofi ange ʻa e faʻahinga ʻo e tangatá ki he Tokotaha-Fakatupú pea ki hono ʻiloʻi ʻene taumuʻá? Kuó ne tokoniʻi nai ʻa e kakaí ke nau mahinoʻi ʻa e meʻa ʻoku hoko ʻi he taimi ʻoku tau mate aí pe ko e ʻuhinga ʻoku lahi fau ai ʻa e faingataʻá? Kuó ne ʻoange nai ha ʻamanaki ki he kakaí? Kuó ne tokoni nai ke fakaleleiʻi ʻa e fokotuʻutuʻu fakafāmilí? ʻIkai. Fakafou ʻi he ako fakaʻotuá pē ʻe lava ke tau maʻu ai ʻa e ngaahi tali moʻoni ki he ngaahi fehuʻi mahuʻinga taha ʻi he moʻuí.
3 ʻOku tokonaki mai ʻe he ako fakaʻotuá ha meʻa ʻoku hala ʻaupito pē ke maʻu ʻi he māmani ʻo e ʻaho ní—ko hono fakaleleiʻi ʻa e tuʻunga fakaeʻulungāangá. ʻOku taʻaki fuʻu ʻe he Folofola ʻa e ʻOtuá ʻa e lau fakamatakalí, lau fakafaʻahingá mo e mamahiʻi-fonuá mei he loto ʻo e faʻahinga ʻoku nau tali pea ngāueʻaki ʻa ʻene ngaahi akonakí. (Hep. 4:12) Kuó ne ueʻi ʻa e kakaí ke nau siʻaki atu ʻa e faʻahinga kotoa pē ʻo e fakamālohí pea ‘kuo nau ʻai ʻa e tangata foʻoú.’ (Kol. 3:9-11; Mai. 4:1-3) ʻIkai ngata aí, kuo ʻoange ʻe he ako fakaʻotuá ki he laui miliona ʻa e mālohi ke nau ikuʻiʻaki ʻa e ngaahi founga moʻui mo e ngaahi tōʻonga faiaka loloto ʻoku taʻefakahōifua ki he ʻOtuá.—1 Kol. 6:9-11.
4 ʻUhinga ʻOku Fakavavevave Ai he Taimi Ní: ʻOku fakatokanga mai kia kitautolu ʻa hotau Tokotaha Faiako Maʻongoʻongá ki he ʻuhinga ʻo e taimi ʻa ia ʻoku tau moʻui aí. ʻOku kau ʻi heʻene ngaahi fakamaau fakaekikité ʻa e ngaahi fakamatala fakamuimui taha ʻa ia kuo pau ke fanongonongo takatakai ʻi he māmaní. (Fkh. 14:6, 7) ʻOku lolotonga pule ʻa Kalaisi ʻi he langí, ʻe vavé ni ke fakaʻauha ʻosi ʻa e ʻemipaea ʻo e lotu loí ʻi māmani, pea ʻoku teu ke fakaʻauha ʻe he Puleʻanga ʻo e ʻOtuá ʻa e kotoa ʻo e ngaahi puleʻanga fakaemāmaní. (Tan. 2:44; Fkh. 11:15; 17:16) Ko ia ai, ʻoku fiemaʻu fakavavevave ki he kakaí ke nau ʻiloʻi ʻa e Tuʻi ʻa e ʻOtuá ʻoku lolotonga pulé, ke nau mavahe mei Pāpilone ko e Lahi, pea ke nau ui ki he huafa ʻo Sihová ʻi he tui. (Sāme 2:11, 12; Loma 10:13; Fkh. 18:4) Fakatauange ke tau kau ʻi he lahi taha ʻe ala malavá ʻi hono ʻoatu ki he niʻihi kehé ʻa e ako ʻa ia ʻoku taki atu ki he moʻuí.