ʻUlungaanga ʻOkú Ne Fakalāngilangiʻi ʻa e ʻOtuá
1. Ko e hā ʻoku fakatokangaʻi ai ʻa e Kau Fakamoʻoni ʻa Sihová ʻi he taimi ʻoku nau maʻu ai ʻa e ngaahi fakataha-lahi fakavahé?
1 ʻI he kau ki he ngaahi fakataha-lahi fakavahé, ʻoku mātuʻaki fakatokangaʻi kitautolu. ʻI he ngaahi kolo faiʻanga fakataha-lahí, ko e ngaahi ongoongo fakalotofonuá ʻoku nau fakahā ki he kakaí ʻoku tau ʻi ai. ʻOku faʻa fonu ʻa e ngaahi mōtelé mo e falekaí ʻi he kau fakafofongá pea ʻoku fakatokangaʻi ʻe he kakai ʻoku nau nofo ʻi he feituʻu ko iá ko e kau ʻaʻahi tokolahi ʻoku nau ʻai ʻa e fakaʻilonga ʻo e fakataha-lahí. Ko ha ngaahi fakamanatu eni ʻe niʻihi ke tokoniʻi kitautolu ke fakalāngilangiʻi ʻa e ʻOtuá ʻaki ʻetau ʻulungaanga lelei lolotonga ʻoku tau ʻi he kolo faiʻanga fakataha-lahí.—1 Pita 2:12.
2. ʻOku anga-fēfē nai haʻatau fakalāngilangiʻi ʻa e ʻOtuá ʻaki ʻetau vala fakanānā lolotonga ʻetau ʻi he kolo faiʻanga fakataha-lahí?
2 Vala Fakanānā: Ko hotau vala fakanānā lolotonga ʻetau kau ki he polokalamá ʻoku faʻa maongo ia ki he kau mamatá. Kae kehe, ko e sitaila hotau valá ʻi he taimi kehé—ʻi he lēsisita ke nofo ʻi he mōtelé, kai ʻi he ngaahi falekaí, fai e fakataú mo e ngaahi meʻa peheé—te ne ʻai ke maongo lahi ange ki he kau mamatá. Neongo ʻoku ʻikai fiemaʻu ke tau tui ʻa e vala fakatahá ʻi he ngaahi tuʻunga ko ení, ko e meʻa ʻoku tau tuí ʻoku totonu ke fakanānā, fakangeingeia, pea ʻoua ʻe fuʻu nōnoaʻia. Ko e kau mamatá ʻoku totonu ke nau malava ʻo sio ki he faikehekehe ʻiate kitautolu mo e kau taʻetuí. (Loma 12:2) Tānaki atu ki ai, ʻoku totonu ke tau ʻai ʻa e fakaʻilonga ʻo e fakataha-lahí, he ʻe tuʻuaki heni ʻa e fakataha-lahí, taki atu ki ha faingamālie ki ha fakamoʻoni, pea malava ʻa e kau fakafofonga kehé ke ʻiloʻi kitautolu.
3. ʻE anga-fēfē nai haʻatau fakahāhā ʻa e kātaki mo e ʻulungaanga leleí?
3 Kātaki mo e ʻUlungaanga Lelei: ʻI ha taimi ko e tokolahi ʻi he māmaní ʻoku nau siokita mo taʻehoungaʻia, ko ha fakaivifoʻou ē ko ʻetau kātakí mo e ʻulungaanga leleí ki he faʻahinga ʻoku sio maí, ʻo hangē ko e kau ngāue ʻa e mōtelé mo e falekaí! (2 Tīm. 3:1-5) ʻI he taʻofi ʻo e ngaahi nofoʻangá pe tuʻu laine ke maʻu ʻa e meʻa naʻe tukuange mai ʻi he fakataha-lahí, ʻoku totonu ke tau kumi, ʻo ʻikai ko ha ʻaonga pē maʻa kitautolu, ka ko e niʻihi kehé. (1 Kol. 10:23, 24) Hili e kau ki heʻene ʻuluaki fakataha-lahí, naʻe pehē ʻe ha tangata mahuʻingaʻia, “ʻOku ʻikai te u manatuʻi ha taha ʻi he ngaahi malanga naʻe fai ʻi he ʻaho ko iá, ka ko e ʻulungaanga ʻo e Kau Fakamoʻoní ʻoku maongo tuʻuloa kiate au.”
