Ko e Tengá Kuo Pau ke Fuʻifuʻi Koeʻuhí ke Tupu
1. Ko e hā kuo pau ke fuʻifuʻi koeʻuhí ke tupú?
1 Ko e tenga ʻoku tō ʻi ha ngoue kuo pau ke fuʻifuʻi koeʻuhí ke tupu. ʻOku pehē pē ʻene moʻoni fekauʻaki mo e tenga ʻo e moʻoní ʻa ia ʻoku tō he loto ʻo e kakai ʻi hotau feituʻu ngāué. (1 Kol. 3:6) Kuo pau ke tau fai ha ngaahi toe ʻaʻahi pea fuʻifuʻi e tenga fakaefakatātā ko ení ʻo ngāueʻaki e Folofola ʻa e ʻOtuá kapau ʻoku tau loto ke nau faiaka, tupu, pea moʻui lelei.
2. ʻE lava fēfē ke tau fakatoka ha makatuʻunga ki he toe ʻaʻahi hokó?
2 ʻOhake ha Fehuʻi: ʻI hoʻo teuteu hoʻo tuʻuakí, ko e hā ʻoku ʻikai ke toe teuteu ai mo ha fehuʻi langaʻi mahuʻingaʻia ʻa ia ʻe lava ke ke tali ʻi he toe ʻaʻahí? ʻOhake ia he fakamulituku ʻo e ʻuluaki fetalanoaʻakí, pea fai ha fokotuʻutuʻu pau ke toe foki. ʻOku ʻilo ʻe he tokolahi ʻoku ʻaonga ke fili ha meʻa mei he tohi Akoʻi ʻe he Tohi Tapú ʻa ia ʻe fakaʻatā ai kinautolu ke fakahāhā ha ako Tohi Tapu.
3. Ko e hā ʻa e fakamatala ʻe lava ke fakakau ʻi hono lēkooti ʻa e mahuʻingaʻiá?
3 ʻAi ha Lēkooti: ʻI hoʻo mavahe pē mei he ʻuluaki ʻaʻahí, vaheʻi ha taimi ke ʻai ai ha lēkooti. Tohiʻi ʻa e hingoa mo e tuʻasila ʻo e tokotahá. ʻOku toe lelei ke hikiʻi ʻa e ʻaho mo e taimi naʻá ke lea ai kiate iá, meʻa naʻá mo talanoa ki aí, mo e ʻū tohi naʻá ke tukú, kapau naʻe ʻi ai. Naʻá ne pehē ʻokú ne kau ki ha lotu pau? ʻOku ʻi ai hano fāmili? Naʻá ne lave ki he ngaahi meʻa ʻokú ne mahuʻingaʻia mo hohaʻa ki aí? Ko e fakamatala peheé ʻe tokoni ia kia koe ke feʻunuʻaki ai ki he fetalanoaʻaki he kahaʻú. Toe tohiʻi ʻa e taimi naʻá ke loto ke foki aí mo e fehuʻi te ke talí.
4. ʻI he hoko ki he foki ki he mahuʻingaʻiá, ko e hā ʻoku totonu ai ke tau kītakí?
4 Kītaki: ʻE ʻikai mālōlō ʻa Sētane ʻi heʻene ngaahi feinga ke “toʻo ʻa e folofola” naʻe tō ʻi he loto ʻo ha tokotaha. (Mk. 4:14, 15) Ko ia ai, ʻoua ʻe foʻi kapau ʻoku faingataʻa hoʻo maʻu atu ʻa e tokotaha mahuʻingaʻiá ki hono ʻapí. ʻE lava ke ke fai ha kiʻi tohi ʻo ʻave pe tuku ha kiʻi nouti ʻi he matapaá? Naʻe kamata ʻe he tāimuʻa ʻe taha ha ako ʻi he matapaá mo ha fefine ka naʻe ʻikai malava ke toe maʻu ia ki hono ʻapí, ko ia naʻá ne fai ha kiʻi tohi ʻo ʻave. ʻI he faifai pea maʻu ʻe he tuofefiné ʻa e fefiné ki hono ʻapí, naʻe fakahaaʻi ʻe he fefiné ʻa e anga ʻo e maongo loloto kiate ia ʻa e mahuʻingaʻia fakafoʻituitui naʻe fakahaaʻi ange kiate iá. ʻI heʻetau fuʻifuʻi ʻa e tenga ʻo e moʻoní, ʻe lava ke tau hokosia ʻa e fiefia ʻoku hoko ʻi he sio kia kinautolu ʻoku nau kamata tupu, ʻalu ʻo matuʻotuʻa, pea “laku fua ʻo liunga tolungofulu mo liunga onongofulu pea mo ha liunga teau.”—Mk. 4:20.