Puha Fehuʻi
◼ Ko e hā ʻa e ngaahi fakatuʻutāmaki ʻo hono ngāueʻaki ʻa e ʻInitanetí ke fetuʻutaki ai mo ha taha ʻoku ʻikai ke tau ʻiloʻi?
Kuo fokotuʻutuʻu ha ngaahi Uepisaiti lahi ke fetaulaki ai ʻa e kakaí ʻo nau fetohiʻaki ʻi he ʻInitanetí. Ko e lahi ʻo e ngaahi saiti ko ʻení ʻoku fakaʻatā ai ha niʻihi tāutaha ke nau faʻu pea tuku atu ha fakamatala fekauʻaki mo kinautolu tonu, ʻa ia ʻoku fakakau nai ai ʻa e ngaahi laʻi tā mo e ngaahi fakamatala fakafoʻituitui kehe. Ko e kakai te nau vakai ki he fakamatalá ʻe lava leva ke nau fetuʻutaki ki ai. Ko e ngaahi Uepisaiti peheé ʻoku fuʻu manakoa ia ʻe he toʻutupú, pea ko e toʻutupu ʻe niʻihi ʻi he fakatahaʻangá kuo nau ngāueʻaki ia ke fetuʻutaki ai mo ha niʻihi ʻoku nau taukaveʻi ko e Kau Fakamoʻoni ʻa Sihova kinautolu.
ʻOku faingofua ki ha taha ʻoku tau fetaulaki mo ia ʻi he ʻInitanetí ke ne loi fekauʻaki mo ia, ko hono tuʻunga fakalaumālié, pe ko ʻene ngaahi taumuʻá. (Sāme 26:4) Ko ha taha ʻokú ne taukaveʻi ko e taha ia ʻo e Kau Fakamoʻoni ʻa Sihová ko ha tokotaha taʻetui moʻoni nai ia, ko ha tokotaha kuo tuʻusi, pe naʻa mo ha tokotaha kuo tafoki mei he moʻoní ʻokú ne feinga ke fakatūkiaʻi ʻa e kau Kalisitiané. (Kal. 2:4) Fakatatau ki he līpōtí, ʻoku ngāueʻaki ʻe he kau tangata pāʻusiʻi fānau tokolahi ʻa e Uepisaiti peheé ke kumiʻaki ʻenau kau maʻukoviá.
Naʻa mo e taimi ʻoku tau tuipau ai ko e faʻahinga ʻoku tau fetuʻutaki mo iá ʻoku nau ʻi ha tuʻunga lelei he fakatahaʻangá, ko e fetalanoaʻaki ʻi ha tuʻunga peheé ʻe lavangofua ke iku atu ʻo hē ia ki ha meʻa ʻoku ʻikai ke lelei. ʻOku hoko eni koeʻuhi ʻoku hehema ʻa e kakaí ke ongoʻi tauʻatāina ange ʻi he fetuʻutaki ki he faʻahinga ʻoku teʻeki ke nau femātākí. ʻOku nau toe sio nai ki he fetuʻutaki ʻInitanetí ʻoku fakapulipuli pea nau fakakaukau ko e hā pē ʻa e meʻa ʻoku nau leaʻakí ʻe ʻikai ke ʻiloʻi ia ʻe he niʻihi kehé, hangē ko ʻenau ngaahi mātuʻá pe ko e kau mātuʻá. Ko e meʻa fakamamahí, kuo fakataueleʻi ʻa e toʻutupu tokolahi mei he ngaahi fāmili Kalisitiané pea kuo nau kau ʻi he talanoa koví. (Ef. 5:1-3 [5:3, 4, PM]; Kol. 3:8) Kuo fakakau ʻe he niʻihi ʻi heʻenau fakamatala fekauʻaki mo kinautolu ʻi he komipiutá hanau ngaahi tā fakatauele, ngaahi hingoa taʻetaau, pe ko ha ngaahi saiti ki ha ngaahi vitiō hiva fakafehokotaki fakasino maeʻeeʻa lelei.
ʻI he vakai ki he ngaahi meʻa ko ení, ʻoku totonu ki he ngaahi mātuʻá ke nau tokangaʻi ʻa e meʻa ʻoku fai ʻe heʻenau fānaú ʻi he komipiutá. (Pal. 29:15) ʻE fakatuʻutāmaki ke fakaafeʻi ha sola ki hotau ʻapí pe fakaʻatā ia ke ne nofo toko taha mo ʻetau fānaú. ʻI he tuʻunga meimei tatau, ʻoku fakatuʻutāmaki kia kitautolu pe ko ʻetau fānaú ke fakakaumeʻa mo ha kau sola ʻi he ʻInitanetí, naʻa mo ʻenau taukaveʻi ko e Kau Fakamoʻoni ʻa Sihova kinautolu.—Pal. 22:3.