Tohi mei he Vaʻa
Siʻi Kau Malanga ʻo e Puleʻangá:
Naʻe fokotuʻu ʻi he māhiná ni ha sēketi foʻou ʻi he feituʻu vaʻa ʻo Nuʻu Silá, ʻo faʻu ai ha ngaahi sēketi fakakātoa ʻe 11. Naʻe tupu ʻa e fiemaʻu ko eni ke fakalahi ʻa e sēketí mei hono fokotuʻu ʻo ha ongo fakatahaʻanga foʻou, fakataha mo ha tomuʻa vakai atu ki ha tupulaki lahi ange ʻi he fika ʻo e ngaahi fakatahaʻangá lolotonga ʻa e taʻu fakangāue 2006.
Kuo lavaʻi ʻa e ngāue fakalototoʻa ʻi hono fakamafola atu ko ia ʻa e ongoongo leleí ʻi hotau feituʻu vāhenga-ngāué ʻi he taʻu fakangāue ko eni ne toki ʻosí. ʻOku mau tuipau naʻa mou fiefia ʻi he feingangāue makehe ko ia ʻo hono tufaki atu ʻo e polosiua “Hanganaki Leʻo!” ʻI Fepueli naʻa tau aʻu ai ki ha tumutumu foʻou ʻo lahi ange ʻi ha toe taimi ki muʻa, ʻi he lahi ʻo e polosiua naʻe tuku ʻi he kakai mahuʻingaʻiá. He faifakamoʻoni taimi tonu moʻoni ia naʻe fai lolotonga ʻa e feingangāue ko iá! Ko e ngaahi taimi fakalotomāfana eni pea kuo pau ke tau nofoʻaki ʻāʻā ange ai pē ki he mahuʻinga mo e fakavavevave ʻa hono hanganaki fakahaaʻi ʻa e houa ʻo e fakamaau ʻa Sihová ki he kakaí.
Naʻe fakalotomāfana kiate kimautolu ʻi he Pētelí ke fanongo ki hoʻomou ngaahi fakahāhā ʻo e tokanga hili ʻa e fakatamaki ʻo e peau kulá, fakataha mo hoʻomou ngaahi pole anga-ʻofa ke tokoniʻi ʻa hotau fanga tokoua mo e fanga tuofāfine naʻe uesiá. Kuo toe lahi foki mo e ngaahi faingataʻa fakaenatula ʻi hotau feituʻu vaʻá tonu pea naʻe ala fakaongoongoleleiʻi ʻa e vakai atu ki he tali loto-lelei mo vave ʻa e fetokouaʻakí ʻi hono tokonaki ha tokoní. ʻOku mau tukulotoa ʻa e fanga tokoua mo e fanga tuofāfine tokolahi naʻa nau ngāue mālohi maʻá e faʻahinga naʻa nau faingataʻaʻiá.—Fili. 2:29.
Naʻe fakakakato ʻe he kau ngāue pole ʻoku nau ngāue ʻi he malumalu ʻo e Ngaahi Kōmiti Ngāue Langa Fakaefeituʻú ʻa e Fale Fakatahaʻanga foʻou ʻe 3 mo e fakaleleiʻi lalahi ʻe 2 ʻo e ongo holo motuʻa ange, ʻi he taʻu fakangāue ko eni naʻe toki ʻosí. Kuo ʻosi kamata ha palani ke langa ha Fale Fakatahaʻanga ʻi he motu ko Haʻapaí ʻi he ʻOtu Tongá pea ʻoku ʻi ai ʻa e ʻamanaki ʻe fakakakato ʻa e ngāue ko ení ʻi he 2006. Kuo fai foki mo e ngaahi palani ki hono langa ha Fale Fakatahaʻanga foʻou ʻi he motu ko Aitutaki ʻi he ʻOtu Motu Kukí. Ko e laumālie loto-lelei mo feilaulauʻi-kita kuo fakahāhā ʻe he kau ngāue pole ngāue mālohí ʻoku fakahoungaʻi lahi ia.
ʻOku taau ke fakahīkihikiʻi ʻa e kotoa ʻo homou ngāue faivelenga ʻi hono fakalahi atu ʻa e ngaahi meʻa ʻo e Puleʻangá! ʻOku mau toe houngaʻia lahi foki ʻi hoʻomou tokoni fakapaʻanga loto-fiefoaki ki he ngāué. (Pal. 3:9, 10) Fakatauange ke hokohoko atu hono faitāpuekina ʻe Sihova ʻa ʻetau ngaahi feinga fāʻūtaha ke “fakamaloʻia ʻene langilangiʻia.”—Ef. 1:12.
Mei homou fanga tokoua,
ʻŌfisi Vaʻa Nuʻu Silá