ʻOku Mou Mateuteu ki he Akó?
1. Ko e hā ʻa e ngaahi faingamālie ʻoku fakatatali mai kia kimoutolu ʻi he hokohoko atu hoʻomou akó?
1 Pe ko e kamata ʻa e akó pe kamata ʻo ha taʻu pe teemi foʻou, ko kimoutolu fānau Kalisitiané ʻoku mou fehangahangai mo e ngaahi faingataʻa mo e ngaahi tenge foʻou. Ka ʻoku toe ʻi ai homou faingamālie foʻou ke ‘fakamooni ai ki he mooní.’ (Sione 18:37, PM) ʻOku mou teuteu lelei pea mateuteu ke fai ha fakamoʻoni?
2. ʻI he ngaahi founga fē ʻoku mou mateuteu ai ke fekuki mo e faingataʻa ʻi he ʻapiakó?
2 Ke tokoniʻi kimoutolu ke lavameʻa ʻi he tafaʻaki kotoa pē ʻo e moʻuí, kuo mou maʻu ʻa e ako lahi meia Sihova, mei hoʻomou ongo mātuʻá, pea mei he tamaioʻeiki anga-tonu mo potó. (Pal. 1:8; 6:20; 23:23-25; Ef. 6:1-4; 2 Tim. 3:16, 17) Ka ʻi he taimi ní ʻoku ʻikai ha veiveiua ʻoku mou ʻiloʻi ʻa e ngaahi faingataʻa ʻoku ʻamanekina ʻe hoko ʻi homou ʻapiakó. ʻI he ako fakaʻotuá mo e ʻilo ki he ʻātakai te mou fehangahangai mo iá, mateuteu ke mou fai ha fakamoʻoni. (Pal. 22:3) Fakakaukau fakamātoato ki he fakahinohino mo e ngaahi fokotuʻu ʻaonga Fakatohitapu ʻoku maʻu ʻi he ongo voliume ʻo e Young People Ask pea pehē ki he ngaahi kupu felāveʻi mo ia ʻoku pulusi maʻu pē ʻi he ʻĀ Hake!
3. ʻI he ngaahi founga fē ʻe malava ai ke mou fai ha fakamoʻoní?
3 Ko homou feituʻu ngāue makehé ʻe fakaʻatā ai kimoutolu ke fai ha fakamoʻoni ʻi he ngaahi founga lahi. ʻI hono fakatokangaʻi ʻe he niʻihi kehé ʻa e alafaʻifaʻitakiʻanga homou valá mo e teuteú, ʻulungaangá mo e leá, anga-fakaʻapaʻapa ki he kaungā kalasí mo e kau faiakó, pea naʻa mo homou māká, pea ʻoku nau ʻiloʻi ʻoku mou maʻu ha makatuʻunga fefeka ʻi he moʻuí, ʻoku ʻeke nai ʻe he niʻihi, “Ko e hā ʻoku mou kehe ʻaupito aí?” (Mal. 3:18; Sione 15:19) ʻE ʻatā nai ai ha faingamālie ke mou fai ai ha fakamoʻoni pea fakamatalaʻi ʻa e meʻa ʻoku mou tui ki aí. (1 Tim. 2:9, 10) ʻI he kotoa ʻo e taʻu fakaakó, ʻoku ngalingali te mou fehangahangai ai mo e ngaahi faingataʻa hangē ko e ngaahi kātoanga mamahiʻi-fonuá mo e ngaahi ʻaho mālōloó. Kapau ʻe ʻeke atu ʻa e ʻuhinga ʻoku ʻikai te mou kau ai ki aí, te mou pehē pē, “ʻOku fepaki ia mo ʻemau lotú; ʻoku mau kau ki he Kau Fakamoʻoni ʻa Sihová,” pe te mou ngāueʻaki ʻa e faingamālié ke faifakamoʻoni ai fekauʻaki mo hoʻomou Tamai ʻofá, ʻa Sihova? Ko e teuteu lelei ʻi he tataki ʻa Sihová te ne ʻai ai ke mou mateuteu ke fai ha fakamoʻoni lelei ki he kau faiakó, kaungāakó mo e niʻihi kehé.—1 Pita 3:15.
4. Ko e hā ʻoku mou tuipau ai te mou lavameʻa ʻi he ʻapiakó?
4 Neongo te mou kiʻi manavasiʻi nai ʻi he ʻamanaki ke ʻalu ki he akó, ʻai ke mou ʻilo ʻoku poupouʻi kimoutolu ʻe he tokolahi ʻoku nau loto ke mou lavameʻa ʻi he ʻapiakó. ʻIkai ko ia pē, ʻoku mau fiefia fakataha mo kimoutolu ʻi hoʻomou ʻamanaki ke faifakamoʻoni ki he niʻihi kehe ʻi homou feituʻu ngāue makehé. Ko ia ai, loto-toʻa pea mateuteu ki he akó!