4. Ko e hā ʻoku totonu ai ke tau fakakaukau ki he ngāue pole ʻi he fakataha-lahí kapau ʻoku fakaʻatā ʻe hotau tuʻungá?
4 Kau Ngāue Pole Loto-Lelei: Ko e laumālie ʻo e ngāue polé ko ha fakaʻilonga ia ʻo e Kalisitiane moʻoni. (Saame 110:3) ʻOku lava ke ke pole ke tokoni ʻi he fakataha-lahí? ʻI he feituʻu fakataha-lahi ʻe taha, ko e fanga tokoua mo e fanga tuofāfine ʻe toko 600 naʻa nau pole ke nau kau he fakamaʻa ki muʻa ʻa e fakataha-lahí. Naʻe pehē ʻe ha tokotaha ngāue: “Ko e meʻa fakaofo taha eni kuo mau toki mamata aí! ʻOku faingataʻa ke fakakaukau ko e kakai kotoa ko ení ko e kau ngāue pole.” ʻOku tau hanga vēkeveke atu ki he ngaahi fakataha-lahi fakavahe ʻo e 2013 mo e faingamālie te tau maʻu ʻo ʻikai ko e fanongo pē mo ako mei he ʻOtuá ka ke fakalāngilangiʻi foki ia.
[Puha ʻi he peesi 3-6]
Fakamanatu ki he Fakataha-Lahi Fakavahe 2013
◼ Taimi ʻo e Polokalamá: ʻE fakaava ʻa e ʻū matapaá ʻi he 8:00 pongipongi. Ko e fasi talateú ʻe kamata hono taá ʻi he 9:20 pongipongi ʻi he ʻahó kotoa ʻe tolu. ʻI he taimi ko iá, ko kitautolu hono kotoa ʻoku totonu ke tau ʻalu ki hotau nofoʻangá koeʻuhí ke lava ʻa e polokalamá ʻo kamata ʻi ha founga fakangeingeia. Ko e hivá mo e lotu tukú ʻe fakahoko ia ʻi he 4:50 efiafi ʻi he Falaite mo e Tokonaki pea ʻi he 3:35 efiafi ʻi he Sāpaté.
◼ Tauʻangá: ʻOku faʻa siʻisiʻi ʻa e tauʻangá, ko ia ʻoku totonu ke heka fakatokolahi ʻi ha meʻalele ʻe taha ʻi he lahi taha ʻe ala lavá.
◼ Taʻofi ʻo e Nofoʻangá: ʻE taʻofi nai ha nofoʻanga ki he faʻahinga pē ʻoku nofo ʻi hotau ʻapí pe heka mai ʻi heʻetau meʻalelé pe ko ʻetau kau ako Tohi Tapu lolotongá.—1 Kol. 13:5.
◼ Houa Kai Hoʻataá: Kātaki ʻo ʻomai ha kai hoʻatā maʻamaʻa kae ʻoua ʻe mavahe mei he feituʻu faiʻanga fakataha-lahí ke ʻomai ha meʻakai lolotonga ʻa e mālōlō hoʻataá. ʻE ngāueʻaki nai ha kiʻi kula ʻe lava ke hao ʻi he lalo seá. Ko e ngaahi kula lalahí mo e ngaahi meʻa sioʻatá ʻoku ʻikai ngofua ia ʻi he fale faiʻanga fakataha-lahí.
◼ Ngaahi Tokoní: ʻOku lava ke tau fakahaaʻi ʻetau houngaʻia ki he ngaahi fokotuʻutuʻu ki he fakataha-lahí ʻaki hono fai ha ngaahi tokoni loto-fiefoaki ki he ngāue ʻi māmani lahí ʻi he fakataha-lahí. Ko e sieké ʻoku totonu ke ʻai ke ala totongi ia ki he “Tonga Association of Jehovah’s Witnesses.” ʻI he ngaahi feituʻu ʻe niʻihi ko e tokoní ʻe lava foki ke fai fakafou ʻi ha kaati kulētiti.
◼ Faitoʻó: Kapau ʻoku ke fiemaʻu ha foʻiʻakau fakamafaiʻi fakatoketā, kātaki ʻo fakapapauʻi ke ke haʻu mo ha foʻiʻakau feʻunga, he ʻoku ʻikai ala maʻu ia ʻi he fakataha-lahí. Ko e ngaahi naunau huhu suká, kātaki ʻo tokanga fakapotopoto ki ai, ʻoua ʻe laku ki he tānakiʻanga veve anga-mahení.
◼ Suú: ʻI he taʻu taki taha ʻoku hoko ha ngaahi lavea ʻoku felāveʻi mo e suú, tautefito ki he ngaahi sū ʻeté. ʻOku lelei tahá ke fili ha sū ʻoku fakanānā mo feʻunga lelei ʻo malava ai ke ke lue lelei ʻi he tahifó, ngaahi sitepú, faliki vangavanga mo e ngaahi meʻa pehē.
