“Tauhi Maʻu ʻa Hoʻomou Tōʻongá ke Lelei ʻi he Lotolotonga ʻo e Ngaahi Puleʻangá”

1. Ko e hā ʻoku mahuʻinga ai ke tau tauhi maʻu ʻa e tōʻonga lelei lolotonga ʻa e ngaahi fakataha-lahi ʻoku teu ke hokó?

¹ ʻOku tau tohoakiʻi ʻa e tokanga ʻa e kakaí ʻi he lolotonga ʻetau ngaahi fakataha-lahi ʻi he taʻu taki taha, ko ia ʻoku mahuʻinga ʻa e hoko ʻetau tōʻongá ʻo fakafofongaʻi lelei ʻa e ʻOtua ʻoku tau lotu ki aí. (Liv. 20:26) Ko hotau ngaahi ʻulungaanga leleí pehē ki hotau valá mo e teuteú ʻoku totonu ke fakahaaʻi mahino ai ko e kau muimui moʻoni kitautolu ʻo Kalaisi. ʻI heʻetau maʻu ʻa e fakataha-lahi fakavahe pe fakavahaʻapuleʻanga ʻoku teu ke hokó, ʻe lava fēfē ke tau ‘tauhi maʻu ʻa e tōʻonga lelei ʻi he lotolotonga ʻo e ngaahi puleʻangá’ pea ʻoatu ai ʻa e lāngilangí ki heʻetau Tamai fakahēvaní?—1 Pita 2:12.

2. Ko e hā ʻa e ngaahi faingamālie te tau maʻu ke fakahāhā atu ai ʻa e ʻulungaanga faka-Kalisitiané lolotonga ʻa e fakataha-lahí?

² Fakahāhā ʻa e ʻUlungaanga Faka-Kalisitiane: Ko e ʻofa ʻoku tau fakahāhā ki he tokotaha taki taha pea mo e founga ʻoku tau feangainga ai ki he “faʻahinga ʻi tuʻá” ʻoku tuʻu mātuʻaki hōhoatamaki ia mo e laumālie tākiekina ʻo e māmaní. (Kol. 3:10; 4:5; 2 Tīm. 3:1-5) ʻOku totonu ke tau anga-lelei mo anga-kātaki ʻi he taimi ʻoku tau feangai ai mo e kau ngāue ʻa e hōtelé mo e falekaí, pea naʻa mo e taimi ʻe hoko ai ha ngaahi palopalema. Ko e ngaahi ʻulungaanga leleí ʻoku toe hā atu ia ʻi heʻetau tuku ha kiʻi meʻaʻofa maʻá e faʻahinga ʻoku nau fai ha ngaahi ngāue fakafoʻituitui maʻa kitautolu.

3. Ko e hā ʻa e fakamanatu ʻoku ʻoange ki he ngaahi mātuʻá, pea ko e hā hono ʻuhingá?

³ ʻOku totonu ki he ngaahi mātuʻá ke nau tokangaʻi lelei ʻenau fānaú ʻi he feituʻu faiʻanga fakataha-lahí, falekaí pea ʻi he hōtelé. (Pal. 29:15) Naʻe pehē ʻe ha pule falekai ʻo ha hōtele ki ha ongo meʻa: “ʻOku mau saiʻia ʻiate kimoutolú. Ko homou ngaahi fāmilí mo homou fānaú ʻoku nau ʻulungaanga lelei ʻaupito mo anga-fakaʻapaʻapa. ʻOku talanoa ʻa e kau ngāué kotoa fekauʻaki mo kimoutolu, pea ʻoku mau fakaʻamu ke mou nofo heni ʻi he fakaʻosinga ʻo e uike kotoa pē.”

4. ʻI heʻetau ʻi he feituʻu ʻoku fai ai ʻa e fakataha-lahí, ko e hā ʻoku totonu ke tau tokanga ai ki hotau valá mo e teuteú?

