Meʻa ʻOku Tau Fakamuʻomuʻá
1. Naʻe anga-fēfē hono fakahāhā ʻe Sīsū naʻe mahuʻinga kiate ia ʻa e ngāue fakafaifekaú?
1 Ko e ngāue fakafaifekaú ʻa e meʻa naʻe fakamuʻomuʻa ʻe Sīsuú. Naʻá ne ngāue mālohi, ʻi he lue lalo he maile ʻe laui ngeau ʻi he kotoa ʻo Pālesitainé ke malanga ki he tokolahi taha ʻe ala lavá. Naʻá ne tauhi ʻa ʻene moʻuí ke faingofua koeʻuhi ke lava ai ʻo ne līʻoa ʻa e taimi mo e tokanga lahi ange ki he ngāue fakafaifekaú. (Mt. 8:20) ʻI he taimi naʻe feinga ai ʻa e fuʻu kakaí ke taʻofi ia koeʻuhi ke ne fakamoʻui ʻenau kau mahakí, naʻá ne pehē: “Kuo pau ke u ʻave ʻa e ongoongolelei ki he ngaahi kolo kehe foki, ʻo tala ʻa e Puleʻanga ʻo e ʻOtua; he naʻe fekau mai au ki he meʻa ko ia.”—Luke 4:43.
2. Ko e hā naʻe mātuʻaki mahuʻinga ai kia Sīsū ʻa e ngāue fakafaifekaú?
2 Ko e hā naʻe mātuʻaki mahuʻinga ai ʻa e ngāue fakafaifekaú kia Sīsuú? Ko ʻene tokanga muʻomuʻá ke ʻai ke māʻoniʻoni ʻa e huafa ʻo Sihová. (Mt. 6:9) Naʻá ne ʻofa ʻi heʻene Tamai fakahēvaní pea ko ia naʻá ne holi ai ke fakahoko ʻa Hono finangaló pea talangofua ki Heʻene fekau kotoa pē. (Sione 14:31) ʻIkai ko ia pē, naʻá ne tokanga moʻoni ki he kakaí peá ne loto ke tokoniʻi kinautolu.—Mt. 9:36, 37.
3. Te tau fakahāhā fēfē nai ʻoku tau tokangataha ki he ngāue fakafaifekaú?
3 Faʻifaʻitaki kia Sīsū: Ko hono tauhi maʻu ʻa e tokangataha tatau naʻe maʻu ʻe Sīsuú ʻoku lava ke hoko ia ko e pole koeʻuhí ʻoku kounaʻi lahi ʻe he māmaní ʻa hotau taimí pea ʻomai mo e fakahohaʻa lahi. (Mt. 24:37-39; Luke 21:34) Ko ia ai, kuo pau ke tau fakapapauʻi ʻa e ngaahi meʻa mahuʻinga lahi angé, ʻo fakataimitēpileʻi ʻa e taimi ke teuteu ai pea kau maʻu pē ʻi he ngāue fakamalangá. (Fili. 1:10) ʻOku tau feinga ke tauhi maʻu ha founga moʻui faingofua pea fakaʻehiʻehi mei hono ngāueʻaki ʻa e māmaní ko e meʻa ke ʻosiki.—1 Kol. 7:31.
4. Ko e hā ʻoku mātuʻaki mahuʻinga ai ke tauhi maʻu he taimí ni ʻa e meʻa ʻoku totonu ke fakamuʻomuʻá?
4 ʻI he fakangatangata ʻa e taimí, ko ha tokotaha fakapotopoto ʻokú ne fakamuʻomuʻa ʻa e meʻa ʻoku mahuʻingá. Ko e fakatātaá, kapau naʻá ne ʻiloʻi ʻoku maluʻaki mai ha afā fakatuʻutāmaki, te ne fakahangataha hono taimí mo e iví ki hono fai ʻo e ngaahi fokotuʻutuʻu ki ha maluʻanga ki hono fāmilí pea fai ha fakatokanga ki hono ngaahi kaungāʻapí. ʻE fakatatali ʻa e ngaahi ngāue ʻoku ʻikai loko mahuʻingá. Ko e taimi ʻoku toe ki muʻa ke aʻu mai ʻa e afā ko ʻĀmaketoné ʻoku nounou. (Sef. 1:14-16; 1 Kol. 7:29) Koeʻuhi ke fakahaofi kitautolu mo e faʻahinga ʻoku fanongo mai kia kitautolú, kuo pau ke tau lamalama kia kitautolu mo e meʻa ʻoku tau akoʻakí, ʻo tatau ai pē ʻi loto pe ʻi tuʻa ʻi he fakatahaʻangá. (1 Tim. 4:16) ʻIo, ko ʻetau haó ʻoku fakatuʻunga ia ʻi heʻetau hanganaki fakamuʻomuʻa ʻa ʻetau ngāue fakafaifekaú!