Muimui ʻi he Faʻifaʻitakiʻanga Naʻe Fokotuʻu ʻe Sīsuú
1. Ko e hā ʻa e faʻifaʻitakiʻanga naʻe fokotuʻu ʻe Sīsuú?
1 ʻI heʻetau kau ʻi he ngāue ngaohi-ākongá, kuo pau ke tau manatuʻi ko ʻetau faʻifaʻitakiʻangá ʻoku lava ke ʻi ai ʻene kaunga mālohi ki he faʻahinga ʻoku nau siofi kitautolú. Naʻe faiako ʻa Sīsū ʻi he lea mo e ngāue. Ko e faʻahinga naʻa nau siofi iá naʻe lava ke nau sio ki heʻene faivelengá, ko ʻene ʻofa ki he kakaí, ko e fakahangataha ʻene holí ke fakamāʻoniʻoniʻi ʻa e huafa ʻo ʻene Tamaí, mo ʻene fakapapau ke fai ke lava ʻa e finangalo ʻo ʻene Tamaí.—1 Pita 2:21.
2. ʻI he ngaahi founga fē ʻoku lava ai ke ueʻi ʻe heʻetau faʻifaʻitakiʻangá ʻa e faʻahinga ʻoku nau ngāue fakataha mo kitautolu ʻi he ngāue fakafaifekaú?
2 Lolotonga ʻa e Ngāue Fakafaifekau Fale-ki-he-Falé: Hangē ko Sīsuú, ko ʻetau faʻifaʻitakiʻangá ʻokú ne tākiekina ʻa e faʻahinga ʻoku nau ngāue fakataha mo kitautolú. Ko e kau malanga foʻou ange mo ʻikai loko taukeí ʻa ia ʻoku nau sio mai ki heʻetau kau faivelenga ʻi he ngāue fakafaifekaú te nau fakakaukau fekauʻaki mo e tuʻunga lelei ʻo ʻenau kau ki he ngāue fakamalangá. ʻI heʻenau sio mai ki heʻetau fiefia mo e mahuʻingaʻia moʻoni ʻi he niʻihi kehé, ʻe fakamanatu ai kia kinautolu ʻa e mahuʻinga ʻo hono fakahāhā ʻa e ngaahi ʻulungāanga ko iá ʻi heʻenau ngāue fakafaifekaú. ʻI heʻenau fakatokangaʻi ʻetau tōtōivi ʻi hono ngāueʻaki ʻa e Tohi Tapú, fai ʻo e ngaahi toe ʻaʻahí mo hono fai ʻo e ngaahi ako Tohi Tapú, ʻe ueʻi ai kinautolu ke nau fai ʻa e meʻa tatau.
3. ʻE lava fēfē ke fakahinohinoʻi ʻe heʻetau faʻifaʻitakiʻangá ʻa e kau ako Tohi Tapú, pea ko e hā nai te nau akó?
3 ʻI Hono Fai ʻo e Ngaahi Ako Tohi Tapú: Ko ʻetau kau ako Tohi Tapú ʻe tautefito ʻenau siofi ʻa hotau ʻulungāangá. Ko e fakatātaá, neongo te tau fakamatalaʻi nai kia kinautolu ʻa e mahuʻinga ʻo e teuteu ki he akó, kumi ʻa e ngaahi konga Tohi Tapú, mo hono laineʻi ʻo e ngaahi poini tefitó, te nau tokanga ke ʻilo pe ʻoku tau teuteu. (Loma 2:21) Kapau ʻoku tau tauhi taimi ʻi heʻetau alea ako mo kinautolú, ʻe siʻi ai ʻenau hehema ke tuku ʻa e ngaahi ngāue kehé ke halalotoʻapi ʻi heʻenau ako Tohi Tapú. ʻOku ʻikai ha veiveiua te nau toe fakatokangaʻi ʻetau hehema ke feilaulauʻi-kita ʻi he ngāue fakafaifekaú mo ʻetau tui mālohí. ʻOku ʻikai fakaʻohovale ʻa e faʻa hoko ko e kau ʻevangeliō faivelenga mo fua lahi ʻa e kau ako ʻa e faʻahinga ko ē ʻoku nau muimui ofi ʻi he faʻifaʻitakiʻanga ʻa Sīsuú.
4. ʻI heʻetau maʻu ʻa e ngaahi fakataha ʻa e fakatahaʻangá, ko e hā ʻoku akoʻi ʻe heʻetau faʻifaʻitakiʻangá?
4 ʻI he Maʻu ʻa e Fakataha ʻa e Fakatahaʻangá: Ko e faʻahinga kotoa ʻoku nau ʻi he fakatahaʻanga Kalisitiané ʻoku ʻi ai ʻenau kaunga ki he faiako ʻaki ʻa e faʻifaʻitakiʻangá ʻi he ngaahi fakataha ʻa e fakatahaʻangá. Ko e faʻahinga mahuʻingaʻia ʻoku kamata ke nau maʻu ʻa e ngaahi fakatahá ʻoku nau maʻu ʻaonga mei he faʻifaʻitakiʻanga lelei ʻoku nau sio ki ai ʻi he fakatahaʻangá. Te nau fakatokangaʻi ʻa e fetokouaʻaki māfaná, fāʻūtaha faka-Kalisitiané pea mo e vala mo e teuteu fakanānaá. (Sāme 133:1) Ko ʻetau faʻifaʻitakiʻanga ʻo e mateaki ʻi hono maʻu ʻa e ngaahi fakataha ʻa e fakatahaʻangá mo ʻetau talaki fakahāhā ʻetau tuí lolotonga ʻetau ʻi aí ʻe toe fakatokangaʻi foki mo ia. Ko ha tokotaha ʻaʻahi ʻi he taha ʻo ʻetau ngaahi fakatahá naʻá ne sio ki he vave ʻa e malava ke maʻu ʻe ha kiʻi taʻahine ha veesi naʻe lave ki ai ʻi heʻene Tohi Tapú tonu pea mo e anga ʻo ʻene muimui tokanga ki he lautohí. Ko ʻene faʻifaʻitakiʻangá naʻe ueʻi ai ia ke ne kole ki ha ako Tohi Tapu.
5. Ko e hā ʻoku totonu ai ke ʻoua ʻaupito te tau fakasiʻia ʻa e mahuʻinga ʻo ʻetau faʻifaʻitakiʻangá?
5 ʻOku fakalotolahiʻi kitautolu ʻe he Tohi Tapú ke tau faʻifaʻitaki ki he faʻifaʻitakiʻanga lelei ʻa e tokotaha taki taha. (Fili. 3:17; Hep. 13:7) Ko ia ai, ʻoku totonu ke tau manatuʻi kapau ʻoku tau muimui ofi ʻi he faʻifaʻitakiʻanga naʻe fokotuʻu ʻe Sīsuú, ʻe sio ki ai ʻa e niʻihi kehé pea ʻe lava ke tākiekina ai kinautolu ʻi ha founga lelei. ʻI hono ʻiloʻi ení, ʻofa ke tau tokanga ki he ngaahi lea ʻoku maʻu ʻi he 1 Timote 4:16: “Lamalama kiate koe mo e meʻa ʻoku ke akoʻaki.”