Puha Fehuʻi

◼ ʻOku totonu nai ki ha taha ʻo e Kau Fakamoʻoni ʻa Sihová ke fai hano faitoʻo mo tokangaʻi ia ʻi ha falemahaki pe ko ha ʻapi tauhi vaivai ʻa ia ʻoku fakalele ʻe ha kautaha lotu?

ʻOku fakalele ʻe he ngaahi kautaha lotu kehekehe ʻa e ngaahi falemahaki pe ko e ngaahi ʻapi tauhi vaivai ʻa ia ʻoku fai ai hono faitoʻo pe ko hano tokangaʻi ha tokotaha mahaki ʻi ha taimi fuoloa. Ko e anga-mahení foki, ko e ngaahi feituʻu peheé ʻoku ʻikai ke fokotuʻu iá ke pouaki atu ai ʻa Pāpilone ko e Lahi. (Fkh. 18:2, 4) Naʻe muʻaki fakataumuʻa nai hono fokotuʻú ʻona ke hoko ko ha maʻuʻanga paʻanga ia ʻa ha kautaha lotu. ʻI he ʻahó ni, ʻoku ui pē ha ngaahi falemahaki ʻe niʻihi ʻaki ha ngaahi hingoa fakalotu, pea ko e ngaahi falemahaki kehé leva ia ʻoku kei ngāue pē ai ha niʻihi mei he haʻa faifekaú.

Kapau ʻoku fiemaʻu ʻe ha taha ʻo e Kau Fakamoʻoni ʻa Sihová ke fai hano tauhi pe tokangaʻi fakafalemahaki, kuo pau ke ne fai ʻene fili pē ʻaʻana pe ʻe ʻalu ki ha feituʻu pehē ʻa ia ʻoku ngalingali ʻi ai haʻane pīkinga mo ha kautaha lotú. ʻE fakaʻatā nai ʻe ha konisēnisi ʻo ha taha ke ne fai pehē, ka ki ha taha kehe ʻe taʻofi ia ʻe hono konisēnisí. (1 Tim. 1:5) ʻOku ʻi ai ha ngaahi tuʻunga pau te ne tākiekina nai e fili ʻa ha tokotaha, pea ʻoku lelei ke tau fakakaukau ki ai.

Ko e fakatātaá, mahalo ko e fale ofi taha pē ia he feituʻú ʻa e falemahaki pe ʻapi tauhi vaivai ko ē ʻoku hingoa fakalotú. Pe kapau ʻoku ʻi ai ha fale kehe ia ʻoku ofi atu, ko e fale pē ko ē ʻoku ngalingali ʻi ai ʻene pīkinga fakalotú, ʻoku ʻiloa nai ʻi heʻene tuʻunga māʻolunga taha ʻenau faifatongiá. Ko ha falemahaki pehē ʻoku hingoa fakalotú ʻoku ngali ko e fale pē ia ʻoku kakato ai ʻa e ngaahi naunau makehe ke fakahokoʻaki ʻa e faʻahinga faitoʻo ʻoku fiemaʻú, pe ko e falemahaki pē ia ʻoku lava lelei ʻa hoʻo toketaá pe faitafá ke ngāue aí. ʻIkai ngata aí, ʻi he taimi ʻe niʻihi ko e ngaahi falemahaki ko ia ʻoku ʻi ai ʻenau ngaahi pīkinga fakalotú te nau tokaʻi nai ʻa e anga hoʻo vakai ko ha Kalisitiane ki hono ngāueʻaki ʻo e totó, ka ʻoku ʻikai ke pehē ʻa e ngaahi falemahaki tāutahá mo fakakoló ia. Ko ia ko e ngaahi moʻoniʻi meʻa ia ʻe niʻihi ke ke fakakaukau ki ai ʻi he taimi ʻokú ke fili ai pe ko fē feituʻu fakafaitoʻo ke ke ngāueʻakí.

Kapau te ke fili ke ngāueʻaki ha falemahaki pe ko ha ʻapi tauhi vaivai ʻoku ʻi ai haʻane pīkinga fakalotu, te ke vakai nai ki ai ko haʻo totongi pē ia ha ngāue naʻe fai maʻau. Te ke vakai nai ki ai ko hano fakalele pē ia ʻe ha kautaha lotu ha faʻahinga pisinisi, pea ʻi hoʻo totongi ko ia ha ngāue ʻoku fai ʻi ha faʻahinga pisinisi pehē, ʻoku ʻikai ko haʻo tokoni loto-fiefoaki mo fakahangatonu ia ʻaʻau ke poupouʻi ʻa e lotu loí. Ko hoʻo totongi pē ʻe koe ʻa e ngāue ʻoku nau faí pe ko ha koloa.

Ko hono moʻoní, ʻi he tuʻunga ko ha Kalisitiané, ʻoku totonu ke ke fakapapauʻi ʻi he ngaahi tuʻunga peheé ke ʻoua te ke kau ai ʻi ha faʻahinga tafaʻaki pē ʻo e lotu loí. Pehē foki, heʻikai te ke uiʻaki ʻa e ngaahi hingoa anga-maheni fakalotu, hangē ko e “Tamai” pe “Tāupoʻou,” ki he faʻahinga tāutaha ʻoku nau ngāue pe ʻaʻahi atu nai ki he falemahakí. (Mt. 23:9) ʻOku totonu ke ke fakapapauʻi ko e ʻuhinga hoʻo ʻi aí ko ha fokotuʻutuʻu fakapisinisi ʻataʻatā pē ʻa ia ko hono faitoʻo koe pe fai ha ngāue maʻau, pea ngata pē ai.

ʻI hano ʻave koe ki falemahaki, te ke fakahaaʻi nai ko e taha koe ʻo e Kau Fakamoʻoni ʻa Sihová pea ʻokú ke loto ke ʻaʻahi atu ha kau mātuʻa ʻi he feituʻú. ʻOku fakapapauʻi ai heni ʻe tokoniʻi fakalaumālie totonu koe lolotonga hoʻo ʻi aí.—1 Tes. 5:14.

ʻOku totonu ko e fatongia ia ʻo e ngaahi mēmipa ʻo e fāmili ʻi he tuí, kau mātuʻa he feituʻú, mo e niʻihi ʻi he fakatahaʻangá ke nau tokanga ki he ngaahi fiemaʻu fakalaumālie ʻa ha tokoua pe tuofefine taʻumotuʻa ʻa ia ʻoku nofo ʻi he ngaahi ʻapi tauhi vaivaí, tautautefito kapau ʻoku fakalele ia ʻe ha kautaha lotu. Ko hoʻo kau tōtōivi ʻi he meʻá ni ʻe hoko ia ko ha fakalototoʻa lahi ki he faʻahinga taʻumotuʻa peheé pea ʻe taʻofi ai kinautolu mei haʻanau kau fāinoa ʻi ha ngaahi ouau mo ha ngaahi kātoanga fakalotu, pe ko ha ngaahi meʻa meimei tatau ʻoku fakahoko ʻi he ngaahi feituʻu peheé.

ʻI heʻetau fakakaukau ki he ngaahi poini ko ení, ʻoku totonu leva ki he tokotaha taki taha ke ne fakakaukauʻi ʻa e ngaahi tuʻunga kotoa ʻoku felāveʻi mo iá pea toki fai leva ʻene fili fakafoʻituitui pe ko fē ʻa e falemahaki pe ko e ʻapi tauhi vaivai te ne ngāueʻakí.—Kal. 6:5.