Tohi mei he Vaʻá

Siʻi Kau Malanga ʻo e Puleʻangá:

ʻOku mau fiefia ʻi he sio ki he laka ki muʻa ʻa e ngāué ʻi he feituʻu ngāue ʻa e vaʻa ʻi Nuʻu Silá lolotonga ʻa e taʻu fakangāue 2007! Naʻa tau aʻu ai ki he tumutumu ko e kau tāimuʻa tuʻumaʻu ʻe toko 789 ʻi Tīsema. ʻOku toe tokangaʻi foki ʻe he ʻōfisi vaʻá ʻa e ngāue ʻi he fanga kiʻi motu ofi mai ʻo e Pasifikí. Ko e kau malanga mo e kau tāimuʻa ʻe toko 404 naʻa nau līpooti mei ai ʻi Maʻasí naʻa nau fai ʻa e ngaahi ako Tohi Tapu ʻe 537.

ʻOku fakafuofua ko e tatau faka-Tonga ʻe 22,000 ʻo e Ongoongo ʻo e Puleʻangá Fika 37, “Ko e Ngataʻanga ʻo e Lotu Loí ʻOku Ofi!” naʻe tufaki ia ʻi he kotoa ʻo e feituʻu ngāue ʻa e vaʻa ʻi Nuʻu Silá. Hili hono maʻu mo lau ha tatau, naʻe ʻikai mei lava ke mamohe ai ha tuofefine naʻe ʻikai longomoʻui. ʻI he Sāpate pē hono hokó, naʻá ne maʻu ai ʻa e fakatahá peá ne kole ke fai ha ako Tohi Tapu mo ia. ʻOku hokohoko atu hono maʻu ʻe he ʻōfisi vaʻá ʻa e ngaahi kūponi lahi ʻi mui ʻi he Ongoongo ʻo e Puleʻangá ko e kole ʻa e ngaahi tatau ʻo e polosiua Hanganaki Leʻo! mo e kole ki ha ako Tohi Tapu.

Ko e taumuʻa ʻo e ngaahi feingangāue peheé ke tokoniʻi ʻa e faʻahinga loto-totonú ke nau ako ʻa e meʻa ʻoku akoʻi moʻoni ʻe he Tohi Tapú. (Mt. 28:​19, 20) ʻI hoʻomou malangá, manatuʻi ke hiki ha faʻahinga mahuʻingaʻia pē ʻe maʻu, pea toe foki ki ai mo e taumuʻa ke kamata ha ako Tohi Tapu. ʻOku mau fiefia ke ngāue uma ki he uma mo kimoutolu ʻi he ngāue mahuʻingá ni, pea ʻoku mau ʻoatu heni ʻemau ʻofa māfana faka-Kalisitiane.

Mei homou fanga tokoua,

ʻŌfisi Vaʻa ʻi Nuʻu Silá