ʻOatu ʻa e ʻAmanaki ki he Masivá
1 Naʻe mahuʻingaʻia makehe ʻa Sīsū ʻi he faʻahinga naʻe masivá. Ne ʻi ai ʻa e ngaahi taimi naʻá ne fai ai ʻa e tokoni fakamatelie fakaemana pea fakamoʻui ʻa e mahakí, ka ko e meʻa naʻá ne tokangataha ki aí ko hono talaki ʻa e “ongoongo lelei” ki he masivá. (Mt. 11:5) Ko e ngāue fakafaifekau faka-Kalisitiane he ʻaho ní ʻoku hokohoko atu ʻa e maʻu ʻaonga mei ai ʻa e masivá pea pehē foki ki he niʻihi kehé.—Mt. 24:14; 28:19, 20.
2 ʻAmanaki Moʻoni: Ko e kau faifekau ʻo e Puleʻanga-Haʻa-Kalisitiané ʻoku nau faʻa palōmesi ki he masivá te nau tuʻumālie kapau ʻoku nau foaki nima-homo ki he siasí. Kae kehe, ʻoku akoʻi ʻe he Tohi Tapú ko e Puleʻanga pē ʻo e ʻOtuá te ne fakangata ʻa e masivá pea fakaleleiʻi ʻa e ngaahi palopalema kotoa ʻa e faʻahinga ʻo e tangatá. (Sāme 9:18; 145:16; Ai. 65:21-23) ʻI hono fakahā ki he masivá ʻa e meʻa ʻoku akoʻi moʻoni ʻe he Tohi Tapú, ʻoku tau ʻoatu ai ʻa e ʻamanaki pea tokoniʻi kinautolu ke fakalato ʻenau fiemaʻu fakalaumālié.—Mt. 5:3.
3 Ko e kau Fālesi ʻo e ʻaho ʻo Sīsuú naʻa nau siolalo ki he masivá, ʻo ui paetaku kinautolu ko e ‘am-ha·’aʹrets, pe “kakai ʻo e fonuá.” Kae kehe, naʻe vakai ʻa Sīsū ko “honau toto,” pe ko ʻenau moʻuí, ʻoku “mahuʻinga.” (Sāme 72:13, 14) ʻOku lava ke tau faʻifaʻitaki kia Sīsū ʻo “fai ʻofa” ki he faʻahinga masiva peheé ʻaki ʻa e anga-lelei mo e kaungāongoʻi. (Pal. 14:31) Heʻikai ʻaupito te tau loto ke lea ʻo fakamāʻulaloʻi ʻa e kakai masiva ʻoku nofo ʻi he ngaahi kaungāʻapí pe fakahaaʻi ʻa e toumoua ke faifakamoʻoni kia kinautolu. Ko e tokolahi ʻoku nau tali ʻa e pōpoaki ʻo e Puleʻangá ko e kakai masiva.
4 Tokoni he Taimí Ni: Ko ʻetau akoʻi ʻa e ngaahi tefitoʻi moʻoni Fakatohitapú ki he faʻahinga masiva ʻi he feituʻu ngāué ʻoku toe tokoniʻi ai kinautolu ke nau fakasiʻisiʻi ʻa e ngaahi nunuʻa ʻo e masivá he taimí ni. Ko e fakatātaá, ʻoku fakahalaiaʻi ʻe he Tohi Tapú ʻa e konaá, pelepaʻangá, fakapikopikó, ko e ngāueʻaki ʻo e tapaká, mo e ngaahi tōʻonga kehe ʻe iku ai ki he masivá. (Pal. 6:10, 11; 23:21; 2 Kol. 6:19 [7:1, PM]; Ef. 5:5) ʻOku fakalototoʻaʻi ʻe he Tohi Tapú ʻa e faitotonú mo e ngāue “fie ngaue [pe ʻaufuatō],” ko e ongo ʻulungāanga ʻoku fai ʻaki hono kumi ʻa e kau ngāué. (Kol. 3:22, 23; Hep. 13:18) Ko hono moʻoní ʻi he savea ʻe taha ko e tokolahi taha ʻo e kau pule ngāué ʻoku nau fakakalasi ʻa e faitotonú mo e anga-tonú ʻi he ongo ʻulungāanga ʻoku maongo taha kia kinautolu ʻi heʻenau fakakaukau ki ha taha ke ngāué.
5 ʻOku ʻikai taʻetokanga ʻa Sihova ki he faingataʻaʻia ʻa e masivá. Kuo vavé ni ke fakahaofi ʻe Sīsū Kalaisi ʻa e “masiva ʻo ka tangi.” (Sāme 72:12) Kae ʻoua kuo toki aʻu ki he taimi ko iá, ʻoku tau maʻu ʻa e monū ko hono fakafiemālieʻi ʻa e niʻihi kehé, ʻo kau ai ʻa e masivá, ʻaki ʻa e pōpoaki ʻo e ʻamanaki ʻa e Tohi Tapú.