Fakahaaʻi e Mahuʻingaʻia Fakafoʻituitui—ʻAki ʻa e Hoko ʻo Anga-Lelei
1 “Oku Agalelei a Jihova.” (Sāme 145:8, PM) Neongo ko Sihova ʻa e Hau Fakaleveleva ʻo e ʻUnivēsí, ʻokú ne anga-ʻofa, fakaʻatuʻi mo anga-fakaʻapaʻapa ʻi heʻene feangainga mo e faʻahinga taʻehaohaoa ʻo e tangatá. (Sen. 13:14; 19:18-21, 29) ʻE lava ke tau fakaleleiʻi ʻetau tuʻuaki ʻa e ongoongo leleí ʻaki ʻa e faʻifaʻitaki ki hotau ʻOtua anga-leleí. (Kol. 4:6) ʻOku kau heni ʻa e meʻa lahi ange ia ʻi heʻetau anga-ʻapasia mo anga-tokaʻi pē ʻi heʻetau leá.
2 Mei he Fale ki he Falé: Ko e hā ʻa e meʻa ʻoku totonu ke tau faí kapau ʻoku tau ʻaʻahi atu ki he tokotaha-ʻapí ʻi ha taimi ʻoku ʻikai feʻungamālie pe fuʻu femoʻuekina ai ke ne talanoa mo kitautolú? ʻOku totonu ke tau lāuʻilo ki he ngaahi tuʻunga peheé ʻaki hono ʻai ʻetau tuʻuakí ke nounou ʻaupito pe tala ange te ke toe foki atu ʻi ha taimi kehe. Ke tau fakaʻehiʻehi anga-ʻofa mei he vilitaki ke tali ʻe he kakaí ʻa e ʻū tohí kapau ʻoku ʻikai te nau fiemaʻu. Ko e fakaʻatuʻi ʻo e niʻihi kehé ʻe toe ueʻi ai kitautolu ke tau fakahāhā ʻa e tokaʻi ki heʻenau ʻū meʻá, hangē ko hono tāpuniʻi ʻa e matapaá mo e ʻaá pea akoʻi ʻetau fānaú ke nau fai ʻa e meʻa tatau. ʻOku totonu ke tau fakapapauʻi heʻikai sio mai e kau feʻaluʻakí ki ha tohi pē ʻoku tau tuku ʻi he ngaahi ʻapi ʻoku ʻikai ha tahá. Ko e moʻoni, ʻe ueʻi kitautolu ʻe he anga-leleí ke tau fai ki he niʻihi kehé ʻa e meʻa tofu pē ko ia ʻoku tau loto ke nau fai mai kia kitautolú.—Luke 6:31.
3 ʻI he Ngāue he Halá: Lolotonga ʻa e kau ki he ngāue he halá, ʻe lava ke tau fakahāhā ʻa e anga-fakaʻapaʻapá ʻaki ʻa e ʻoua ʻe fakafihiaʻi ʻa e felueʻakí pea ʻoua ʻe fakapupunga holo ʻi he ngaahi faiʻanga pisinisí. Te tau toe lāuʻilo foki ki he ngaahi tuʻunga ʻo e niʻihi kehé, ʻo feinga ke talanoa pē mo e faʻahinga ʻoku nau faingamālié kae ʻikai ko e faʻahinga ʻoku hā mahino mai ʻoku nau fakavavevavé. ʻI he taimi ʻe niʻihi, koeʻuhi ko e longoaʻa ʻa e meʻalelé, ʻe fiemaʻu nai ai ke tau lea leʻo-lahi ange ke nau fanongo ki ai. Ka tau fai ia ʻaki ʻa e founga ngeia, ʻo ʻikai ke tohoakiʻi mai ʻa e tokangá kia kitautolu.—Mt. 12:19.
4 ʻI he Faifakamoʻoni Telefoní: ʻE ueʻi kitautolu ʻe he fakaʻatuʻi ki he niʻihi kehé ke tau faifakamoʻoni telefoni ʻi ha feituʻu ʻoku lōngonoá. ʻOku tau fakahāhā ʻa e ʻulungāanga leleí ʻi heʻetau fakafeʻiloaki vave atu kitautolu pea fakamatalaʻi ʻa e ʻuhinga ʻoku tau tā atu aí. Ko e lea hangatonu he meʻa ʻoku fai ai ʻa e leá pea tō lelei maʻu pē hotau leʻó ʻe tokoni ia ke fakakau mai ai ʻa e niʻihi kehé ki ha fetalanoaʻaki Fakatohitapu fakatupu langa hake. (1 Kol. 14:8, 9) ʻI he hoko ʻo anga-ʻofa, fakaʻatuʻi mo anga-fakaʻapaʻapa ʻi he ngaahi founga kehekehe ko ʻení, ʻoku tau faʻifaʻitaki ai ki hotau ʻOtua anga-leleí, ʻa Sihova.