‘ʻAtu Siʻomou Moʻuí’ ki Hoʻomou Kau Akó
1. Ko e hā ʻoku fiemaʻú ke tokoniʻi ai ha ako Tohi Tapu?
1 Ke tokoniʻi ha ako Tohi Tapu ke aʻu ʻo fakatapui, ʻoku fiemaʻu ʻa e meʻa lahi ange ʻi hono fai pē ha ako Tohi Tapu tuʻumaʻu mo ia. Naʻe fakahoa ʻe he ʻapositolo ko Paulá ʻa hono vahaʻangatae mo e faʻahinga naʻá ne akoʻí ki ha faʻē toutama ʻokú ne tauhi ʻa ʻene fānaú. Ko kitautolu foki ʻoku tau fiefia ke ʻatu ‘siʻetau moʻuí’ ke tokoniʻi ʻetau kau akó ke nau tupu fakalaumālie.—1 Tes. 2:7-9.
2. Ko e hā ʻoku totonu ai ke tau fakahāhā ʻa e mahuʻingaʻia fakafoʻituituí, pea ʻe lava fēfē nai ke fai ia?
2 Mahuʻingaʻia Fakafoʻituitui:ʻI hono ngāueʻaki ʻe ha ako Tohi Tapu ʻa e meʻa ʻokú ne akó, ʻe ueʻi ia ʻe hono konisēnisí ke ʻikai toe hoko atu ʻene feohi vāofi mo e faʻahinga ʻoku ʻikai te nau fai ki he ngaahi tefitoʻi moʻoni Fakatohitapú. (1 Pita 4:4) ʻE siʻaki nai ia ʻe hono fāmilí. (Mt. 10:34-36) ʻE lava ke tau tokoni ki hono fakalato ʻa e fiemaʻu fakaeongó ʻaki hono fakahāhā ʻa e mahuʻingaʻia fakafoʻituitui māfana. ʻOku fakamatala ha misinale taukei: “ʻOua ʻe mavahe fakavave mei he akó ʻi heʻene ʻosí pē. Kapau ʻoku feʻungamālie, nofo ʻi ha kiʻi taimi ʻo talanoa.” Tokanga ke ʻoange ʻa e tokoni ʻaonga ki hoʻo akó. Ko e fakatātaá, ʻe lava ke ke telefoni pe ʻaʻahi kiate ia ʻi he taimi ʻokú ne puke aí? ʻE lava ke ke tangutu mo hoʻo akó ʻi he fakatahá pea tokoniʻi ia mo ʻene fānaú, ʻo kapau ʻe feʻungamālie?
3. ʻE lava fēfē ke tau tokoniʻi ʻetau akó ke ne maʻu ʻa e fakalototoʻa mei he fakatahaʻangá?
3 Tokoni mei he Fakatahaʻangá: Kapau ʻokú ke ʻi he ngāue fakafaifekaú ʻo ofi ki he ʻapi hoʻo akó, ko e hā ʻoku ʻikai te ke ʻaʻahi nounou ai ʻo fakafeʻiloaki ki ai ʻa ho kaungāngāué? ʻI heʻene feʻungamālié, fakaafeʻi ʻi he taimi ki he taimi ʻa e kau malanga kehekehe, kau ai ʻa e kau mātuʻá, ke nau ō mo koe ʻi he akó. Pehē foki, ʻi hoʻo fokotuʻu pē ha akó, fakaʻaiʻai ʻa hoʻo ako Tohi Tapú ke ne maʻu ʻa e fakataha ʻi he Fale Fakatahaʻangá. ʻE ʻai ia ʻe he meʻá ni ke ne malava ʻo maʻu ha feohi fakatupu langa hake mo e ngaahi mēmipa ʻo e fakatahaʻangá ʻa ia te nau hoko nai ko hono fāmili fakalaumālie.—Mk. 10:29, 30; Hep. 10:24, 25.
4. ʻE lava fēfē nai ke faitāpuekina ʻetau tōtōiví?
4 Ko ha mātuʻa ʻokú ne tokoniʻi fakalaumālie taʻehela ʻa ʻene fānaú ʻokú ne fiefia lahi ʻi he taimi ʻoku nau tuʻu ai maʻa Sihova pea ʻaʻeva ʻi he moʻoní. (3 Sione 4) ʻE lava ke tau aʻusia ʻa e fiefia tatau ʻi heʻetau ʻatu siʻetau moʻuí ke tokoniʻi ʻetau kau ako Tohi Tapú.