Kuó Ke Ngāueʻaki ʻa e Muiʻi Takafí?

ʻI he taimi ʻoku toʻo ai ʻe he kakaí ha makasiní, ʻoku nau faʻa sio ki he takafí pea fulihi leva ʻo hila ki mui. Ko e muiʻi takafi ʻo e pulusinga Taua Leʻo maʻá e kakaí ʻoku ʻi ai ha ngaahi fehuʻi mo e fakamatala fakatupu mahuʻingaʻia fakataha mo e ngaahi fika ʻo e pēsí ʻoku fakahaaʻi ai ʻa e feituʻu ʻe lava ke maʻu ai ʻa e fakamatalá.

ʻE lava ke tau ngāueʻaki ʻa e tafaʻaki ko ení ke maʻu ai ha ngaahi fakakaukau lelei ki ha ngaahi fehuʻi talateu ke kamata ai ha fetalanoaʻaki. Kapau ʻoku tau toutou ngāueʻi ʻa e feituʻu ngāué, ʻe lava ke tau ʻai ke kehekehe ʻetau tuʻuakí ʻaki hono ngāueʻaki ʻa e ngaahi fehuʻi kehekehe ʻi he māhiná kotoa. Kapau ʻoku moʻua ʻa e tokotaha-ʻapí, ʻe lava ke fakanounou ʻetau tuʻuakí ʻaki hono fakahaaʻi ʻa e taha ʻo e ngaahi fehuʻi ʻi he muiʻi takafí pea pehē, “Kapau te ke saiʻia ke ʻiloʻi ʻa e talí, ʻe lava ke u tuku atu ʻa e ongo makasiní, pea ʻe lava ke ta toki talanoa lahi ange ʻi he ʻi ai hao taimí.” ʻE loto ʻa e kau malanga ʻe niʻihi ke kamata ha fetalanoaʻaki ʻaki hono fakahaaʻi ʻa e muiʻi takafí ki he tokotaha-ʻapí pea fakaafeʻi ia ke ne fili ha fehuʻi ʻoku mahuʻingaʻia ai. Te nau fakahaaʻi leva ʻa e feituʻu ʻoku maʻu ai ʻa e talí pea lau ha konga Tohi Tapu kuo fili ki muʻa. Mahalo pē ʻe lava ke ke fakakaukau ki ha ngaahi founga kehe ke ngāueʻaki ai ʻa e muiʻi takafí ke langaʻi ʻa e mahuʻingaʻia ʻi he Taua Leʻo.