Fakahaaʻi ʻa e Mahuʻingaʻia Fakafoʻituitui—ʻI he Fetuʻutaki Lelei Mata ki he Mata
1 ʻI he faifakamoʻoni he feituʻu kakaí pea mei he fale ki he falé, ʻoku tau faʻa kamata fetuʻutaki mata ki he mata ai, ki muʻa ʻi heʻetau kamata leá. ʻI he mōmeniti nounou ko iá, ʻoku tau malava nai ai ke ʻiloʻi mei honau matá ʻa e anga ʻo ʻenau ongoʻi fekauʻaki mo ʻetau ʻi aí pea naʻa mo ʻenau ongoʻí tonu. ʻOku lava ke nau ʻiloʻi, ʻi he founga meimei tatau, ʻa e meʻa lahi fekauʻaki mo kitautolu. Naʻe leaʻaki ʻa e meʻá ni ʻe ha fefine ʻe taha ʻo fekauʻaki mo e ʻaʻahi ʻa ha Fakamoʻoni: “Ko e meʻa ʻoku ou manatuʻi fekauʻaki mo hono fofonga malimalí ko e nongá. Naʻe langaʻi ai ʻeku mahuʻingaʻiá.” Naʻe fakatupunga ʻe he meʻá ni ʻa e fefiné ke ne fanongo ki he ongoongo leleí.
2 Ko hono kamata ʻa e fetuʻutaki mata ki he mata mo e niʻihi kehé ko ha founga ola lelei ia ke kamataʻi ai ha fakamoʻoni ʻi hono fai ʻa e ngāue ʻi he halá pe faifakamoʻoni ʻi he ngaahi feituʻu kakai kehé. Ko e tokoua ʻe taha ʻokú ne siofi ʻa e mata ʻo e faʻahinga ʻoku nau fakaofiofi mai kiate iá. ʻI heʻena fetuʻutaki mata ki he matá, ʻokú ne malimali pea toki tuʻuaki leva ʻa e ʻū makasiní. ʻI hono ngāueʻaki ʻa e fakaofiofi ko ení, ʻokú ne fai ai ʻa e ngaahi fetalanoaʻaki lelei lahi pea tufaki ai mo e ū tohi lahi.
3 ʻIloʻi ʻa e Ngaahi Ongoʻi ʻa e Niʻihi Kehé: Ko e fetuʻutaki mata ki he mata maʻu peé ʻe tokoniʻi ai kitautolu ke tau ʻiloʻi ʻa e ngaahi ongoʻi ʻa e niʻihi kehé. Ko e fakatātaá, kapau ʻoku faingataʻaʻia ha taha ʻi hono mahinoʻi kitautolú pe ʻikai loto-tatau mo ha meʻa kuo tau leaʻaki, ʻe lava ke faʻa hā ia ʻi hono matá. Kapau ʻokú ne moʻua pe ʻikai kei faʻa tatali, te tau ʻiloʻi ia ʻaki hono siofi ʻa hono matá. ʻE lava leva ai ke tau feʻunuʻaki pe fakanounou ʻetau tuʻuakí ʻo fakatatau ki ai. Ko e mahinoʻi ʻa e ngaahi ongoʻi ʻa e niʻihi kehé ko ha founga lelei ia ke fakahāhā ai ʻetau mahuʻingaʻia fakafoʻituitui ʻia kinautolú.
4 Loto-Moʻoni mo e Tuipau: ʻI he ngaahi anga fakafonua lahi, ko e sio hangatonu ki he mata ʻo ha tahá ʻoku vakai ki ai ko e fakamoʻoni ia ʻoku loto-moʻoni ʻa e tokotaha ko iá. Fakatokangaʻi ʻa e anga ʻo e tali ʻa Sīsū ʻi he taimi naʻe ʻeke ai ʻe heʻene kau ākongá: “Ko hai ai tū ʻe ala moʻui?” ʻOku fakamatala ʻa e Tohi Tapú: “Pea siofia kinautolu ʻe Sisu, ʻo ne peheange, ʻI he vakai ʻa e tangata ko e meʻa ia ʻe ʻikai lava; ka ki he ʻOtua ʻoku malava ʻa e meʻa kotoa pe.” (Fakaʻītali ʻamautolu; Mt. 19:25, 26) ʻOku ʻikai ha veiveiua ko e tuipau naʻe hā mei he fofonga ʻo Sīsuú naʻá ne ʻai ke fakalotoʻi lahi ange ai ʻa ʻene ngaahi leá. ʻI he founga meimei tatau, ko e fetuʻutaki mata ki he mata lelei maʻu peé ʻe tokoniʻi ai kitautolu ke tau fakahaaʻi ʻa e pōpoaki ʻo e Puleʻangá ʻaki ʻa e loto-moʻoni mo e tuipau.—2 Kol. 2:17; 1 Tes. 1:5.