⁴ Vala Fakanānā: ʻI he lolotonga ʻa e fakataha-lahí ko hotau valá ʻoku totonu ke taau mo anga-fakanānā, kae ʻikai tapua atu ai ʻa e ngaahi sitaila tōtuʻa ʻoku anga-maheniʻaki ʻi he māmaní. (1 Tīm. 2:9) Naʻa mo e taimi ʻoku tau hū ai ki he hōtelé pe mavahe mei ai mo e lolotonga ʻo e ngaahi taimi mālōloó, ki muʻa mo e hili ʻo e ngaahi kongá, ʻoku tau loto ke fakaʻehiʻehi mei he teuteu ʻaiʻainoaʻia pe taʻemaau. Ko ia ai, ʻoku totonu ke tau pōlepole ʻi hono tui hotau fakaʻilonga fakataha-lahí pea ʻoua ʻe mā ke fai ha fakamoʻoni ʻi he taimi ʻoku maʻu ai ha faingamālie. Ko hotau teuteú mo e ʻulungaanga lelei lolotonga hono maʻu ʻa e ngaahi fakataha-lahi ʻoku teu ke hokó, ʻe ʻikai ngata pē ʻi hono tohoakiʻi mai ʻa e kakai loto-totonú ki he pōpoaki fakahaofi moʻui ʻo e Tohi Tapú ka ʻoku toe ʻoatu ai ʻa e fiefia kia Sihova.—Sēf. 3:17.

Fakamanatu ki he Fakataha-Lahi 2014

◼ Taimi ʻo e Polokalamá: ʻE fakaava ʻa e ʻū matapaá ʻi he 8:00 pongipongi. Ko e fasi talateú ʻe kamata hono taá ʻi he 9:20 pongipongi ʻi he ʻahó kotoa ʻe tolu. ʻI he taimi ko iá, ko kitautolu hono kotoa ʻoku totonu ke tau ʻalu ki hotau nofoʻangá koeʻuhí ke lava ʻa e polokalamá ʻo kamata ʻi ha founga fakangeingeia. Ko e hivá mo e lotu tukú ʻe fakahoko ia ʻi he 4:55 efiafi ʻi he Falaite mo e Tokonaki pea ʻi he 3:50 efiafi ʻi he Sāpaté.

◼ Fakataha-lahi Fakavahaʻapuleʻanga: Ko e ngaahi feituʻu ʻe niʻihi te nau tokangaʻi ʻa e fakataha lahi fakavahé. Manatuʻi kuo ʻosi fakaafeʻi ʻe he ʻōfisi vaʻá ʻa e ngaahi fakatahaʻanga pau pea mo e kau ʻaʻahi mei he ngaahi fonua mulí hili hono fikaʻi fakalelei ʻa e lahi ʻo e ngaahi sea, tauʻanga meʻalele, pea mo e ngaahi hōtele ʻoku ala ʻataá. ʻE fuʻu tokolahi nai kapau ʻe maʻu ʻe ha kau malanga ha fakataha-lahi fakavahaʻapuleʻanga naʻe ʻikai fakaafeʻi kinautolu ki ai. Kapau ʻe fiemaʻu ʻi ha meʻa naʻe hoko, ke ke maʻu ai ha fakataha-lahi kehe mei he fakataha ko ia ʻoku vaheʻi ki ai hoʻo fakatahaʻangá, ʻoku ʻikai totonu ke ke fili ki he fakataha lahi fakavahaʻapuleʻangá.

◼ Tauʻangá: ʻI he kotoa ʻo e ngaahi feituʻu faiʻanga fakataha-lahi ko ia ʻoku tau puleʻi ʻa e tauʻangá, ʻe ala maʻu taʻetotongi ʻa e ngaahi tauʻangá ʻo fai pē ki he ʻuluaki aʻu ki aí. ʻOku faʻa siʻisiʻi ʻa e tauʻangá, ko ia ʻoku totonu ke heka fakatokolahi ʻi ha meʻalele ʻe taha ʻi he lahi taha ʻe ala lavá. Ko e faʻahinga pē ʻoku ʻi ai ʻenau Ngofua Tauʻanga ki he Faingataʻaʻiá ʻe fakaʻatā ke nau tau ʻi he feituʻu ʻoku taʻofi maʻanautolú.