◼ Saliote Pēpeé: Ko e ngaahi saliote pēpeé ʻoku ʻikai totonu ke ʻomai ia ki he faiʻanga fakataha-lahí. Neongo ia, ʻoku tali pē ʻa e sea maʻá e fānaú kapau ʻoku lava ke fakamaʻu he nofoʻanga hoko atu ki he mātuʻá.
◼ Meʻa Fakanamuleleí: Ko e lahi taha ʻo e ngaahi fakataha-lahí ʻoku fai ia ʻi he feituʻu ʻoku mapunipuni ʻa ia ʻoku ngāueʻaki ai ʻa e mīsini ʻea fakamokomoko. Ko ia ai, ko ha anga-ʻofa ia kapau ʻe fakasiʻisiʻi hono ngāueʻaki ʻa e ngaahi meʻa fakanamuleleí mo e kaloni namu mālohí ʻa ia ʻe fakatupunga ha puke ki he faʻahinga ʻoku faingataʻaʻia ʻenau mānavá pe palopalema kehe meimei tatau.—1 Kol. 10:24.
◼ Foomu Please Follow Up (S-43): ʻOku totonu ke ngāueʻaki ʻa e foomu Please Follow Up ke ʻoatu ai ha fakamatala fekauʻaki mo ha mahuʻingaʻia naʻe maʻu ʻi he faifakamoʻoni ʻi he founga ʻikai anga-mahení lolotonga ʻa e fakataha-lahí. ʻE ʻave nai ʻa e foomu kuo ʻosi fakafonú ki he Loki Tohí pe ki he sekelitali ʻo hoʻo fakatahaʻangá ʻi hoʻo foki ki ʻapí.
◼ Falekaí: Fakalāngilangiʻi ʻa e huafa ʻo Sihová ʻaki hoʻo ʻulungaanga lelei ʻi he ngaahi falekaí. Teuteu ʻi ha founga ʻoku tuha ko ha faifekau Kalisitiane.
◼ Mōtelé:
(1) Kātaki ʻoua ʻe taʻofi ha ngaahi loki lahi ange ʻi he meʻa te ke ngāueʻakí, pea ʻoua ʻe nofo ha kakai ʻi ho lokí ʻo tokolahi ange ia ʻi he meʻa ʻoku fakaʻataá.
(2) ʻOua ʻe kaniseli hoʻo taʻofi nofoʻangá tuku kehe ʻi ha tuʻunga fakavavevave, pea fakahā ki he mōtelé ʻi he taimi pē ʻoku hoko aí, koeʻuhi kae lava ʻa e niʻihi kehé ʻo ngāueʻaki. (Māt. 5:37)
(3) Toki ʻave pē ha saliote ʻi haʻo mateuteu ke ngāueʻaki iá, pea fakafoki leva ia koeʻuhí ke lava ʻo ngāueʻaki ʻe he niʻihi kehé.
(4) Feimeʻakai pē ʻi he ngaahi loki ʻoku ngofua ke fai ai ha feimeʻakaí.
(5) ʻOua ʻe ngāuekoviʻaki ha kai pongipongi, kofi pe ʻaisi poloka taʻetotongi ʻoku ʻai ke ala maʻu ke ngāueʻaki ʻe he kau ʻaʻahí lolotonga ʻenau ʻi he mōtelé.
(6) Fakahāhā ʻa e fua ʻo e laumālié ʻi he feangainga mo e kau ngāue mōtelé ʻi he taimi kotoa. ʻOku nau tokangaʻi ha fuʻu kau ʻaʻahi tokolahi pea te nau houngaʻia ʻi heʻetau anga-leleí, kātakí mo e fakaʻatuʻí.
(7) ʻOku totonu ki he ngaahi mātuʻá ke nau tokangaʻi ʻenau fānaú ʻi he taimi kotoa pē ʻi he mōtelé, kau ki ai ʻa e loki talitali, loki fakamālohisino, mo e ngaahi meʻa pehē.
(8) Kapau ʻe hoko ha palopalema ʻi ho loki ʻi he mōtelé, fakahā ki he Potungāue Lokí lolotonga hoʻo ʻi he fakataha-lahí koeʻuhi kae lava ke nau tokoniʻi koe.
◼ Ngāue Polé: Ko ha taha pē ʻoku loto ke pole ʻoku totonu ke ne fetuʻutaki ki he Potungāue Ngāue Pole ʻi he fakataha-lahí. Ko e fānau siʻi hifo he taʻu 16 ʻe lava ke nau ngāue foki ʻi he malumalu ʻo e tataki ʻa ha taha ʻo e ongo mātuʻá pe ko hano tauhi pe ha tokotaha lahi kehe ʻoku loto ki ai ʻa e taha ʻo e ongo mātuʻá pe tauhí.