Toe Foki ki he Faʻahinga Kotoa ʻOku Hā Nai mei Ai ha Mahuʻingaʻia
1 Ko e tokolahi ʻo kitautolu ʻoku tau ʻi he moʻoní he ʻahó ni koeʻuhí ko e fakatokangaʻi ʻe ha taha ʻetau tali lelei ʻa e pōpoaki ʻo e Puleʻangá pea foki anga-kātaki ange—mahalo ʻi ha ngaahi taimi lahi—ke fakatupulekina ʻa e mahuʻingaʻia ko iá. ʻOku totonu ke pehē pē ʻetau toe foki tōtōivi ki he faʻahinga kotoa ʻoku hā nai mei ai ha mahuʻingaʻia. Ko e moʻoni, ko hono fai ʻa e toe ʻaʻahí ʻoku kau ia ʻi he fekau ke tau ‘ngaohi akongá.’—Mt. 28:19, 20.
2 Fakatokangaʻi ʻa e Mahuʻingaʻiá: Naʻa mo e ʻikai ke tali ʻe ha taha ʻa e tohí, ko e fōtunga hono matá, tō ʻo hono leʻó, pe ko e anga ʻo e lea ʻokú ne faí ʻe hā nai mei ai ha houngaʻia ki he pōpoaki ʻo e Puleʻangá. ʻI he tuʻunga ko iá te tau toe ʻaʻahi nai ai ki ai. Ko ha tokoua ʻe taha naʻá ne ʻaʻahi ki ha taha ʻi he uike hokohoko ʻe nima kae ʻikai tuku ha tohi. ʻI heʻene ʻaʻahi hono onó, naʻe tali ʻe he tokotahá ha tohi, pea faai atu pē ʻo kamata ha ako Tohi Tapu.
3 Kapau ʻokú ke fakatokangaʻi ha mahuʻingaʻia, foki leva he vave tahá ʻi ha ngaahi ʻaho siʻi pē nai mei ai. ʻOua ʻe tuku ha faingamālie ki he “Fili” ke ne toʻo ʻa e meʻa kuo tō ki he loto ʻo e tokotahá. (Mt. 13:19) Fakapapauʻi ke fai ki hoʻo leá kapau naʻá mo alea ki ha taimi pau ke ke foki atu ai.—Mt. 5:37.
4 Ngāue ʻi he Halá: ʻOkú ke feinga ke fakatupulekina ʻa e mahuʻingaʻia ʻokú ke maʻu lolotonga ʻo e ngāue he halá pe ʻi he faifakamoʻoni ʻi he founga ʻikai anga-mahení? ʻI he fakaʻosi ʻa hoʻomo fetalanoaʻakí, ʻe lava ke ke pehē: “ʻOku ou fiefia ʻi heʻeta talanoá. ʻE lava ke ta toe feʻilongaki nai koeʻuhí ke hoko atu ai ʻeta talanoá?” Kapau ʻoku lelei, ʻe fili nai ʻa e kau malanga ʻe niʻihi ke ʻoange ki he tokotaha mahuʻingaʻiá ʻa ʻenau fika telefoní pe kole ange ʻene fika telefoní. Kapau ʻe faʻa fakatokangaʻi maʻu pē koe ʻe he kakaí ʻi hoʻo ngāue ʻi he foʻi feituʻu tatau he halá, ʻe ʻikai nai te nau toumoua ke ʻoatu ʻenau fika telefoní pe tuʻasilá. Naʻa mo e ʻikai te nau fie ʻoatu iá, ʻe lava ke ke kei feinga ke fakatupulekina ʻenau mahuʻingaʻiá ʻi he taimi hono hoko te mou fetaulaki ai ʻi he halá.
5 ʻI he taimi ʻoku tau sio ai kuo moʻui ha fanga kiʻi fuʻu ʻakau naʻa tau fuʻifuʻi mo tauhi, ʻoku tau fiefia ai. ʻI he tuʻunga meimei tatau, ʻe lava ke tau maʻu ʻa e fiefia lahi ʻi hono fai ha ngaahi toe ʻaʻahi pea tokoniʻi ha faʻahinga tāutaha ke tupu fakalaumālie. (1 Kol. 3:6) ʻAi ko hoʻo taumuʻá ia ke toe foki ki he faʻahinga kotoa ʻoku hā nai mei ai ha mahuʻingaʻia.