◼ Taʻofi ʻo e Nofoʻangá: ʻI he taimi pē ʻoku fakaava ai ʻa e fale faiʻanga fakataha lahí ʻi he pongipongi taki taha, kātaki ʻoua ʻe fakavave ki he tangutuʻanga ʻokú ke saiʻia aí kapau ʻoku saiʻia mo ho kaungā fanongó ʻi he nofoʻanga ko iá. Ko ha laumālie feilaulauʻi kita te ne ueʻi kitautolu ke kumi ki he lelei ʻa e niʻihi kehé ʻo tapua atu ai ko e kau Kalisitiane moʻoni kitautolu pea ueʻi mo e faʻahinga kehé ke nau fakahīkihikiʻi ʻa e ʻOtuá. (Sione 13:34, 35; 1 Kol. 13:4, 5; 1 Pita 2:12) Ko e nofoʻangá ʻe taʻofi pē ki he faʻahinga ʻoku nofo ʻi ho ʻapí pe heka mai ʻi hoʻo meʻalelé pe ko hoʻo kau ako Tohi Tapu lolotongá. Kuo tokonaki ʻa e ngaahi nofoʻanga makehe maʻá e kau taʻumotuʻá mo e kau mahamahakí. Koeʻuhi ʻoku fakangatangata ʻa e nofoʻangá, ko e toko taha pe toko ua pē ke tangutu fakataha ʻo tokangaʻi ʻa e tokotaha taʻumotuʻá pe mahamahakí.

◼ Houa Kai Hoʻataá: Kātaki ʻo ʻomai ha kai hoʻatā maʻamaʻa kae ʻoua ʻe mavahe mei he feituʻu faiʻanga fakataha-lahí ke ʻomai ha meʻakai lolotonga ʻa e mālōlō hoʻataá. ʻE ngāueʻaki nai ha kiʻi kula ʻe lava ke hao ʻi he lalo seá. Ko e ngaahi kula lalahí mo e ngaahi meʻa sioʻatá ʻoku ʻikai ngofua ia ʻi he fale faiʻanga fakataha-lahí.

◼ Ngaahi Tokoní: ʻOku lava ke tau fakahaaʻi ʻetau houngaʻia ki he ngaahi fokotuʻutuʻu ki he fakataha-lahí ʻaki hono fai ha ngaahi tokoni loto-fiefoaki ki he ngāue ʻi māmani lahí ʻi he fakataha-lahí. Ko e sieké ʻoku totonu ke ʻai ke ala totongi ia ki he “Tonga Association of Jehovah’s Witnesses.” ʻI he ngaahi feituʻu ʻe niʻihi ko e tokoní ʻe lava foki ke fai fakafou ʻi ha kaati kulētiti.

◼ Faitoʻó: Kapau ʻokú ke fiemaʻu ha foʻiʻakau fakamafaiʻi fakatoketā, kātaki ʻo fakapapauʻi ke ke haʻu mo ha foʻiʻakau feʻunga, he ʻoku ʻikai ala maʻu ia ʻi he fakataha-lahí. Ko e ngaahi naunau huhu suká, kātaki ʻo tokanga fakapotopoto ki ai, ʻoua ʻe laku ki he tānakiʻanga veve anga-mahení.

◼ Tokanga ki he Tuʻunga Malú: Kātaki ʻo tokanga ki hono fakasiʻisiʻi ʻo e lavea ʻe lava ke fakatupunga koeʻuhi ko e hekea pe humu. ʻI he taʻu taki taha ʻoku hoko ha ngaahi lavea ʻoku felāveʻi mo e suú, tautefito ki he ngaahi sū ʻeté. ʻOku lelei tahá ke fili ha sū ʻoku fakanānā mo feʻunga lelei ʻo malava ai ke ke lue lelei ʻi he tahifó, ngaahi sitepú, faliki vangavanga mo e ngaahi meʻa pehē.

◼ Saliote Pēpeé: Ko e ngaahi saliote pēpeé ʻoku ʻikai totonu ke ʻomai ia ki he faiʻanga fakataha-lahí. Neongo ia, ʻoku tali pē ʻa e sea maʻá e fānaú kapau ʻoku lava ke fakamaʻu he nofoʻanga hoko atu ki he mātuʻá.

◼ Meʻa Fakanamuleleí: Ko e lahi taha ʻo e ngaahi fakataha-lahí ʻoku fai ia ʻi he feituʻu ʻoku mapunipuni ʻa ia ʻoku ngāueʻaki ai ʻa e mīsini ʻea fakamokomoko. Ko ia ai, ko ha anga-ʻofa ia kapau ʻe fakasiʻisiʻi hono ngāueʻaki ʻa e ngaahi meʻa fakanamuleleí mo e kaloni namu mālohí ʻa ia ʻe fakatupunga ha puke ki he faʻahinga ʻoku faingataʻaʻia ʻenau mānavá pe palopalema kehe meimei tatau.—1 Kol. 10:24.

