ʻOku Tau Holoki ʻa e Ngaahi Kolotau Mālohí
1 ʻI he laui senituli, ko hono ngāueʻaki ʻa e ngaahi akonaki loí mo e kākaá, kuo fakakuihi ai ʻe Sētane ʻa e loto mo e ʻatamai ʻo e kakai tokolahi. Kuó ne fakamafola ʻa e ngaahi tokāteline hangē ko e Tolu-Tahaʻi-ʻOtuá, ko e taʻefaʻamate ʻa e laumālié mo e afi ʻo helí. ʻOkú ne pouaki ʻa e veiveiua fekauʻaki mo e ʻi ai ʻo ha Tokotaha-Fakatupú pea mo hono fehuʻia ʻa e tuʻunga alafalalaʻanga ʻo e Tohi Tapú. Ko e lau matakalí mo e mamahiʻi-fonuá ko e ongo fakafaingataʻaʻiaʻanga kehe ia ʻokú ne taʻofi ʻa e kakaí mei hono tali ʻa e moʻoní. (2 Kol. 4:4) ʻE lava fēfē ke tau holoki ʻa e ngaahi tui pehē ʻoku hangē ha ngaahi kolotau mālohí?—2 Kol. 10:4, 5.
2 Kaunga ki Ai ʻa e Ongoʻí: Ko e ngaahi tui fakalotu fuoloá ʻoku faʻa kaunga ia ki he ongoʻi loloto ʻa ha tokotaha. Kuo piki ʻa e niʻihi ki he ngaahi tui fehālaakí talu pē mei he kei siʻí. Ke tokoniʻi ʻa e faʻahinga peheé, ʻoku fiemaʻu ke tau lea ʻi ha founga ʻoku hā mei ai ʻetau tokaʻi ʻa ʻenau fakakaukaú.—1 Pita 3:15.
3 ʻE lava ke tau fakaʻapaʻapaʻi ʻa e faʻahinga peheé ʻaki hono fakaʻatā kinautolu ke nau fakamatala ki he meʻa ʻoku nau tui ki aí pea mo hono ʻuhingá. (Sem. 1:19) Mahalo ʻoku nau tui mālohi ko e laumālié ʻoku taʻefaʻamate koeʻuhí he kuo mole ha taha ʻoku nau ʻofa ai ʻi he maté pea ʻoku nau fakaʻamu ke toe sio kia kinautolu. Pe ʻoku nau kātoangaʻi nai ʻa e ngaahi ʻaho mālōloó koeʻuhí ko ʻenau koloaʻaki ʻa e ngaahi taimi faingamālie ko iá ke feohi ai mo honau fāmilí. Ko e fanongo ki heʻenau ngaahi fakamatalá ʻe tokoniʻi ai kitautolu ke tau mahinoʻi ʻa ʻenau ngaahi ongoʻí pea tokoniʻi ai kitautolu ke tau fai ha tali ʻi ha founga ola lelei.—Pal. 16:23.
4 Faʻifaʻitaki kia Sīsū: Naʻe ʻomai ʻe Sīsū kia kitautolu ha faʻifaʻitakiʻanga lelei ʻaupito ʻi he taimi naʻá ne tali ai ʻa e ngaahi fehuʻi ʻa ha tangata naʻe mataotao ʻi he Laó. Naʻe ʻikai ke ʻoange ʻe Sīsū ha ngaahi tali fakahangatonu, koeʻuhí he naʻe ʻikai mei tali ia ʻe he tangatá he ʻokú ne koloaʻaki ʻa ʻene ngaahi tui ko iá. ʻI hono kehé, naʻe lave ʻa Sīsū ki he Tohi Tapú, ʻo fakaafeʻi ia ke ne fakahaaʻi ʻene fakakaukaú, pea tokoniʻi ia ke ne fakaʻuhinga ʻaki hono ngāueʻaki ha talanoa fakatātā.—Luke 10:25-37.
5 Ko e ngaahi tui fakalotu loi mālohí ʻoku ʻikai ke vāvātatau ia mo e moʻoni ʻo e Folofola ʻa e ʻOtuá. (Hep. 4:12) ʻI hono fakamatalaʻi anga-kātaki ke maongo ki he lotó, ʻe malava ai ke tau tokoniʻi ʻa e kakaí ke nau siʻaki ʻa e loí kae tali ʻa e moʻoni ko ia ʻe lava ke ne fakatauʻatāinaʻi kinautolú.—Sione 8:32.