ʻOku Hanganaki ʻAi ʻe he Malangá Ke Tau Mālohi Fakalaumālie

1. Ko e hā ʻa e ʻaonga ʻoku tau maʻu ʻi he ngāue fakamalangá?

¹ Ko e kau longomoʻui ʻi he ngāue fakamalangá ʻe lava ke fakaivimālohiʻi fakalaumālie ai kitautolu pea fakalahi ai ʻetau fiefiá. Ko e moʻoni, ʻoku tautefito ʻetau kau ʻi he ngāue fakafaifekaú ke fakahōifuaʻi ʻa Sihova. Kae kehe, ʻi he talangofua ki he fekau ke “malangaʻaki ʻa e folofola,” ʻoku tau maʻu ai ʻa e ngaahi tāpuaki ʻa Sihová pea tau toe maʻu ʻaonga ai ʻi he ngaahi founga kehe. (2 Tim. 4:2; Ai. 48:17, 18) ʻOku lava fēfē ke fakaivimālohiʻi kitautolu ʻe he malangá pea ʻai kitautolu ke tau fiefia?

2. ʻI he ngaahi founga fē ʻoku fakaivimālohiʻi ai kitautolu ʻe he ngāue fakafaifekaú?

² Fakaivimālohi mo Faitāpuekina Kitautolu: ʻOku fakalotolahiʻi kitautolu ʻe he malangá ke tau tokangataha ki he ngaahi tāpuaki ʻo e Puleʻangá kae ʻikai ki he ngaahi faingataʻa lolotongá. (2 Kol. 4:18) Ko hono fakamatalaʻi ʻa e ngaahi akonaki ʻa e Tohi Tapú ʻoku fakaivimālohiʻi ai ʻetau tui ki he ngaahi talaʻofa ʻa Sihová pea langaʻi ai ʻetau houngaʻia ki he moʻoní. (Ai. 65:13, 14) ʻI heʻetau tokoniʻi ʻa e niʻihi kehé ke nau tupu fakalaumālie koeʻuhi ke “ʻikai te nau ʻo māmāni,” ʻoku tau ʻai ai ke mālohi ʻetau tuʻu ʻo mavahe mei he māmaní.—Sione 17:14, 16; Loma 12:2.

3. ʻOku anga-fēfē hono tokoniʻi kitautolu ʻe heʻetau ngāue fakafaifekaú ke fakatupulekina ʻa e ngaahi ʻulungāanga faka-Kalisitiané?

³ Ko e kau ʻi he ngāue fakafaifekaú ʻoku tokoniʻi ai kitautolu ke fakatupulekina ʻa e ngaahi ʻulungāanga faka-Kalisitiané. Ko e fakatātaá, ko e feinga ke “hoko ko e meʻa kehekehe ki he kakai kehekehe” ʻoku tokoniʻi ai kitautolu ke fakatupulekina ʻa e anga-fakatōkilalo lahi ange. (1 Kol. 9:19-23) ʻI heʻetau talanoa ki he faʻahinga ʻoku “nofo ongosia mo tukuhāusia, ʻo hange ko ha fanga sipi taʻe hanau tauhi,” ʻoku tau hehema ai ke ako ʻa e kaungāmamahí mo e kaungāongoʻí. (Mt. 9:36) ʻOku tau ako ʻa e kātakí ʻi he taimi ʻoku tau kītaki ai neongo ʻa e taʻemahuʻingaʻiá pe fakafepakí. ʻOku fakautuutu ʻetau fiefiá ʻi hono tokoniʻi ʻa e niʻihi kehé.—Ng. 20:35.

4. ʻOku fēfē hoʻo ongoʻi fekauʻaki mo hoʻo ngāue fakafaifekaú?

⁴ Ko ha tāpuaki ia ke maʻu ha ngāue fakafaifekau ʻoku ʻoatu ai ʻa e lāngilangi ki he Tokotaha pē taha ʻoku tuha mo ʻetau lotú! ʻOku fakaivimālohiʻi kitautolu ʻe he ngāue fakafaifekaú. ʻOkú ne ʻomai ʻa e tāpuaki lahi ki he faʻahinga ʻoku nau kau kakato ki he ‘faifakamoʻoni fakaʻāuliliki ki he ongoongo leleí.’—Ng. 20:24, NW.