◼ Foomu Please Follow Up (S-43): ʻOku totonu ke ngāueʻaki ʻa e foomu Please Follow Up ke ʻoatu ai ha fakamatala fekauʻaki mo ha mahuʻingaʻia naʻe maʻu ʻi he faifakamoʻoni ʻi he founga ʻikai anga-mahení lolotonga ʻa e fakataha-lahí. ʻE ʻave nai ʻa e foomu kuo ʻosi fakafonú ki he Loki Tohí pe ki he sekelitali ʻo hoʻo fakatahaʻangá ʻi hoʻo foki ki ʻapí.

◼ Falekaí: Fakalāngilangiʻi ʻa e huafa ʻo Sihová ʻaki hoʻo ʻulungaanga lelei ʻi he ngaahi falekaí. Teuteu ʻi ha founga ʻoku tuha ko ha faifekau Kalisitiane.

◼ Mōtelé:

Kātaki ʻoua ʻe taʻofi ha ngaahi loki lahi ange ʻi he meʻa te ke ngāueʻakí, pea ʻoua ʻe nofo ha kakai ʻi ho lokí ʻo tokolahi ange ia ʻi he meʻa ʻoku fakaʻataá.
ʻOua ʻe kaniseli hoʻo taʻofi nofoʻangá tuku kehe ʻi ha tuʻunga fakavavevave, pea fakahā ki he mōtelé ʻi he taimi pē ʻoku hoko aí, koeʻuhi kae lava ʻa e niʻihi kehé ʻo ngāueʻaki. (Māt. 5:37) Kapau ʻe kaniseli hoʻo taʻofi nofoʻangá, fakapapauʻi ʻokú ke maʻu hoʻo fika talitotongí. Kapau te ke kaniseli ha loki ʻo siʻi hifo he houa ʻe 48 ʻe ʻikai toe fakafoki mai hoʻo tipōsiti.
Toki ʻave pē ha saliote ʻi haʻo mateuteu ke ngāueʻaki, pea fakafoki leva ia koeʻuhí ke lava ʻo ngāueʻaki ʻe he niʻihi kehé.
ʻOua ʻe ngāuehalaʻaki ʻa e meʻakai pongipongí, kofi pe ʻaisi poloka taʻetotongi ʻoku ʻai ke ala maʻu ke ngāueʻaki ʻe he kau ʻaʻahí lolotonga ʻenau ʻi he mōtelé ʻo ʻave ia ki he fakataha lahí.
Fakahāhā ʻa e fua ʻo e laumālié ʻi he feangainga mo e kau ngāue mōtelé ʻi he taimi kotoa. ʻOku nau tokangaʻi ha fuʻu kau ʻaʻahi tokolahi pea te nau houngaʻia ʻi heʻetau anga-leleí, kātakí mo e fakaʻatuʻí.
ʻOku totonu ki he ngaahi mātuʻá ke nau tokangaʻi ʻenau fānaú ʻi he taimi kotoa pē ʻi he mōtelé, kau ki ai ʻa e loki talitali, loki fakamālohisino, mo e ngaahi meʻa pehē.
Kapau ʻe hoko ha palopalema ʻi ho loki ʻi he mōtelé, fakahā ki he Potungāue Nofoʻangá lolotonga hoʻo ʻi he fakataha-lahí koeʻuhi kae lava ke nau tokoniʻi koe.

◼ Ngāue Polé: Ko ha taha pē ʻoku loto ke pole ʻoku totonu ke ne fetuʻutaki ki he Potungāue Ngāue Pole ʻi he fakataha-lahí. Ko e fānau siʻi hifo he taʻu 16 ʻe lava ke nau ngāue foki ʻi he malumalu ʻo e tataki ʻa ha taha ʻo e ongo mātuʻá pe ko hono tauhí pe ko ha tokotaha lahi ʻoku loto ki ai ʻa e taha ʻo e ongo mātuʻá pe tokotaha tauhí.