ʻOku Tau Maʻu ʻa e Koloa Mahuʻinga ke Vahevahe Atu
1 ʻOku fonu ʻi he Folofola ʻa e ʻOtuá ʻa e ngaahi koloa fakalaumālie ʻoku tau tukulotoa. (Sāme 12:6; 119:11, 14) ʻI he taimi ʻe taha, naʻe ngāueʻaki ai ʻe Sīsū ʻa e ngaahi talanoa fakatātā ʻoku fakahaaʻi ai ʻa e tafaʻaki kehekehe ʻo e Puleʻangá, peá ne toki ʻeke leva ki heʻene kau ākongá: “Oku mou ilo ae gaahi mea ni kotoabe?” ʻI hono maʻu ha tali papaú, naʻá ne tala ange kia kinautolu: “Koia koe akonaki [pe faiako] kotoabe kuo akonekina ki he buleaga oe lagi, oku tatau ia moe tagata koe eiki oe fale, aia oku omi mei he ene koloa ae gaahi mea foou moe mea motua.”—Mt. 13:1-52, PM.
2 Ko e ngaahi moʻoni Fakatohitapu naʻa tau ʻilo ʻi he fuofua taimi naʻa tau kamata ako aí, ʻe lava ke vakai ki ai ko ha ngaahi koloa motuʻa. Fakafou ʻi he fakalakalaka ʻo ʻetau ako fakafoʻituitui ʻa e ngaahi meʻa loloto ʻo e Folofola ʻa e ʻOtuá, ʻoku tau maʻu ai ʻa e ngaahi moʻoni Fakatohitapu kehe, ʻa ia ko e ngaahi koloa foʻou ia kia kitautolu. (1 Kol. 2:7) ʻIkai ko ia pē, fakafou ʻi he “tamaioeiki agatonu mo boto,” ʻoku tau mahinoʻi ai ʻa e ngaahi koloa foʻoú.—Mt. 24:45, PM.
3 ʻOku tau fakamahuʻingaʻi ʻa e ngaahi koloa fakalaumālie motuʻa mo foʻou ko ʻení. ʻOku ueʻi ai heni kitautolu ke tau feinga ke maʻu ha ako mo ha taukei ʻi he tuʻunga ko e kau faiako ʻo e Folofola ʻa e ʻOtuá, ʻo vahevahe nima-homo atu ki he niʻihi kehé ʻa e ngaahi moʻoni mahuʻinga kuo tau akó.
4 Ako mei he Faʻifaʻitakiʻanga ʻa Sīsuú: ʻI hono fakahaaʻi ʻa e anga ʻene ongoʻi fekauʻaki mo e ngaahi koloa ko ʻení, naʻe feinga mālohi ʻa Sīsū ke vahevahe atu ia ki he niʻihi kehé. Naʻa mo e taimi naʻá ne helaʻia aí, naʻe ʻikai ke taʻofi ai ʻa ʻene ʻoatu ʻa e ngaahi koloá ni mei hono “feleoko.”—Sione 4:6-14.
5 Ko e ʻofa ʻa Sīsū ki he faʻahinga naʻa nau ʻi ha tuʻunga masiva fakalaumālié, naʻe ueʻi ai ia ke ne vahevahe ʻa e ngaahi koloa foaki-moʻui ʻo e ngaahi moʻoni ʻa e ʻOtuá. (Sāme 72:13) Naʻá ne fakaʻofaʻia ʻi he faʻahinga naʻa nau fiekaia fakalaumālié pea naʻe ueʻi ai ia ke ne “ako kiate kinautolu ha ngāhi meʻa lahi.”—Mk. 6:34.
6 Faʻifaʻitaki kia Sīsū: ʻI heʻetau fakamahuʻingaʻi ʻa e ngaahi koloa ʻoku tau maʻú, ʻo hangē ko Sīsuú, te tau vēkeveke ange ai ke fakahaaʻi hangatonu ki he kakaí mei he Tohi Tapú ʻa e ngaahi koloa fakalaumālié. (Pal. 2:1-5) Neongo te tau helaʻia nai he taimi ʻe niʻihi, te tau leaʻaki ʻa e ngaahi moʻoni Fakatohitapú ʻi he loto-vēkeveke moʻoni. (Mk. 12:34) Ko ʻetau houngaʻia lahi ʻi he ngaahi koloa ʻoku tau maʻú ʻe ueʻi ai kitautolu ke tau tōtōivi ʻi he ngāue fakafaifekaú, ʻo feinga maʻu pē ke kau kakato ange ki ai.