‘Tuku ke Fakamāʻoniʻoniʻi ʻa e Huafa ʻo e ʻOtuá’
1. Ko e hā e kaveinga ʻo e polokalama ʻasemipilī fakasēketi ki he taʻu fakangāue 2012, pea ko e hā hono makatuʻungá?
1 He monūʻia ē ko kitautolu ke fataki e huafa ʻo e Hau Fakalevelevá, ʻa Sihova! Ko e ʻOtuá tonu naʻá ne ʻomi hono huafá ke tau fatakí, pea tautefito talu mei he taʻu 1931, ʻi he tuʻunga ko e Kau Fakamoʻoni ʻa Sihová, kuo fakafekauʻaki kitautolu mo e huafa makehe ʻo Sihová. (Ai. 43:10) Ko e ʻAlo tofu-pē-taha-ne-fakatupu ʻo e ʻOtuá, ʻa Sīsū, naʻá ne fakamahuʻingaʻi lahi ʻaupito e huafa ʻo e ʻOtuá, ʻo fakamuʻomuʻa ia ʻi heʻene sīpinga lotú. (Mt. 6:9, NW) ʻOku ʻomai ʻe he ngaahi lea ʻa Sīsuú e makatuʻunga ki he kaveinga ʻetau polokalama ʻasemipilī fakasēketi ki he taʻu fakangāue 2012. ʻA ia ko e ‘Tuku ke Fakamāʻoniʻoniʻi ʻa e Huafa ʻo e ʻOtuá.’
2. Ko e hā ʻa e fakamatala ʻoku tau fakatuʻotuʻa atu ki ai?
2 Ko e Hā Te Tau Fanongo ki Aí: ʻI he Tokonakí ko e malangá “ʻAi ke ʻIloa e Huafa ʻo e ʻOtuá ʻi he Tuʻunga ko e Kau Sevāniti Taimi-Kakato” ʻe lāulea ia ki he ʻuhinga ʻoku hoko ai ʻa e ngāue taimi-kakató ko ha founga moʻui fakafiemālié. Te tau toe fanongo ai ki he malanga fakakongokonga “Tokanga ke ʻOua ʻe ʻOatu ha Tuʻunga Fakamā ki he Huafa ʻo Sihová,” ʻa ia te ne tokoniʻi kitautolu ke fakaʻehiʻehi mei he hoko ʻo fihia ʻi he ngaahi tauhele ʻe ala hoko ʻe fā. Ko e ongo fehuʻi, Ko e hā te ne tokoniʻi kitautolu ke malanga faivelenga neongo ʻoku ʻikai loko fakahāhā nai ʻe he kakaí ha mahuʻingaʻia? mo e, Ko e hā te ne tokoniʻi kitautolu ke fakahoko ha ngāue fakafaifekau mohu ʻuhingá? ʻe tali ia ʻe he malanga “ʻUhinga Kuo Pau Ai ke Fakamāʻoniʻoniʻi ʻa e Huafa ʻo e ʻOtuá.” ʻI he Sāpaté te tau fiefia ai ʻi ha malanga fakakongokonga konga fā ʻi he founga ʻe lava ke tau fakamāʻoniʻoniʻi ai e huafa ʻo e ʻOtuá ʻaki ʻetau ngaahi fakakaukaú, leá, ngaahi filí, mo e tōʻongá. Ko e kau foʻoú ʻe tautefito ʻenau houngaʻia ʻi he malanga maʻá e kakaí, “ʻE Fakamāʻoniʻoniʻi ʻe Sihova ʻa Hono Huafa Lahí ʻi ʻĀmaketone.”
3. Ko e hā e monū ʻoku tau maʻú, pea ʻe fēfē hono tokoniʻi kitautolu ʻe he polokalamá?
3 Kuo vavé ni ʻaupito ke ngāue mai ʻa Sihova ke fakamāʻoniʻoniʻi hono huafá. (Isi. 36:23, PM) ʻI he lolotongá ni, ʻoku tau maʻu e monū maʻongoʻonga hono pouaki e meʻa kotoa ʻoku fakafofongaʻi ʻe he huafa māʻoniʻoni ʻo Sihová. ʻOku tau tuipau ʻe hanga ʻe he ʻasemipilī fakasēketi ko ení ʻo tokoniʻi taki taha kitautolu ke fakahoko hotau fatongia mafatukituki ko e kau fataki e huafa ʻo e ʻOtuá.